Read Komrem ISAIAH 13 Bible Online

ISAIAH 13 - Komrem bible

ISAIAH 13

¹Hivahi Babylon chungchânga Amoz sapa, Isaiah in Pathena inphut ṭong thangkōi arahlâng kha kae.

²Hmebung kakekpet inkhat chunga repōnlek matung ruh! A’nlensak khōpui sōngkot-hei kabuhlu sik a achîkna inkhat a remihei hneng ôn ruh khana nanbân kalek ruh.

³RŌNGPU’n ahnuk inhnat mihei karâkna sik a a’ntheng re katuk sik a taksenthei remi leh rekahrâng hei kha abek jo hei.

⁴Tlâng chunga rasa achōr so rangei ruh, mipui katamtak hei rasa, jât-hei leh rengramhei intûpna rasa so. RŌNGPU’n re kakōn sik a aremi katamtak amantluk jo.

⁵Anmani ram kahlatak ralei inchaina inphut a kahong hei. Ahnuknat a, ram pumpui kasuk inhmang sik a, RŌNGPU kha kahong.

⁶Malung kana tak a ông ruh. Akahratpen suk mansetna amasōna sik kani, RŌNGPU kani kha kahnai jo.

⁷Mi rakip in ankut anmakhei mathlâk sik, mi rakip ngarsōna katla sik jo.

⁸Anmani, nupui naiha kaphu kapōa, anmani ankhenga inpir sik hei khana lung nat in akatōm sik hei. Anmani ṭitpum a khat leh khat in-en sik hei, inzak a anhmai kanguireng sik hei.

⁹Raleichung suk mansetna sik leh mikaset-hei suk mansetna sik a ama hnuknat khôkna leh hnuk inthakna kani, RŌNGPU kani kha kajōng jo.

¹⁰Ârsi khana ârsi rup-hei akavâr hei kha vârmak jo hei ning, khana kani ahei sōk pha inthim sik, khana thla kha’m vârmak jo ning.

¹¹RŌNGPU’n ahri, “Raleichunga inrengna kamathlung sik khana mikaṭhamak-hei ansetna jâra ankhenga karâkna kapek sik hei. Mi inlensak rakip kasuk manhnem sik hei, khana êngkase leh mikaṭhamak-hei kha karâkna kapek sik hei.

¹²Alakahring seng mihei kha sana kanek a katlôm sik hei.

¹³Akahratpen, RŌNGPU, ke’n kahnuk natna kamalâr ning, marvânhei kakatlir sik khana ralei hi a-omna hmun a inphut intlirsōt a inthon sik.

¹⁴“Babylona ka-om ramlak mihei kha anram et a katlân sik hei, sha kahnong heia inphut shakhi akatlânsōt kapōa, khana ankakhem kase kemōnghei kapōa.

¹⁵Tu achang inum antasurphâk mi khachu sunhlona ka-om sik.

¹⁶Anmani atloje omloa khō anthlir pha, ansahei kha akathi sik a anhrang kachet sik, an-innhei anchom pek sik hei, khana annuhmeihei kha ansetpui pek sik hei.”

¹⁷RŌNGPU’n ahri, “Babylon kabuhlu sik a Medehei kha kakachok mathōihei. Anmani’n sana leh dangka kha heitea donmak hei ning.

¹⁸Anthe leh ansai vâng retherhei kha anthat sik hei. Anmani’n naipanghei leh naite hei chunga lungsetna heite neimak hei ning.

¹⁹Babylon kha rengram kahōipen kha kae; hivahi amihei inlensakpui kha kae. Tâk-kha RŌNGPU ke’n Babylon kha Sodom leh Gomorrah kamanhmang kapōa kamanhmang sik jo!

²⁰Khana khan tûte inkhatbek om nôk mak jo hei ning. Arab mi akalônle inkhatbek in apōn-inn khana khan matung mak jo ning, khan chu kemōng kakhem inkhatbek inum khava hmun a akemōng khemmak jo ning.

²¹Khava hmun kha nêrdiram shahei omna leh simbu vahei rabu chomna kachang sik jo. Valen va ka-om sik hei, khana sharja hei kha suksetna kâra inphut inhrâm sik jo hei.

²²Inn inshâng hei leh reng-innpuihei kha ram-ui leh kahnehei inhrâm rasa jōn’thông sik jo. Babylon pha kha kajōng jo! Amanu kani inchai vet jo.”