Read Komrem ISAIAH 10 Bible Online

ISAIAH 10 - Komrem bible

ISAIAH 10

¹Nangni inhmang jo chei! Kamihei kasuk inrim sik, dân kadikmak nansyema kae.

²Khang’khan sara khōdeng katheihei ratha neina leh akadik antachen sik kha nanting hei. Khang’khan renghmeihei leh nu leh pa kasehei nei kha nanlo pek heia kae.

³Pathen in karâkna apek chei pha, nangni’n heimo nantatlo sik? Ama’n ram kahlatak a inphut a, nanchunga khōdeng theina apek chei pha, heimo nantatlo sik? Inthōpuina hmun a sik khonting mo akatlân sik chei? Khon mo nanneihei nantathup sik?

⁴Nangni rehmun a anthat sik chei, achangmak leh rehringa ankei sik chei. Kha achang jo’num RŌNGPU hnuk natna kha labâng dekmak ning; karâkna pekna sik a akut akalâng hi sik.

⁵RŌNGPU’n ahri, “Assyria! Ke’n Assyria hi kahnuk inhnat hei chunga karâkna pekna sik a tingpumbe inkhat kapōa kahmang.

⁶Kahnuk inhnat mihei, khōvel jât-hei re kasō sik a ke’n Assyria kha katir. Anmani mipuihei nei kachom sik, inru sik, leh hlamdunga ankachōn rachi sik a katirhei kae.”

⁷Tâk-kha Assyria rengkalen inchu abinga re mantlukna anei. Ama’n jât katamtak suk manhmang sik a intluk a kae.

⁸Ama inlensak a ahri, “Kei rehlam kakei inkhat et hei hi renghei kae!

⁹Ke’n Hamath leh Arpad hei khōpuihei, Kalno leh Carchemish kha rea kator hei. Samaria leh Damascus rea kator hei.

¹⁰Jerusalem leh Samaria kanek a limsyem katamtak inmuk rengramhei karâkna sik a kakut karajit,

¹¹Ke’n Samaria leh asyemlim hei seng kasukset jo, khana Jerusalem leh limsyem inmuk hei chunga khang tlit a katlo sik hei.”

¹²Tâk-kha RŌNGPU’n ahri, “Zion Tlâng chunga leh Jerusalem chunga katlo sik kha katlosō pha, Assyria reng kalenpa hi a’nlensakna leh a’nteina hei seng jâra karâkna kapek sik.”

¹³Assyria rengkalen hin inlensak a ahri, “Heirakip hi kabing rōk a katlo kae. Kei kasing eng, kahrat eng, kathem eng. Ke’n jât-hei kâra ramri kakakek manlen khana sâk sik antamanbuk kha kalopek hei. Sehratche kapōa khana mi ka-om hei kha kachōn rachi hei.

¹⁴Raleichunga jât-hei hi varabu kapō hei kae, varatui khôm mantûp kapōa ankarōihei ke’n kachom mantûp hei. Kei maṭhitna anmathla bek um kathing mak hei; kei hnōkna anhmur bek um mahlâng mak hei!”

¹⁵Tâk-kha RŌNGPU’n ati, “Hreicha khan akahmang mipa kanek a kalen jôk eng atithei sik mo? Hôrai inkhat in akahmang mipa kanek a akakhôkdet mo? Hembung inkhat in mi inkhat kadom mak; mi khan hembung kha akadom kae.”

¹⁶Chunghnung RŌNGPU’n von kakhop hei kha karâkna sik a nat leh sat ajōngtir sik. Antaksa chunga hmei in akânga akâng sik hei.

¹⁷Pathen, Israelhei vâr khan hmei kachang sik. Israelhei a’ntheng Pathen khan hmeimale hongkachang sik, ni khat shung rōk a heirakip akângsō sik, rahling chap leh thing bur hei kapha.

¹⁸Ratu kaṭha leh hleihei akhenga asuk manhmangsō sik kha leh in-anghrep a nat kaṭhamak in mi asuk manhmang sik kae.

¹⁹Thingkung katlomtek naipang inkhat inum atei tor hrep kha indahlon sik.

²⁰Alakahring Israel he’n anmani anleikathat sōvet jât chunga anhong in-ngai makna pha kha kahong jo. Anmani Israelhei a’ntheng Pathen RŌNGPU chunga antaksenna anda sik jo.

²¹Israel sa katlômtek rōk in chunghnung Pathen hnenga he’nle sik hei.

²²Tûnhin Israelhei hi tuipui panga nêrdi ja kapōa antam inum, mi ajingte rōk he’nle sik hei. Mipuihei sik a hivahi anrahōi hrep kha kae, inhmangna kha bukpek hei kae.

²³Kadik, ram pumpui shunga Chunghnung RŌNGPU’n ahri kapōa suk manhmangna kha amathlung sik.

²⁴Chunghnung RŌNGPU Akahratpen khan Ziona ka-om amihei hneng ahri, “Assyria he’n Egypt hei tatlo kapōa ansuk manrim chei inum ṭitmak hei ruh.

²⁵Pha bongkhat shunga karâkna kapek chei hi kachai sik jo, khan ke’n anmani kasuk manhmang sik jo hei.

²⁶Chunghnung RŌNGPU ke’n Oreb hlungpuia Midianhei kavōk hei kapōa, anmani kasung vâng kajem sik jo hei. Ke’n Egypt hei karâkna kapek hei kapōa Assyriahei karâkna kapek sik hei.

²⁷Khava pha ahong tlungtak leh, ke’n Assyriahei ratha neina inphut kamasō sik jo chei, khana anrîngke kha nandâr chunga phurhrik changmak jo ning.”

²⁸Indōipui remi he’n Ai khōpui kha anhlō jo! Anmani’n Migron anhong petan jo. Michmash a sâk leh inchu anhei dahlon!

²⁹Anmani’n hlam inbâkna anrakana Geba a karek hei! Rama khōpuia mihei kha kaṭi jo hei, khana Reng Saul khōpui Gibeah mihei kha katlân jo hei.

³⁰Gallim mihei, ông ruh! Laishah mihei, rangei ruh! Anathoth mihei, masôn ruh!

³¹Madmenah leh Gebim mihei anhringna sik a katlân jo hei.

³²Tuning inrepuihei kha Nob khōpuia ka-om hei, khana khan anmani’n Zion Tlâng chunga, Jerusalem khōpui kalena khan ankuttum ankalek thlōna kae.

³³Chunghnung RŌNGPU’n anmani kha thing bâk nithlâk kapōa amannōi sik hei. A’nlensakpen leh a’nshângpen hei kha atuk mathlâk sik hei, khana anam mathlâk sik hei.

³⁴RŌNGPU’n anmani kha Lebanon thingkung kaṭhapen anphur inthlûk kapōa, ratulaia thingkung hreicha vânga a’nphûr kapōa aphûr mathlâk sik hei.