Read Komrem ISAIAH 17 Bible Online

ISAIAH 17 - Komrem bible

ISAIAH 17

¹RŌNGPU’n ahri, “Damascus kha khōpui changsôt mak jo ning; suk manset hei manbukna hrep kachang sik jo.

²Syria khōpuihei kha ahei tik a dahlon kachang sik jo hei. Se leh kemōnghei phi sâkna kachang sik, tûte’n hnongsōt mak hei ning.

³Israel kha inhrungna om mak ning, khana Damascus kha aning ahnōma a-omna inhmang sik. Akahring Syriahei kha Israelhei kapōa hmaimôkna inpek sik hei. Akahrat RŌNGPU ke’n kahri kae,” ati.

⁴RŌNGPU’n ahri, “Israelhei lenna kha atlangna sik kani kahong sik jo, khana annei anhao kha sara changna’n alathleng sik.

⁵Israel kha hleia sâng a’n-ât joa a’nkhômsō jo ka-ang sik, Rephaim phaicham hleipuk antahrut mantheng kapōa akarōksai ka-ang sik.

⁶Mi katlomtek rōk kahring sik hei, khana Israel kha olive theikung antaṭhōtsōa alêra inkhat 2 rōk akara aka-om achangmak leh abâk thōi intonga ajingtehrep akara aka-om kha ka-ang sik. Israel Pathen RŌNGPU ke’n kahri kae.”

⁷Khava kani kha ajōng tlung pha, mihe’n ankasyempa Israel Pathen intheng hneng inthōpuina sik anjōn sik.

⁸Anmani’n ankut a antasyem maichâm chunga anmalung hlutmak jo ning, achangmak leh ankut themna chunga taksen mak jo hei ning, an-pathennu Asherah lim leh marim katui ro mankhutna maichâmhei chunga khan.

⁹Khava kani ahong pha, khōpui kahnettak a inkurkhum hei kha Hivhei leh Amor he’n Israelhei ṭit jâra antlân pha antadahlon khōpuihei kapōa andahlon sik hei khana sukset a andahlon sik hei.

¹⁰Israel, hlungpui kahrattak kapōa nakahuksōt leh nakahrung Pathen kha namahngi jo. Khava kanek a, ram hlop hei pathen kamukna sik a rahōn inthenga thingkung naling jo.

¹¹Tâk-kha nang in naling ning ajîng jîngkâra ajîk acher inum, ankara inlōk mak ning. Khana khan bōina leh damthei lo nat kachang sik.

¹²Ratha kahrat jât-hei kha tui-ôngpui in-nông kapōa, tuipui in-nông kalen tatak hei rasa kasōk kapōa, anrasa kasōk.

¹³Jât-hei kha tui in-nông inrang kapōa hmating kahlut hei, tâk-kha Pathen in arasei heia inle jo hei, hmebung panga ravut kapōa khana thlisip kâra sapôt atlen kapōa ahnong thlur jo hei.

¹⁴Khōhlei pha anmani’n mi anmanṭit ri hei, tâk jîngkâra chu anmani om mak jo hei. Niram kasuset rakip hei vângsetna kha khanga kati.