Read Komrem ISAIAH 27 Bible Online

ISAIAH 27 - Komrem bible

ISAIAH 27

¹Khava kani ning khan RŌNGPU’n Leviathan, a’nze lele leh a’nher lele rihren tuipui shunga aka-om takpum kalen kha karâkna sik leh thatna sik a ratha kaneitak mithatna achemjâm kha ahmang sik jo.

²Khava kani ning khan RŌNGPU’n avomhrui rahōn chunga malung tlaina ṭong ahri sik,

³“Ke’n rahōn hi ka-en ṭhak a tui kachep ṭhak. Tûte’n anmanset makna sik ke’n asûn-ajân kahrung ṭhak a kae.

⁴Ke’n hiva vomhrui rahōn sik a kahnuk kasôttak namak jo ning. Indōipui sik a rahling leh theimi an-om inchu, khan chu khahei kha karo mankângsō pet sik hei.

⁵Tâk-kha kami indōipui mihei khan kei tahuk sik anmadu’n chu, kei leh inchamna syem hei rasoh. Ôk, kei leh inchamna sik syem hei rasoh.”

⁶Akahong sik kania khan Jacob sōn leh pâr, Israelhei kha thingkung inkhat kapōa rajung anṭhō sik, hong kacher sik heia kha hong kapâr sik hei. Raleichunga ankara in kasip sik.

⁷RŌNGPU’n indōipuihei kapōa karâkna inhnaktak a Israelhei chunga lapek phungmak, khan chu anmani jahrep manhmang mak a kae.

⁸RŌNGPU’n amipuihei kha miram a aleitirsōt hei. Ama’n nisōtinga thlipui inhnak alei mantlen hei.

⁹Tâk-kha Israelhei setna khachu, Khōvelhei maichâm kha ansuk mandi sōa, marim katui maichâm an-om mak jo pha khana Asherah pathennu limhei an-om mak jo pha rōk khan rangei mandam kachang sik.

¹⁰Kur kekhum khōpui kha sukset a ka-om jo. Khōpui kha ramhâng kapōa dahlon jo kae. Shahei phi sâkna leh jena ramhâng kachang jo.

¹¹Thing bâk-hei kha hong kachâra katlek jo hei, khana nuhmei he’n thing ti sik a anchom mantûp jo hei. Ajârchu mipui he’n heite manhret mak hei, ankasyem Pathen in lungset a rônmak hei ning khana maritna malârmak ning.

¹²Khava kani ning khan, Euphrates tuidunga inphut Egypt ramri katlunga, RŌNGPU’n amipuihei, inkha-khat a, sarahmu leh sarasi ṭhen kapōa aṭhen mantûp sik hei.

¹³Khava kani ahong tlung pha, Egypt ram a leh Assyria ram a Israel sahei rekahringa antakei hei seng bekmalena sik a Pengkun inkhat intum sik. Anmani kahong sik heia kha, ahmebung intheng Jerusalema RŌNGPU kha ankamuk sik.