Read Komrem ISAIAH 26 Bible Online

ISAIAH 26 - Komrem bible

ISAIAH 26

¹Judah ram a mipui he’n hiva hla ansakna kani kha lakahong sik: Keini khōpui kahnet! Pathen khet in akur kha ahngâk!

²Khōpui kot-hei mahlâng ruh taksen ka-om jât leh ṭōndik katlo jât-hei hlutna sik.

³RŌNGPU, nang in pui katluk lung mōngna pek hei roh mandonna kahnet a kaneihei leh nahnenga taksenna kaneihei hnenga.

⁴RŌNGPU kha ahei tik a taksen ruh; ama’n ahei tik a ahrung sik me.

⁵Ama’n a’nlensak hei kha amannêm hei; An-omna khōpui kangar kha asuk manhmang, ankur bang kha asuk mannōia vaiphin amanchang pek hei.

⁶Suk manrima leika-om mihei khan tûnchu achunga kalôn jo hei ankepha thōia, anchōn rachi jo.

⁷RŌNGPU, nang in mikaṭhahei sik a hlam namanne pek hei; anhlam hro namancham pek hei.

⁸Keini’n nalungdo kanjui, khana nanga inhōrna kannei; kantamadu heirakip kha nang che kae.

⁹Jân a kamalung pumpui in karangei che; raleichung leh amihei ṭong natan pha, anmani seng in ṭongtan kadik kha anmanhret sik jo.

¹⁰Mikaṭhamak-hei chunga nalungset he’num, anmani’n akadik tlona sik manhret mak hei. Hiva mikadik-hei ram shunga kapha anmani’n ṭōn kadikmak antloṭhak; nalen nahratna manhret hnōm mak hei.

¹¹Nang inrepui he’n karâkna napek sik hei kha manhret mak hei. RŌNGPU, inzakna pek hei roh, inrenghei rasoh; nang in namantluk karâkna kha khōdeng theipui hei rasoh. Namihei heituk a nalungset hei mo ti kha manhmu hei roh.

¹²RŌNGPU, nang in keini khangsōtna napek sik ung; keini chen heirakip hi nang ṭōntlo kara kae.

¹³Rōngpu, kan-Pathen, milak he’n kanchunga vai anleirôn tâk nang rōk kan-RŌNGPU che kae.

¹⁴Tûnchu anmani kathi sik hei, hring nôk mak hei ning. anrathla kha hong thōimak jo ning, ajârchu nang in nakarâk hei khana nasuk manhmang jo hei. tûte inkhat in anmani mandonsōt nôk mak jo hei ning.

¹⁵RŌNGPU, nang in kanjât hi namankhangsōt, aramri sak leh thlânga nakakek manlen, hivahin nang ṭit leh kajana arôn sōt a kae.

¹⁶RŌNGPU, nang in namipuihei karâkna napek hei, inkōipuma nahnenga ander che.

¹⁷RŌNGPU, nang in namanṭap naman-ông ung, naiha phut laia nuhmei inkhat nat kapōa.

¹⁸Keini kana unga kande-hla, kha’num kanta matetsōt heite om mak. Kanram sik a torna heite neimak ung; Keini heite tlosōt mak ung.

¹⁹Kanmi aleikathi jo hei kha hongkahring nôk sik hei! Antaksa hei hongkahring nôk sik. Anthlâna aleikaje hei seng kathōisōt sik hei khana inpâk hla anhongsak sik. Radaitui akadi rik-rak in ralei amahlimseng kapōa, RŌNGPU’n kasôttak a aleikathi jo hei kha amanhring ther nôk sik hei.

²⁰Kamipuihei, nan-inna se ruh, nankot inkamsi ruh. Pathen hnuknat athlengsō mak kârseng, pha bongkhat inthup ruh.

²¹Raleichunga mihringhei ansetna jâra karâkna sik RŌNGPU kha marvâna a-omna inphut kajōng sik. Raleichunga marûk a mikathat-hei inphông sik hei, khana ralei in mi antathat hei kha thupsôt mak jo ning.