Read Komrem ISAIAH 29 Bible Online

ISAIAH 29 - Komrem bible

ISAIAH 29

¹Pathen maichâm, Jerusalem khet kha inhmang jo! David rephōr leisyemna khōpui kha inhmang jo! Arehōi leh areveina kha kum khat leh kum hni hong sona thleng hi rasoh,

²khava sōa “Pathen maichâm” inti khōpui chunga inrengna ahei rôn manhlut sik. Khana khan in-ôina leh ṭapna ka-om sik, khana khōpui seng kha thisen in akatōm sō jo maichâm ka-ang sik.

³Pathen in khōpui kha akakekim bit a, akake khuma abuhlu sik.

⁴Jerusalem kha ralei thōia inphut ṭongsōtna sik katlo rathla kaṭhamak kapōa, vaiphin kâra inphut rasa heikasōk sik.

⁵Jerusalem, nachunga nakabuhlu ramlak mi rakip hei kha ravut kapōa sêm manjōng kachang sik hei, khana anremi ṭit inper aka-om hei kha sapôt kapōa kajongsōt sik hei. Mandon phâkloa, inrangtak a,

⁶Chunghnung RŌNGPU’n thlikhō inphe leh lingnu innok leh inṭhōia ahuksōt sik che. Khan chu thlipui leh hmei kasûk ajōngtir sik hei;

⁷khava pha Pathen maichâm khōpui kabuhlu jât remihei seng, anre hmangchâk leh anrevon rakip rahmang kapō, jân a heikhat nihmu kapōa inhmang sik jo hei.

⁸Jerusalem kabuhlu sik a a’ntûp jât-hei seng kha, bu kahngōi inkhat in arahmanga bu asâk a ahong inṭhang pha avon akaṭâm kapō, achangmak leh tui kahre inkhat in arahmanga tui alei-ina ahongṭhang pha, akadang aleikachâr kapō kha kachang sik.

⁹Nachôndân kha tlo ṭhak ina mikamo chang roh! Tlo ṭhak ina hmit kachoa om roh! Ju rahme khat inloa avet-avaia kalôn-invai chang roh!

¹⁰RŌNGPU’n amanngui jo che, akaje hnger sik a amantluk jo che. Sânkathemhei kha mipui hmit akae sik hei kae, tâk-kha Pathen in anhmit akahuksi pek jo hei.

¹¹Sânkathemhei tasânsōt hmangtalâr rakip kha nang sik inthup sik jo, khavakha lekha kazesi mêrchîkna mahôr katetkhum ka-ang sik. Nang in lekha katei thei inkhat hneng atei pek roh natinum, hivahi mêrchîkna mahôr a’ntatkhum jâra teitor mak ning ati sik.

¹²Nang in lekha katei theimak inkhat hneng atei pek roh natinum, heikhonga tei sik mo manhret mak eng ati sik.

¹³RŌNGPU’n ahri, “Hiva mihe’n kei kamuk sik a anti, tâk anṭonghri hei kha ajâr kase kae, khana anmalung kha ahlop khat a ka-om. Anbek-oina kha heite changmak; tâk anmalunga antachîk hnâm mihring dân leh chona ngai hei kha kae.

¹⁴Khava jâra ke’n anmani chunga manhret theiloa abân bâna vōk heia kamaṭhit sik jo hei. Mikasinghei kha mikamoa kamalet sik hei, khana an-invakna hei kha hmangna kase kachang sik.”

¹⁵Anṭōn mantluk RŌNGPU hneng akathup hei kha inhmang jo hei! Anmani’n anṭōn kha tûte’n manhret mak, hmumak hei tia, anṭōn mantluk kha marûk a antlosōt a kae.

¹⁶Anmani’n heirakip akhup alet a antlo. Matlak leh be kasyempa kha kho jôk mo apui karôn kachang? Mi inkhat tasyem neinâk khan akasyempa hneng, “Nang in asyem mak che,” atithei sik mo? Achangmak leh, “Nang in natlo kha manhret mak che,” atithei sik mo?

¹⁷A’nhri ri kapōa, hmalaia ratuhmang kha hleihmun hongkachang sik, khana tuna hleihmun hi ratuhmang kachang nôk sik hei.

¹⁸Khava kani ajōng tlung pha, kōr kaset khan lekharabu inhnaktak a’ntei kha athei sik, khana hmitkacho khō inthimpak a aleikahring khan, ahmit amahlânga khō ahmu sik jo.

¹⁹Sara leh a’nsinsak he’n a’ntheng Israel Pathen, RŌNGPU’n apek hei hōina kha anlahmu nôk sik a kae.

²⁰Hivahi Pathen kahnōise hei leh mikasuk inrim hei inchaina kha kachang sik. Khana mikaset rakip suk manhmang sik hei kae.

²¹Mikahōnhei, ṭōnse katlo chunga karâkna akapek mak hei, mikadik-hei sik ṭongdik tanna sik pha maleisei kahrihei, Pathen in alasuk manhmang sik hei kae.

²²Khava jâra tûn khōdeng theina inphut a Abraham kahuksōt Israel Pathen RŌNGPU’n ahri, “Kamihei, nangni pha kasôttak hmeset inpek mak jo ning, nanhmai kha inzak jâra dângper mak jo ning.

²³Ke’n kapek chei naidônghei nanhmu pha leh, kei hi Israel Pathen intheng eng ti nanmanhret sik jo. Nankaja sik eng khana kei kaṭit a kangir sik chei.

²⁴Mikamo he’n manhretna sik inthemchûk sik hei, khana ahei tik a bei katam akachōr hei kha mantheina khan inpâk sik jo hei.