Read Komrem HLAHEI HLA 7 Bible Online

HLAHEI HLA 7 - Komrem bible

HLAHEI HLA 7

¹Heituk a a’nlak nuhngâk che mo nang hi! Kekōk shunga nakehei kha heituk a akaṭha hei mo. Narakō inhek kha, kut kathem inkhat mazetna ka-ang.

²Khana khan kōklei inkhat ka-om, marim katui ju ahei tik a tlangtik neiloa ka-om. Gehu saphe inkhat um ka-om, lily reipâr he’n ankakebit a kae.

³Nane hei kha shakhi bop hni ka-ang hei, khana kazuk rala 2 ka-ang hei.

⁴Nahrak kha saipui ha insyem ber kha ka-ang. Nahmit-hei kha Heshbon khōpuia tuikhur insim ka-ang hei, khava khōpui kalentak kekot hnenga aka-om hei kha, Nahnar kha Lebanon ber kapōa lungset ka-om hei, Damascus hrungna kha ka-ang.

⁵Carmel Tlâng inshâng kapōa nalu kha inshâng, nasam inpher kha satin pat inne kapōa kavâr, khava ṭhatna khan rengpa kapha’m asurtor sik.

⁶Heituk a enhnōm ka-om che, heituk-hrep a hme kaṭha che mo; nang lungsetna hōina hi heituk a pui akatluk jo mo.

⁷Nang chu kahno kung kapōa maritna kasip che, khana nane hei kha kahno inra abor hei kae.

⁸Ke’n kahno kunga kake sik eng khana akara kha kaṭhōt sik. Kei hnenga chu nane hei kha vomhruibōr ka-ang hei Nakaphuk heimasa kha theikhup kahmin marim ka-ang,

⁹nabei kha akatuipen ju kha ka-ang. Achang inchu ju kha kalungdipa beia lōng jo rasoh, abei leh aha heia lōng rasoh.

¹⁰Kei chu kalungsetpa ta eng kae khana ama’n kei arangei eng.

¹¹Hong roh, lungdipa, ratu ramhâng heia sesōt jo rih khōheia jân varek jo rih.

¹²Jîngkâr hmatak katho sik me khana vomhrui hei ni-en sik hei akakek hei mo ni-en sik hei, a’nhmōm hei kha akapâr jo hei mo, kapothei kunghei akapâr jo hei mo ni-en sik hei. Sova hmun a kalungsetna kha kapek sik che.

¹³Nang in jôrdei ai marim kha nathei sik, khana thei marim katui nikotkung hnenga nathei sik. Lungdipa, amarō leh ather thei katui hei kha ke’n nang sik a kadapek che.