Read Komrem MI INTHEIPA 7 Bible Online

MI INTHEIPA 7 - Komrem bible

MI INTHEIPA 7

¹Rahming inthang hi thai marim katui kanek a kaṭha jôk, mihring intet ning kanek a thining kani kaṭha jôk.

²Reveina inna se kanek a kathi inna se kaṭha jôk, ajârchu akahring he’n ankhenga thina’n ahngâk hei ti hi anbinga mandonna anneia kae.

³Manui kanek a malung inrim kaṭha jôk; khava khan nahmaisō amanngui reng sik, tâk-kha namanhretna chu amanngeidet sik che.

⁴Tu inkhat hōina rōk kajong kha mikamo kae. Mikasing in thina chungchânga amandon.

⁵Mi invet he’n nang manpâkna hla antasak kanek a mikasing he’n antarasei che kha kaṭha jôk.

⁶Mi invet in anmanui pha, hmei kâra rahling kapōk rasa ka-ang. Hivahin ahnemna om mak.

⁷Nang kasingthei che, tâk-kha mi inkhat nahōn mathlâk inchu, mikamo kapōa kachôn jo che. Nang in marûk sêr nalo’nchu na-omchen kha nasukset jo.

⁸Neinâk hi aphutna kanek a achaina kaṭha jôk. Inlensak kanek a dehrat kaṭha jôk.

⁹Nahnuknat khimthei roh, thangsetna manbukna hi mikamo ṭōn kae.

¹⁰Hing’hin derna nei hêrmak roh, “Heisa mo kanikhō hma kakeihei kha akaṭha jôk?” Khavakha mikasing ṭongderna changmak.

¹¹Mihring rakip kha akasing sik a rahōi kae; hivahi karōi chen kapōa akaṭha kae

¹²khana sêr tator kapōa hivahin inhukna katamtak apek sik che. Singna’n inhuk a ada sik che, hivahi themna hnemna kae.

¹³Pathen in heimo atlo mandon roh. Pathen in aman-ôn kha heikhong inmo mi inkhat in amantlûn tor sik?

¹⁴Heirakip nang sik a aṭhatchôm jo pha, inpâk roh, khana inrengna ahong jo pha, hinga mandonsōtna nei roh: Pathen in inpâkna leh inrengna akoptōa ahei tir kae; abâna heimo akasōk sik ti kha manhret hêrmak che.

¹⁵Ke’n kahringkhō hnemna kase shunga hin neinâk rakip kahmu sōpet, Mikaṭha ṭhahrep chu kathi ria, mikaṭhamak in aṭhatmak inum ahringsei kasôt a kae.

¹⁶Khava jâra inṭhatsak reimak roh, khan chu insingsak reimak roh; heisik a mo nang nabinga a’nsu inhmang sik che?

¹⁷Akaṭhamak rei um changmak roh, akamo rei um changmak roh, heisa mo nathi phat tluk loa akathi sik che?

¹⁸Akakhe rei mansena che inhnibât hei hi masō roh. Nang in Pathen naṭit inchu, heirakip a hmesōna nanei sik.

¹⁹Khōpui inkhat shunga vaikarôn 10 kanek a singna kanei mi inkhat ratha kahrat chet.

²⁰Kadiktak a raleichunga hin ṭhena kanei hêrmak ṭōn kaṭha rōk katlo mikadik inkhatbek om mak.

²¹Mi rakip ṭonghri rangei mak roh, akinchu nasōkpa’n ahnōisena che nathei khâk sik.

²²Nang inum milak-hei nahnōise ṭhak hei ti nalungria inhret roh.

²³Neinâk hiseng hi ke’n singna vâng ka-enmansin pet jo. Kei sing jo rong tia kamandon; tâk kahlatak a ka-om.

²⁴Hringkhō hi heimo kae tia tu’n mo amanhretsōt tor sik? Eini sik hingtuk hrep a inthûk, manhret sik a intak hêr.

²⁵Tâk-kha ke’n themna leh inchûna sik kamalung kapek jo; khana sing leh malunga ṭongder masônna hmusōtna sik a intluk jo eng.

²⁶Ke’n thina kanek a akakhachet heikhat kahmu, châng kapō nuhmei kha kae. Alungsetna che khachu châng takhit kapō ka-ang sik khana akakōna abân kha ahrui takhit ka-ang sik che. Pathen tlaina sik katlo mi kha khanna inphut kasōksōt tor sik, tâk setkarôn mi chu amanu’n asur sik jo.

²⁷ṭong intheipa’n ahria, kadik, ke’n masônna sik kajōnglai ajing ajing kahei hmusōt a kae.

²⁸Hiva sik a hin masônna sik ahlop kajong, tâk hmutor dekmak eng, pase lishing khat shunga inkhat kapō chu kajana nei sik a kahmu, tâk-kha nuhmei kâra chu inkhatbek hmutor mak eng.

²⁹Kei inchûna seng khachu hi kae, Pathen in eini hi kachâmtak a asyem me, tâk-kha ni bibinga intak hêra insyem mea kae.