Read Komrem ISAIAH 22 Bible Online

ISAIAH 22 - Komrem bible

ISAIAH 22

¹Hivahi Hmangtalâr Phaicham chunga ṭongrôn kae. Heimo akasōk jo? Heisik a mo khōpuia mihe’n innphu chunga rehōi antatlo?

²Khōpui pumpuia mipui rasa inhring nguingui jo, rasa tamna leh inpâk kare kasip a kae. Nanmi akathihei hi re intukna akathi changmak hei.

³Nanhlam kakeihei kha the sangkhat bek ankâp mak hma akatlânsōt heia antasurhei kae.

⁴Tûnchu kamipuihei thi jâra malung kana tak a ṭapna sik a kabinga adahlon ruh. Amathlem mak ruh.

⁵Hivahi Hmangtalâr Phaichama khan ṭit-inpirna, hmaimôkna, leh inhmakna pha inkhat kae, khana Chunghnung RŌNGPU’n eini chunga ajōngtir jo kae. Khōpui kurbang kachim inthla jo, inthōpuina sik ông rasa tlâng inthônga kae.

⁶Elam ram a remi he’n shakor anhong chōng, sai leh the leh kahong jo hei. Kir ram a remi he’n anphō leh inrin jo hei.

⁷Judah phaicham ram ṭhatna hmun a shakor gâri kasip jo hei; shakor chunga remi he’n Jerusalem kekot hma kangir jo hei.

⁸Judah rekur rakip kakōisō jo hei. Khavakha ahong sōk pha, nang in re hmangchâk-hei kha akasyem heia inphut heichoi roh.

⁹Nang in Jerusalem bang inset syem manther nôk sik hmun kha nahmu sōt. Nang in Jerusalema inn rakip na-en lele hei khana hlung ṭhahrep chu naṭhōt heia khōpui kur inset syem mantherna sik a hlung nalo hei. Khana tui da theina sik a,

¹¹nang in khōpui shunga khan tuikhur marōa inphut ajōng kalōng tui dana sik a tuikōk nasyem. Tâk-kha nang in tenlaia inphut hihei rakip a’ntluk, hinga tlosōt sik a akatlo Pathen khachu heite donmak che.

¹²Chunghnung RŌNGPU’n akaṭap sik leh ṭajai kasui sik a, khan chu lu kavo leh borapōn akasi sik a abek chei.

¹³Khava kanek a, nan manuia rehōi nantlo. Sâk sik a kemōng leh se nanthat a, khan chu ju nan-ina kae. Nangni’n nanti, “Eini’n sâk rih, in rih! Jînga chu kathi sik jo me.”

¹⁴Chunghnung RŌNGPU Akahratpen in kahnenga kaṭonga ahri, “Hiva ṭhatmak hin, anhring lai seng rangei mandam inpek hêrmak hei ning. Kei, Chunghnung RŌNGPU, Akahratpen ke’n kahri jo kae.”

¹⁵Chunghnung RŌNGPU, Akahratpen in Shebna hneng se roh tia amanthei eng, reng innshung akatintapa hneng hinga vati roh,

¹⁶“Nang tu eng mo kae, tia andon che? Tlâng panga hlung vit a nabinga thlân syemna sik heiratha mo nanei?

¹⁷Nang apui karôn inkhat kachang thei che, tâk RŌNGPU’n ahrut chea ahlon sōt sik jo che.

¹⁸Ama’n nang kângtrum inkhat kapōa ahrut sik che, khana ram kalendet inkhat ting ahlon sik che. Khana khan na’nlensak pui shakor gârihei sira kathi sik jo che. Nakapupa innshunga sik mater ka-om tak inkhat che kae.

¹⁹RŌNGPU’n nang naṭōn hmun a inphut alosōt sik che khana a’nshângpena inphut akei mathlâk sik che.

²⁰RŌNGPU’n Shebna hneng ahri, “Hivahi asōk pha, ke’n kasōkpa Hilkiah sapa Eliakim kabek sik a mi kahei tir sik.

²¹Ke’n naṭōn rônna khōnkir leh na’nretna hei ama hneng kamanvon sik, khana naratha neina hei seng kha kapeksō sik. Ama kha Jerusalem leh Judah hei pa kapōtak a ka-om sik.

²²Ke’n ama kha David sōna rengpa thōitak a ratha neina rakip kapek sik. Ama’n inlôikhômna inn chabi kha anei sik, ama’n amahlang kha tûte’n kirmak ning, khana ama’n akir kha tûte’n mahlang mak ning.

²³Ke’n thingtum phun manhnet kapōa kaphun manhnet sik, ama innshung akhenga sik kajana kung hongkachang sik.

²⁴“Tâk-kha a-innkō shunga mihei seng kha ama chunghrikna hongkachang sik hei. Be leh kōkleihei kōikima a’nkhei hei kapōa ama chunga inhngapet sik hei.

²⁵Khavakha asōk pha, kōikim kahnettak a a’nhemkir kha ho’nthlōt sik a kha katla sik jo. Khan chu achunga a’nhngat heirakip hei inchaina kha kachang sik jo.” RŌNGPU’n hing’hin ahri joa kae.