Read Komrem MI INTHEIPA 9 Bible Online

MI INTHEIPA 9 - Komrem bible

MI INTHEIPA 9

¹Ke’n pha kasôttak leh kakhôktak a hihei chunga kamandon, khachu mikasing leh mikadik ṭōntlo, anmani lungsetna leh hōtna kapha khan Pathen kut in akhim ti hi kahmu sōt. Tûte inkhat in amak hma omchen sik manhret mak.

²Hivahin inlakna syemdek mak. mikadik leh mikadik mak hei, akaṭha leh akaṭhamak-hei, beklanga a’nṭang hei leh a’nṭangmak hei, inthoina katōk hei leh akatōk mak hei chunga in-anghrep a mahâmkase kha anchen a kae. Mikaṭha kha mikaset kanek a akaṭhachôm det emak, intepna kanei khan akaneimak kanek a akaṭhachet e-dek mak.

³Vâng inkhat hi mi rakip sik a in-angtlinga kajōng, khana hivahi raleichunga ṭhena akasōk hei seng kha leh thakhat kae. Mipui in anhring lai seng, anmalung kha ṭhatmak leh invetna kasip ṭhak, khana manhret phâkloa kathihei.

⁴Tâk-kha tu enum akahring hei raleichunga aka-om rakip in inhōrna ṭhahrep khat chu annei ri; Shabakkai akathisa kanek a chu ui kahring kaṭhachet a kae.

⁵Ôk, akahring he’n anla kathi sik anmanhret tâk-kha akathi he’nchu heite manhret mak jo hei. Anmani tahmu sik chen om mak jo; mahngi cher kachang jo hei.

⁶Anlungsetna hei, anhōtna hei, anmaduna hei kha anmani leh inṭhōia kathisap jo hei. Raleichunga akasōk omchen rakip a anmani inveisa tor mak jo hei.

⁷Hmating song inna se roh — nabu kha sâk inna inpâk roh, naju in-ina kahōia om roh. Hivahi Pathena akadik kha kae.

⁸Ahei tik a inpâk leh katlai hmesō kha rôn roh.

⁹Pathen in vânhnōi raleichunga apek che nahringkhō hnemna kase kha nalungset tak nuhmei inkhat kha leh hringkhō hmang ruh. Hnemna kase kanikhō hei kha kahōia hmang ruh, ajârchu hiva rōk hi na-inrengna man nachen kha kae.

¹⁰Natlona rakip a rahnak a inṭang ro, ajârchu nang in najōn sik thina ram a khan tlo sik, mandon sik, manhretna leh singna om mak jo — khana khan nang akase sik jo che kae.

¹¹Ke’n ahlop khat mandonsōtna kanei nôk, tlân kayâng pa’n ahei tik a mi kheṭhak mak, re kahrângpa’n re torṭhak mak a kae. Mikasingpa’n ahei tik a sâk sik inhmudek mak, malung kasingpa’n haodek mak, tlotorna kanei pa’num ṭōnhmun kalen chendek mak. Mi rakip chunga vângsetna katlung et a kae.

¹²Nang pha kha heitik ajōng katlung sik manhret hêrmak che. Manhret manloa châng in vate asur kapō, lenchâng in nga asur kapōa eini’n nimandon mak phatak a ṭhatmak pha khan asur ri mea kae.

¹³Hinahin ahlop-heikhat kahmu sōt, khachu hiva raleichunga heikhonga mo singna hi antalo tina tekhing kaṭha inkhat kae.

¹⁴Mi katamtak aka-om mak khōpuite inkhat leika-om. Ratha kaneitak reng inkhat in achunga re aleitlo. Ama’n akake khuma abanghei kha sukkhōina sik aleitlo.

¹⁵Khana khan misara mikasing inkhat leika-om, tâk-kha ama hin khōpui huksōt theina sik singna katluk a anei. Tâk-kha tûte’n chu mandonsōt mak hei.

¹⁶Ke’n rathahrat kanek a singna kaṭha jôk tia kahri ṭhak, tâk misara kha tûte’n kasinga teimak hei khana aṭong hri kha donpek mak hei.

¹⁷Mikamohei kâra vaikarôn inkhat in khōtlâng a-ôn kha rangei sik kanek a, mikasing ṭonghri akadai neng kha rangei sik kaṭha jôk.

¹⁸Singna hin re hmangchâk kanek a akaṭhachet atlo, achang ravâng mikaset inkhat in ṭōn kaṭha katamtak tlotor mak.