Read Komrem MI INTHEIPA 8 Bible Online

MI INTHEIPA 8 - Komrem bible

MI INTHEIPA 8

¹Mikasing rōk in neinâk-hei omna ajârtak kha amanhret. Singna hin inpâk manuina apek hei khana anhmai môkna kha amanhmang pek hei.

²Rengpa tahri kha tlo roh, khana inrangtak a Pathen hneng intepna neimak roh.

³Rengpa’n amadu rakip kha atlo tor, ahnenga inphut inkâi roh; hinghiva insuk-inpaina hmun a om mak roh.

⁴Rengpa khan ratha kaneitak a ṭōn atlo khana atlona chunga tûte’num in-erpui tor mak hei.

⁵Aṭongpek-hei najuilai seng, inhuk a ka-om sik che, khana mikasing in heikhonga mo, hei phat a mo tlo sik ti kha amanhret.

⁶Heirakip tlona sik aphat achâng ahlam akong katluk hrep ka-om et, tâk-kha eini’n ajingtehrep nimanhret!

⁷Eini tûte inkhatbek inum heimo ajōng kasōk sik ti hi manhret mak me, khana ani kahri pek sik tûte om mak.

⁸Tûte inkhatbek inum thina kha pesōt tor mak achangmak leh thina kani kha vōk makhe tor mak. A’nphesōt tor mak sik me redena kha kae, nihlam hro kha hōnmathlak thei emak.

⁹Hiva vânhnōia ṭōn intlo rakip hei chunga kamandon pha ke’n hihei rakip hi kahmu sōt, mi ṭhahrep in ratha anneia anmani thōia mi ṭhahrep in khōdeng antathei sik kae.

¹⁰Ôk, mikaṭhamak-hei anthlân heia antavûm hei kha kahmu hei, tâk-kha thlâna inphut anhong inle pha anmani’n ṭhatmak anta leitlona khōpui khet a mipuihei khan anleimanpâk hei. Hivahi hnemna kase kae.

¹¹Heisa mo mihe’n ṭōnse tlona sik a’ntlukdek ri hei? Ajârchu ṭōnse tlona chunga inranga karâkna ombât mak.

¹²Mikaset inkhat in vōi 100 ṭōnse atlo’num kahring kakeng. Oh kadik, anmani’n hinga antahri kha ke’n kamanhret, “Nang in Pathen najui inchu, heirakip kaṭhapet sik,

¹³tâk-kha mikaṭhamak sik a chu ṭhatchômna om mak ning. Anhringkhō kha daihlim kapō kae, khana ankhangdông changlai kathi sik hei, ajârchu anmani’n Pathen juimak hei.”

¹⁴Tâk-kha hivahi aje omlo kae. Vânhnōia heimo akasōk enroh: kâkralak leh mikaṭhamak tachen sik karâkna kha mikaṭha he’n anchen ri, khana mikaṭhamak he’n mikadik-hei tachen sik inpâkman kha anchen ri. Hivahi hnemna kase kae tia kahri kae.

¹⁵Khava jâra eini hi akahōi sik me kae ti hi kahnōm eng, ajârchu hiva hringkhō shunga hōina inkhat rōk ninei khachu sâk leh in khana nibinga akahōi sik me hi kae jo. Pathen in hiva raleichunga hringkhō apek me shunga hin niṭōn tlona inphut hiva rōk hichu nitlo tor a kae.

¹⁶Ke’n sing rong tia kamandon pha khana raleichunga heimo akasōk tia ka-en pha akaia ke’n kahei manhret khachu, nang in sûn leh jân a jeloa inṭhanga ka-om tor sik che,

¹⁷tâk-kha Pathen in heimo atlo ti khachu manhret mak tin che. Nang in rahnak katia natlo’num, manhret sōt tor mak tin che. Mikasing he’n kanmanhret anti thei sik, tâk-kha manhret mak hei.