Read Komrem ISAIAH 25 Bible Online

ISAIAH 25 - Komrem bible

ISAIAH 25

¹RŌNGPU, nang ka-Pathen che kae; ke’n nang kaṭit kakaja sik che, khana narahming kachoi ka-ân sik. nang in ṭōn inlak-hei natlo jo; tenlaia nang in naleimantluksa jo hei kha taksen theitak a natlosōt jo hei.

²Nang in khōpuihei kha a’nhmanga nada hei anrekurhei nasuk manhmang pek hei. Kan-indōipuihei tasaksōt innpuihei ahei tik a sik a om mak jo hei.

³Ratha kahrattak jât-hei khan nang anmanpâk sik che; Mi kakhôk êngkase jât he’n khōpuia nang anṭit sik che.

⁴Sara inṭangpui kaneimak he’n nahnenga hong katlân hei khana inrengna pha inhukna annei che. Thlipui thlihrem kâra leh sûn kani kalum thōia in-ungna napek hei. Mi kakhôk he’n phebi thlipui kapōa mi anbuhlu hei,

⁵Tâk-kha, RŌNGPU, nang in kanre hei namandai hnger hei; nang in mi kakhôk hei ka-ông rasa kha namandai hei, sumtuk in kanisat amandai kapōa.

⁶Hina Zion Tlâng chunga Chunghnung RŌNGPU’n raleichunga jât rakip sik sâktlâng amantluk sik, akatuipen thlai leh ju sâktlâng kae.

⁷Hinahin ama’n manhret manloa jât rakip malung inrimna sumtuk kha ahliksōt sik jo.

⁸Chunghnung RŌNGPU’n thina kha ahei tik a sik a asuk manhmang sik jo! Mi rakip hmit-rathli ahni manhi pek sik hei, khana raleichung pumpuia amihei inzakna kha alosōt pek sik jo hei. RŌNGPU ama khet in ahri jo kae!

⁹Hiva omchen hi asōk pha, mi rakip in anti sik, “Ama hi ni-Pathen kae! Eini’n ahnenga taksenna ninei. Ama hi RŌNGPU kae ahnenga taksenna ninei, khan chu eini inpâk me, kahōi me, ajârchu ama’n ahuk mea kae.”

¹⁰RŌNGPU’n Zion Tlâng ahrung sik, tâk Moab mihei khachu sapôt kha bonthlōk kâra chōn manhlut kapōa, achōn kahnur sik kae.

¹¹Anmani kha tui kajâp he’n ankut antajâp kapōa ankut bân ankalâng sik, tâk RŌNGPU’n asuk manhnem sik hei, khana ankut kha inthōpui kasea anmathlâk sik jo.

¹²Ama’n Moab-hei rekur kha abang katlunga asuksetpek sik hei, ravut amanchang sōpek sik hei.