Read Komrem ISAIAH 1 Bible Online

ISAIAH 1 - Komrem bible

ISAIAH 1

¹Hiva lekharabu shunga hin Amoz sapa Isaiah hnenga, Judah ram a Uzziah, Jotham Ahaz leh Hezekiah he’n reng anchanglaia ṭonghei kha ka-om hei.

²RŌNGPU’n ahri, “Marvân leh ralei in, heimo kahri hi rangei ruh! Ke’n kaheivei naipang he’n kei dōina an-inrepui eng.

³Se he’n ankapu anmanhret, shakōrtung he’n akapu’n phi apekna hmun amanhret. Kami Israel tamanhret kanek a antamanhret jo kae. Kamihei chu manhret ṭhak mak hei.

⁴Nangni jât kaset hei, nangni mikadik mak leh mikaṭhamak-hei, nansetna he’n akei mathlâk jo chei, inrimpek ka-om chei! Israelhei a’ntheng Pathen, RŌNGPU kha nanhlonsōt jo, khana nakahnung nansungsi jo.

⁵Heisa mo dōina nantatlo ṭhak. Kakhea karâk sik nanta madu mo? Israel nalu kha intônna bi’n akatōm sō jo kae, khana namalung leh namandona kha akana jo hei kae.

⁶Nalua inphut nakepâr katlunga nataksa pumpui akadam hmun om mak. Natak kha intônna, a’nthling, akakôk bi’n akatōm sō. Nang intônna kha la’nthengmak khana khit a la’ntōmjen mak. Khahei chunga hlei leh ai inno mak a kae.

⁷Naram kha insuk inhmang jo, khana nakhōpuihei ro mankângsō jo hei kae. Nangni’n khanga nan-enlai, ram hlop mihe’n nanram ankasut jo chei khana heirakip anmansetsō jo.

⁸Jerusalem rōk ka-om jo — vomhrui rahōna akahrung omlo berte kapōa khana sanghma bia thlâm kapōa.

⁹Akahrat chunghnung RŌNGPU’n mi ṭhahrep kahringa adamak he’nchu, Jerusalem khōpui kha Sodom leh Gomorrah kapōa suk manhmang hêr akachang sik kae.

¹⁰Jerusalem, navai karônhei leh namihei kha Sodom leh Gomorrah kapō hei kae. Na-Pathen ṭonghri kha malung kahlut a rangei roh.

¹¹Ama’n ahri, “Nang in hiva inthoinahei seng kei hneng natōk hi kamadu sik hei tia namandon mo? Nang in nakemōng leh ran kaṭhahei thai inthoina naro hei kanek a katluk a kanei. Kei sehratche, kemōng leh kehei thisen kha kaning ache jo.

¹²Kei inmuk sik nanhong pha, tu’n mo hihei hi heichoi ruh tia angek chei? Tu’n mo kabek-inn hnōisena rakip hi heitlo ruh ati chei?

¹³Tōk sik nantaheichoi hei hi hnemna kase kae. Marim katui nanta romanhnam hei hi kahōt hei. Nanthlather Revei, serning nitna, khana beklanga nan-intûpna hei hma khan ngir tor mak eng; khahei seng kha nansetna khan amanchoksō heia kae.

¹⁴Ke’n, nanthlather leh kani intheng rehōihei kamater; khahei kha kei sik a phurhrik, rôn sik a karin hêr kha kae.

¹⁵“Nangni’n derna nankut nankalâng pha, ke’n enmak chei ning. Heituk nandera achang inum, theipek mak chei ning, ajârchu nankut hei kha thisen in akatoma kae.

¹⁶Nanbinga insi intheng ruh. Nanset tlo kahmu chei hi bâng ruh. Kadik, ṭhatmak tlo kha bâng ruh

¹⁷khana akadik tlona inchu ruh. Akadik intlo kha hmu hei ruh — suk manrim hei kha inthōpui hei ruh, nu leh pa kasehei kha anratha neina pek hei ruh, renghmeihei hrung hei ruh.

¹⁸RŌNGPU’n ahri, “Tûnchu hiva ṭong hi hri mathlâk rih. Nangni setna’n achu mansen jo chei, tâk kavur kachek kapōa kasôp mantheng sik chei. Nangni achuna chei kha asendup hêr jo’num sahme pōn kapōa kachek sik chei.

¹⁹Nangni’n kei ṭong rōk kha nanjui inchu, ram kara kaṭha kha nansâk sik.

²⁰Tâk-kha kaṭong nanjuimak inchu akathi sik a da jo chei kae, RŌNGPU ke’n kahri kae.

²¹Vōi khat ṭong kajuitak khōpui kalen kha tûnchu notinu kapō kachang jo! Pha khat a mikadik he’n leikasip hei, tâk tûnchu mikathat rōk ka-om jo hei.

²²Jerusalem, nang pha khat a dangka naleipō, tâk, tûnchu mankase kachang jo che; nang vomhrui ju kaṭha leikachang che, tâk tûnchu nang tui kapōhrep kachang jo che.

²³Nahlam kakeihei kha indōipui leh mi’nru hei ṭhōnhei kae; anmani’n kutchoi pek leh sêrmarûk sâk rōk antloṭhak a kae. Anmani’n nu leh pa kasehei kha ṭong tanna inna hukphung mak hei, khana renghmei he’n anṭong anmalâr pha rangei pek mak hei.

²⁴Khava jâra tûn, rangei ruh; akahrat, Chunghnung RŌNGPU Israelhei ratha kanei Pathen in ahri hi rangei ruh: “Kei nanchunga phu kahlō sik, khan chu nangni’n kei asuk manbōi nôk mak jo tin chei.

²⁵Ke’n nanchunga karâkna kapek sik chei, thir ro mantheng kapōa kasuk mantheng sik chei, nanbōkna rakip kalosōt sik kae.

²⁶Hmalai nantaleinei hei kapōa vaikarôn leh mi inse-kathem kapek sik chei. Khava sōa Jerusalem hi akadik, taksen ka-om khōpui kalen a’nti sik kae.”

²⁷Ajârchu, RŌNGPU kha akadik kae; ama’n Jerusalem leh ashunga ka-om rakip malung kathlenghei kha ahuk sik hei.

²⁸Tâk-kha tu achang inum ama kadōi leh setna katlo rakip, asuk mannōi sik hei; Ama kadahlon rakip athat sik hei kae.

²⁹Rahōn intheng kasyema thingkung kaling leh a’nmuk nangni inrim sik chei.

³⁰Nangni hi tûte’n tui achep mak, thi rong kati sasōkung kapōa kachâr sik chei.

³¹Sapôt hmeirasi inkhat in amansûk kapōa, miratha kaneitak hei kha ṭhatmak antlona’n asukset sik hei, khana khava insuksetna kha tûte’n tingtor mak hei ning.