Read Komrem MI INTHEIPA 6 Bible Online

MI INTHEIPA 6 - Komrem bible

MI INTHEIPA 6

¹Hiva raleichunga hin akakhôk tak akadik mak intlo inkhat kahmu sōt.

²Pathen in mi inkhat nei leh hao, kajana, ran leh sum apek sik, ôk, amadu rakip hei kha’m, tâk-kha khavahei kha kahōitak a amanhmang mak ning. Ahmang kanek a khōhme he’n anhmang sik. Hivahi hnemna kase kae, khana hivahi dikmak a kae.

³Mi inkhat in sa 100 aneithei khana pha kasôttak kahringthei, tâk-kha heituk kasôt ahring innum ama chen, inpâkna kha achen mak inchu khana kaṭhatak a anvûm mak inchu, naite ajōng intelim bât leh akathi jôk in kaṭhachet a kae, kati.

⁴Khava naite kha a’ntea aṭhatna om mak; ama kha inthim kâra inhmang jo; mahngia ka-om jo.

⁵Ama’n kanivâr hmumak jo khana hringkhō hi heimo kae ti’m manhret mak jo, tâk-kha châmhngatna rōk chu achen joa kae,

⁶tu inkhat kum 2,000 ahring inum hringkhō kahōia akahmang mak mipa kanek a naidông khachu châm inhngana achen joa kae. Hei-achang inum, an-inhnibât a hmun inkhat rōk a kase sōm heia kae.

⁷Sâk hmun a sik a eini’n niṭōn rakip nitlo, tâk nitlukna sik a chenhêr mak me.

⁸Heikhonga mo mikasing kha mikamohei nek a aṭhatchômna aka-om? Hringkhō hi heikhong mo intōpui sik ti hi misara inkhat in amanhret a aṭhatna heimo aka-om?

⁹Hivahi hnemna kase kae; hivahi thlihrâng manlōi kapō kae. Pha rakip a madua omṭhak kanek a nanei kha natlâipui sik kha kaṭha jôk.

¹⁰Heirakip akasōk hei hi hmalaia inphut ale’ntluksa dek jo kae, khana eini’n nimanhret ti chu nang kanek a akahrat kha nang in inkhepui tor mak che.

¹¹Na’nkhepui chenna, akahnem mak chet kachang sik, khana nang sik ṭhachet mak ning.

¹²Nirahle kapōa a’nhmang ri hringkhō, akahnem mak akatoitek nihringkhō shunga akaṭhapen kha heimo tia tu’n mo amanhret tor sik? Eini nithisō kahnunga heimo kasōk sik ti hi heikhong inmo nimanhret tor.