Read Komrem ISAIAH 24 Bible Online

ISAIAH 24 - Komrem bible

ISAIAH 24

¹RŌNGPU’n raleichung hi asuk manset a akarōk a ada sik kae. Ama’n raleichung hi amalet a achunga ka-om mihei hi inchek inchaidâk sik jo hei.

²Mi rakip in-ang et a mahâmset anchen sik, thempuhei leh mipuihei, sōk leh akapu, a’nchohei leh akajōrhei, a’npûk hei leh akabat hei, sara leh akaneihei anchen in-ang et sik.

³Raleichung hi suk manset leh inhmanga ka-om sik. RŌNGPU’n ahri jo kha atlosōt sik kae.

⁴Ralei hi kachâr jo, invōi jo; raleichung pumpui ratha hong katlang jo; ralei leh bōirōk hong thōimak jo.

⁵Mihring he’n Pathen dânhei ansukkhōia khana ahei tik a aka-om sik intepna anjuimak jâra raleichung anmannim jo.

⁶Khava jâra Pathen in raleia khomâk asâmkhum jo. Mihring he’n anṭōntlo dungjuia antachen jo kae. Mihei hi katlôm det-det a kahring sik hei.

⁷Vomhrui hruijâm invōi hei, khana ju inrik hêr jo. Vōi khat inpâkna aleikachen rakip kha tûnchu inreng jo hei,

⁸inpâkna khōngpui leh serângdâr mahring kahōi hei seng kha’m kabâng jo.

⁹Inpâk a ju-in hlasak inti kha’m om nôk mak jo; tûte’n aju tuina kha hōipui nôk mak jo hei.

¹⁰Khōpuia khan heirakip inhmakpet jo, inhukna sik a mihe’n an-inn kot inkirkhum jo hei.

¹¹Mihei khan ju a-om mak jâra hlampuia kapeng hei. Hōina kha ahei tik chen sik a kasesōt jo; ram a inphut hnongsōt jo kae.

¹²Khōpui kha inhmang jo, khana khōpui kekot-hei kha’m sukmathlek jo hei kae.

¹³Hivahi vânhnōi ralei jât rakip chunga ahong kasōk sik kae. Hivahi hleithlō kara khôm inchaina kha ka-ang sik, olive kung rakip a kara vōk maṭhisō leh khana vomhrui kara hnung kakhôrpen ṭhetna kapō kha kae sik.

¹⁴Khava khana akahring hei khan inpâk hla ansak sik. Tlaitlâk tinga ka-om he’n RŌNGPU kha heituk-hrep a akalen mo ti kha anhrisōt sik,

¹⁵nisōtinga ka-om hei khan ama anchoi ka-ân sik. Tui-ôngpui panga ka-om he’n RŌNGPU, Israel Pathen kha anchoi ka-ân sik.

¹⁶Raleichung ram kahla pena inphut, jât kadik he’n Israel manpâkna hla antasâk kha nithei sik. Tâk-kha kei sik a inhōrna heite om mak! Ke’n kaman hmangsō jo! Mikahōn he’n anhōn ṭhak, anmi hōnna kha inhrek chet-chet a kae.

¹⁷Kahri hi rangei ruh, mi rakip! Hinahin ṭit ka-om tak hei, khur inthûk hei, khana châng he’n anhngâk ṭhak chei.

¹⁸Tu achang inum ṭitna inphut akatlân kha khur kōk a katla sik, khur kōk a inphut akatlânsōt khan chânga a’n-ôk sik kae. Chunga inphut khō jōng kasur inbun sik, khana raleichung kunghei innok sik hei.

¹⁹Ralei hi akatlir khōia ajin kakōia inher khōi sik.

²⁰Mihring ju inrui kapōa raleichung hi innok sik, khana thlipui kahrâng in thlâmber atlen kha ka-ang sik. Raleichung hi asetna’n amanhrik jo; akei mathlûk sik, khana thōisōt torhêr nôk mak jo ning.

²¹RŌNGPU’n bōirōk chunga ratha kaneihei leh raleichunga vaikarônhei karâkna apekna sik pha lakahong sik.

²²Pathen in renghei seng kha khur kōk a khum mihei kapōa abek mantûp sik hei. Anmani karâkna sik pha atluk mak hma seng kurkhum a akhum sik hei.

²³Thla kha inthim sik jo, khana kani kha’m vârmak jo ning, ajârchu Chunghnung RŌNGPU kha Reng kachang sik jo. Ama Zion Tlâng chunga Jerusalema vai arôn sik jo, khan chu mipui hlamkakei he’n alûrna kha anhmu sik jo.