Read Komrem ISAIAH 2 Bible Online

ISAIAH 2 - Komrem bible

ISAIAH 2

¹Judah leh Jerusalem chungchânga Amoz sapa Isaiah hneng Pathen in ṭong apek kha hi kae.

²Akahong sik kani heia Bek-inn ngirna tlângbung kha tlâng rakip kâra a’nshângpen hongkachang sik, hmebung rakip amakhupet sik hei. Jât katamtak kahong inhlut sik hei,

³khana anmi he’n anhri sik, “Eini RŌNGPU hmebunga son ketou rih; Israelhei Pathen Bek-inna son, ama’n amantlo hnōm me ṭōn kha amanthei sik me; ama’n akadei hlam a khan eini kalôn sik me. Ajârchu Jerusalema inphut RŌNGPU mantheina kha kajōng; Ziona inphut amihei a’nbekpui hei.”

⁴Ama’n jât kalenhei kâra innâkna ṭong atanpek sik hei. Anmani’n anchemjâm hei kha lôngkhuma ankheng sik hei khan chu ankasei hei kha thing bâk thlâkna chemcha a ankheng sik hei. Jât-hei kha re katuk se nôk hêrmak jo hei ning, re tlona sik a intluk hêrmak jo hei ning.

⁵Tûnchu, Jacob sōn leh pârhei, RŌNGPU tapek me vâra khan eini se rih!

⁶Eh Pathen, Jacob sōn leh pâr, namihei kha nadahlon jo hei! Ram shung hi nisōtinga leh Philisti inphut dôi kachoi kasip sō jo. Mipui he’n ram hlop omchen anjui jo.

⁷Anram kha sana leh dangka kasip, khana ankarōi kha a’nchaina om mak. Anram kha shakor in kasip, khana anshakor gârihei kha a’nchai tik om mak.

⁸Anram kha limsyem kasip, anmani kut kalalen vânga antasyem neinâk-hei kha ankamuk hei.

⁹Mi rakip anhmai kamōk sik, khana inzak anratō sik. RŌNGPU, anmani rangei mandam mak hei roh!

¹⁰RŌNGPU hnuk natna, ratha neina leh lûrna inphut inphesōtna sik anmani tlâng hlungkare kâra khan khur ankhōra inthup sik hei!

¹¹Mihring inlensakna manbângna leh racham kase manhmangna sik a kani inkhat kahong sik. Khava pha RŌNGPU rōk kha choi manshâng sik kae.

¹²Khava ning khan akalen leh Chunghnung RŌNGPU’n ratha kahratpen hei seng, a’nlensak leh a’nṭhatsak hei seng asuk manhnem sik jo hei.

¹³Ama’n Lebanona cedar thing inshâng hei leh Bashan ram a sasō thing asuk manhmang sik.

¹⁴Ama’n hmebung leh tlângbunghei,

¹⁵inn chung inshâng rakip, rekur bang rakip amancham mantōk sik.

¹⁶Rakōng kalenpen leh akaṭhapen kapha’m tui ria amathlâk manhlut sik.

¹⁷Mihring inlensakna kabâng sik, khana mihring êngsetna hei seng kha amanbōi sik. Limsyemhei hi akhenga inhmangsō sik, khava ning RŌNGPU rōk kha choi manshâng sik kae.

¹⁹RŌNGPU’n ralei hi kanok mathlek sik a ahong pha, ama hnuk natna leh ratha hratna leh lûrna inphut inphesōtna sik a mipui he’n hmebung hlung karea hlungkhura khana khur anchoa inthup sik hei.

²⁰Khava kani ajongtlung pha, sana leh dangka vânga antasyem limhei kha anhlonsōt sik jo hei, khahei kha matîr leh bâk-hei hnenga hlonsōt pek kachang sik hei.

²¹RŌNGPU’n ralei hi kanok mathlek sik a ajōng pha, mipuihei kha ama hnuk natna leh aratha hratna leh alûrna inphut tlânsōtna sik a hmebung hlung karea hlungkhura leh khur shunga inthup sik hei.

²²Akathithei mihring chunga inngam nôk mak jo roh, Anmani hnemna heimo kae?