Read Komrem ISAIAH 16 Bible Online

ISAIAH 16 - Komrem bible

ISAIAH 16

¹Nêrdiram a Sela khōpuia inphut a Moab mihe’n Jerusalema vaikarôn hneng kemōngte kutchoia anleipek.

²Anmani’n Arnon Tuidung panga anhngâk a, vate hei anrabua inphut hnongsōt hei kapōa, khō manhret loa kase kahong lele hei.

³Anmani’n Judah mihei hneng anhri, “Heimo tlo sik ahri pek ruh. Sûn kanisat thōia thingkung daihlim kadai inkhat kapōa ahuk ruh, nandaihlima amanhnget ruh. Keini nanrama ahei katlân ung kae; tûte inkhat in ahmu sōt makna sik unga athup ruh.”

⁴Nanrama om rung. Keini kasuk inhmang sik heia inphut ahrung ruh.” (Suk manrimna leh suk mansetna inchai sik jo, khana ram kasuk inhmanghei kha kasesōt sik jo hei.

⁵Khava sōa David sōnhei kâra inkhat in reng kachang sik, khana ama’n mihei kha taksen ka-om tak a leh lungset vânga vai arôn sik hei. Ama’n akadik kha inrangtak a atlosōt sik khan chu ṭongtan kadik tlosōtna sik a ama’n a-en kaṭha sik.)

⁶Judah mihe’n anhri, “Moab mihei kha heituk a a’nlensak hei mo ti kanthei. Anmani an-êng kase khana inlûrsak hei ti kanmanhret, tâk an-inlensakna kha akarōk kae.”

⁷Moab mihei kha an-inreng jâra kaṭap sik hei. Anmani’n Kir Heres khōpuia anthlaisâk kaṭhahei kha anmandon pha ankhenga kaṭap sik hei. Anmani malung kōina annei sik jo.

⁸Heshbon hnenga leh Sibma a vomhrui thei rahōnhei kha sukset jo hei kae, khava thei rahōn heia ju khan jât vaikarônhei amanrui hei. Pha khat a vomhrui kha Jazer khōpui katlunga khana nisōting nêrdiram, khana tlaitlâk ting Tuipui Kathi rekhat katlunga abâk le’njâma kae.

⁹Tûn kei Jazer sik a kaleiṭapna kapōa Sibma vomhrui sik a kaṭap eng. Heshbon sik a leh Eleale sik jâra kahmit rathli katla, ajârchu mihei inpâkna sik om mak jo ning.

¹⁰Hleihmun kaṭhahei chunga tûte inpâk om mak jo. Vomhrui thei rahōn shunga hla kasak, aka-ông tûte om mak jo. Vomhrui ju syemna sik a tûte’n chōn kahnur mak jo; inpâkna rasa kabâng jo.

¹¹Moab-hei sik a malung inrenga kei inkōi eng, Kir Heres sik a kachâm eng.

¹²Moab mihei kha antlâng chunga ankamukna hei leh anbek-inn heia derna sik a pōn ansia kase hei, tâk anmani sik a akaṭha chu om mak.

¹³Khavakha RŌNGPU’n Moab-hei sik a amak hma ṭong aleipek hei kha kae.

¹⁴Khana tûn RŌNGPU’n ahri, “Kum thum shungtak a Moab-hei nei leh hao katamtak inhmang sik jo. Amipui katamtak hei hi ajingte rōk kahring sik hei, khana anmani katlasam sik hei.”