Read Komrem ISAIAH 21 Bible Online

ISAIAH 21 - Komrem bible

ISAIAH 21

¹Babylon chungchânga ṭong kha hi kae. Nêrdiram kapetan thlisip inher kapōa, ṭit ka-om tak ram a inphut suk manhmangna kha kahong sik.

²Êngset omchen, mikahōn leh mikasu inhmang hmangtalâra kahmua kae. Elam remi, re tlo roh! Media remihei, khōpuihei kha hlō jo hei ruh! Babylonhei khōdeng mantheina kha Pathen in amanchai sik jo kae.

³Hmangtalâra kahmu leh katheihei seng khan ṭitna, natna amannei eng, khava nat dân khachu nuhmei naiha phut ka-ang.

⁴Kalu inhaia kaṭi enga innok eng. Ke’n khōhlei ahong tlung kâr kahngâk hla, kha’num ṭitna teilo heite heirônsōt mak.

⁵Hmangtalâra khan sâktlâng inkhat le’ntluk; hmelâk-hei intungna sik a kapher anleipha. Anmani’n ansâk a an-in. Manhret manloa ṭongpekna he’n-ôn jo: “Ṭōnpui karônhei! Nanpho mantluk ruh!”

⁶Khava sōa RŌNGPU’n kahnenga ahri, “Se ina mi inkhat sōngkot berte chunga mi ka-en sik da roh, ama’n ahmu seng kha ṭong ahei mathlungna sik a manthei roh.

⁷Ama’n mihei shakor anhei chōnga 2-hnia akahong, khana mihei khan shakōrtung leh sharîngsei chunga anheihong ahmu’nchu kaṭhatak a a-enmadip sik hei kae.”

⁸Re kahngâk kangirpa kha heika-ônga, “Apu, kare hngâkna sûn leh jân kangir enga kae.”

⁹Manhret manloa, hinting anmani kahong jo hei! Shakor kachōng inhni-hnia re kahngâkpa khan ṭong kha amathlung jo, “Babylon kapûr jo! Antakamuk limsyem rakip raleia inchek-chaia ka-om jo hei,” ati.

¹⁰Kamipui Israel, nang gehu kapōa anleirachi che, tâk tûnchu Chunghnung RŌNGPU, Israel Pathena inphut kahei thei ṭong kahōi kha ke’n kaphông pek che kae.

¹¹Hivahi Edom chungchânga ṭong inhri inkhat kae. Edoma inphut mi inkhat in ahei bek enga, “Re kahngâkpa, heikhong mo inranga jân hi akathleng sik? Amanthei roh, heikhong mo inranga apha hi a’nchai sik?” ati.

¹²Ke’n kamasôn, “Jîngkâr kha hong katlung jo, tâk jân kha jōng katlung nôk sik. Nang in ṭong nader hnōm nôk eng inchu, he’nle ina ader roh.”

¹³Ama hi Arabia chunga ṭong inhri kae. Nangni Dedan mihei, khōhme kase rup-hei Arabia ramhânga rebuk intung hei,

¹⁴nanhnenga akahong tui kahre mihei tui pek hei ruh. Nangni Temah ram a mihei, rekatlânhei kha sâk leh in pek hei ruh.

¹⁵Mihei so ankathat sik leh ankakâp sik, chemjâm leh thea inphut, khana re thinathei rakip a inphut hringna sik a ahong katlânsōt hei kae.

¹⁶Khava sōa RŌNGPU’n kahnenga ahri, “Kum khat shungtak a Cedar phunghei lenna kha akatlang sik jo kae.

¹⁷The kachoihei kha Cedar mihei kâra akahrângpen hei kae, tâk-kha ahlekte rōk ka-om sik jo hei. Kei, Israelhei Pathen, RŌNGPU ke’n kahri jo kae.