Read Komrem HLAHEI HLA 5 Bible Online

HLAHEI HLA 5 - Komrem bible

HLAHEI HLA 5

¹Karahōn shunga kahlut jo eng kalungdinu, kalômnu. Marim katui kareibō thingbō kakhôm manchun hei; Kakhōihning leh khōithlar hei kasâk hei; Kasene leh kaju ka-in hei. Lungset a nan inrui mak hma seng in ruh, sâk ruh kalungset hei seng.

²Kaje kâr a’m kamalung chu kahar. Kalungdi khan karahmanga kot ahei raki. Kalômnu, heihlut rong, kalungdinu, kei vaṭhupui. Radaitui in kalu kachor jo, khana sumphai in kasam kha amannêm jo.

³Kei chu kapōn kasûtdek a ka-om jo eng; heijâra mo vōi khat ka’nvon nôk sik? kake’m kasôp pet jo; heijâra mo vōi khat kamanchok nôk sik?

⁴Kalungdipa khan kot khâra akut ahei kabân, ama kahnenga ahong hnai jo pha kaning kaṭha hêr.

⁵Ama manhlutna sik a kei le’ntluk eng. Kakut hei kha marim katui kakano, kakut pârhei kha thai marim katui kamanchor hei, ke’n kotkir kha kamatu pha khan.

⁶Kalungdipa sik a kot khâr kamahlang tâk-kha ama chu leikasesōt jo. Akaresō kha heituk a kathei hnōm mo! Ke’n ama kha kajong, tâk-kha hmutor mak eng; ama kha kabek, tâk aṭong masôn chu theimak jo eng.

⁷Khōpui kahrung he’n anihmu eng; anmani’n anrachâk eng, anrachi eng; khōpui rape kahrung he’n kalukhu ankeihler pek eng.

⁸Jerusalem nuhmeihei, intepna aneipek ruh, khachu kalungdipa kha nan-intōpui inchu, lungset rangeia invōidâk jo eng tia kanhri pek sik ti ruh.

⁹Nuhmeihei kâra akaṭhapennu, nalungdipa kha milak-hei kanek a ahlopdet mo kae? Keini’n nahnenga kan-intepna sik nalungdipa kha a’nlak hêr mo kae?

¹⁰Kalungdipa kha ahme kaṭha, aratha kahrat; ama chu lishing sôm kâra inkhat rōk kae.

¹¹Ama hmaichu ka-êngsera inne neng; Asam katlaser, va-âk kapōa kadum.

¹²Ahmit-hei kha tuitlân hnenga aka-om vaṭhu sanghram ka-ang hei, Sene vâng a’nsi intheng tuidung panga akangirsap vaṭhu ka-ang hei.

¹³Ama kabeng kha rahōn inkhat thingkung reipâr marim katui kasip kha ka-ang. Ahner kha thai marim katui shunga lily pâr niphûm manhlut hei kha ka-ang.

¹⁴Akut-hei kha enhnōm ka-om hei, hira vânga inkheng kutkhi anei hei. Ataksa kha a’nnejen saiha chunga sapphir hlung ret antarabek kha ka-ang.

¹⁵Akerako kha alabaster kachohei sana thlengkam chunga akangir ka-ang hei. Ama chu kalûr hêr, Lebanon Tlângbung, achunga cedar thingkung kakek kha ka-ang.

¹⁶Ama hner kha nimajôp a kathlum; Ahme achâng rakip in amanhōi eng. Jerusalem nuhmeihei, kalungdipa hme kha hiva kapōhrep kha kae.