Read Komrem ISAIAH 28 Bible Online

ISAIAH 28 - Komrem bible

ISAIAH 28

¹Israel rengram kha inhmang jo: Alûrna kha, ahlam kakei ju-inruihei ta’nkhu reipâr lenlukhu kapōa kachia kaṭōi inthla jo. Anta inlensakpui anlu hei kha thai marim katui inhnam hei, tâk khana khan kaje jo hei, inrui heia kathi jo hei.

²RŌNGPU’n ratha kaneitak akahrat anmani kabuhlu sik a a’ntluk mi inkhat anei, thlipui, khō leh kahre inthō inkhat kapōa, khō kasûr inhnak kapōa, tuitlân inhnak leh heirakip akachûmsō kapō mi inkhat kae, khana raleichung asuksetsō sik kae.

³Khava ju inrui hlamkakeihei inlensakna kha kea chōn kahnur sik hei kae.

⁴Khava a’nlensak hlamkakeihei inlensakna kha hmapena theichang inra, anhminlim leh anṭhōt a a’nsâksō bât kapōa katlang sik jo.

⁵Chunghnung RŌNGPU kha ami alakahring senghei sik a lûrna lenlukhu kapō akachang sik kani kha kahong jo.

⁶Ama’n ṭongkatanhei hnenga akadik a ṭongtan theina lungthim lungvâr leh re kabuhlu heia inphut khōpui kekot kahrunghei kha inngamna apek sik hei.

⁷Sânkathemhei leh thempuhei kapha’m ju inrui heia anhek anhek a kalôn hei. Anmani’n ju an-inreia inhmak heia inpai inthlûk heia kae. Sânkathemhei kha ju inrui rei heia Pathen in hmangtalâr ajōngtir hei kha manhret mak jo hei, thempuhei kha inrui rei heia ṭongtan hi tanthei mak jo hei.

⁸Ani’n-ongna dokhânghei kha anmalōk kasip sō jo, hmun inthengneng inkhatbek damak hei.

⁹Anmani’n kei chunga inphin hei. Anmani’n anhri, “Ama mi mantheina kha tu’n mo amandon pek sik? Ama ṭonghri kha tu’n mo arangei pek sik? Naidông veia alakahaibi hei sik rōk a akaṭha hrep kae!

¹⁰Ama’n eini ṭongrahme vânga, ahlam ahlam a, ṭongrup vânga manthei sik arei me?”

¹¹Nangni’n kei ṭonghri nanrangei mak inchu, nangni ṭongrup inthei sik a Pathen in ram hlop ṭong kajôm hei ahmang sik hei kae.

¹²Ama’n nangni nankhenga lung mōngna leh châmhngatna apek jo chei, tâk nangni’n ama ṭong rangei hnōm mak chei.

¹³Khava jâra RŌNGPU’n ṭongrahme vânga, ahlam vâng ṭongrup vânga amanthei sik jo chei kae. Khana nangni nanke thon rakip a inpai inthlûk sik chei. Insukhok sik chei, chânga in-ôk sik chei, sōk a khum sik a ankei sik chei.

¹⁴Tûn Jerusalema ṭong inngeimak nang, mipuihei chunga vaikarôn. RŌNGPU tahri hi rangei roh!

¹⁵Nang thina leh kathi vânhnōi leh inhnōmtōna nanei jo jâra inlensak che. Insuk inhmangna ahong pha aṭhensōt sik eng tia inngam che, ajârchu khava maleisei leh mihōnna chunga in-ngai chea kae.

¹⁶Tûn, hivahi Chunghnung RŌNGPU tahri kae: “Ke’n Ziona innhmun kahnettak leh kangar tak inkhat kada. Khava shunga arakira hlungpum kada, khava chunga ṭong hi inzet, ‘Taksen kahnet hi dehratna’m kae.’

¹⁷Ṭongtan kadik kha innhmun kahnet sik a temantōkna hrui kachang sik, khana malung intheng kha anṭōn enmansinna thirhlom hrui kachang sik.” Na’nhngatna maleisei rakip kha thli leh kahre inthōna khan asêm manjōng sik jo, khana nang inhrungna kha tuikalen in asuk manhmang sik jo.

¹⁸Thina leh inhnōmna nantasyem kha la’nhmang sik, khana thina vânhnōi leh inhnōmtōna kha senathei mak jo ning. Suk manrimna ajōng pha nangni akatōm sō sik jo chei.

¹⁹Nangni jîngkâr katai ave-avea arachâk sik chei. Nangni’n sûn leh jân nantade sik kae. Pathena inphut ṭongpek ther ajōng katlung rakip kha ṭitna kachang sik.

²⁰Nang kha, ṭongchîk a mipa kapōa, je sik a a’ntlukna jekhum kabongkek chunga inthlong theimak, ajânsi kasin reia insi theimak ti kha napō sik.

²¹RŌNGPU’n Perazim tlânga leh Gibeon phaia re aleitlo kapōa, ama’n tlo sik a amandon kha, aṭōn kha, a’nlaktak achang inum, atlosōtna sik a re atuk sik. Ama aṭōn inlak kha ama’n pui amathluk sik.

²²Ke’n gîkna kapek chei hi manuisōmak ruh! Nangni’n nanmanuisō inchu, nangni sik a tlânsōt hong intakdet sik. Ke’n, Chunghnung RŌNGPU ṭong mathlâk, ram pumpui suk manhmang sik kha kathei jo.

²³Heimo kahri hi rangei ruh; ke’n kamanthei chei hi malung kahlut a mandon ruh.

²⁴Hlei kathlō inkhat in ahleia hmuchi lingna sik hlei akhōi ṭhak a vor sik a a’ntluk ṭhak omphung mak.

²⁵Ama’n ralei akhōisōa reihing leh jira, anse-hleina hmuchi avora kae. Ama’n Gehu leh bunim hei avor hei, khana hlei hnōmkea hmuchi ralak atuk a kae.

²⁶Ama’n aṭōn kha heikhonga tlo sik ti amanhret, ajârchu Pathen in ama amantheia kae.

²⁷Ama’n heituk ennum reihing hmu leh jira hmu kha hembung vâng vōkmaṭhi hêrmak, khava kanek a ama’n aratuk hrep saṭai vâng avōk maṭhia kae.

²⁸Ama’n Gehu kha avōk ṭhak a suk rabun mak, hmuchi kha suk makhōiloa ama’n gâri kha achunga atôra maṭhi sik kha amanhret a kae.

²⁹Hiva singna rakip hi Chunghnung RŌNGPU a akajōng kae. Pathen in amantluk kha singna kae, khana khahei kha ahei tik a hmesōna anneia kae.