Read Komrem ISAIAH 3 Bible Online

ISAIAH 3 - Komrem bible

ISAIAH 3

¹Tûn, RŌNGPU, Chunghnung RŌNGPU’n Jerusalem leh Judah a inphut mihei inngaina rakip hei kha alosōt sik jo hei. Ama’n anbu leh antui,

²anre kahrânghei leh anremihei, anṭong katanhei leh ansân kathemhei, antla kasânhei leh anvai karônhei alosōt pek sik hei.

³Remihei leh michamhei hlamkakeihei khana ram vaikarônhei leh dôi kathem, mi kathlim heirakip alosōt sik hei.

⁴RŌNGPU’n mihei kha pui alakatluk mak pase naihei vai amanrôn sik hei.

⁵Inkhat in inkhat chunga hnemna anjong et sik. Khangdông he’n an-upahei kajana neimak hei ning, khana mi kahnemmak he’n anchunga mihei kajamak hei ning.

⁶Phung khat shunga mihe’n ankâra mi inkhat ankadeia ahnenga, “Nang in pōn leh der si sik bekchu nalanei, hiva inchok laitak hin kanhlam kakei inṭang roh,” anhongtina pha kahong sik.”

⁷Tâk-kha ama’n amasôn sik, “Kei chang tor mak ning! Ke’n inthōpui tor mak chei ning. Sâk leh in, si leh kei inchûngmak eng. Nanhlam kakei amanchang mak ruh.”

⁸Kadik, Jerusalem hi inhmang jo! Judah hi kapûr jo! Heirakip antatlo leh antahri hi RŌNGPU dōina kachang jo; anmani’n inphôngtak a Pathen khet kha inzakna anpek jo.

⁹Anmalung dikmak in anmani adōi sik hei. Sodom mihei kapōa, inphôngtak a kaset hei. Anmani inhmang jo hei, hivahi anbinga anta he’n rôn sōt kae.

¹⁰Mikadik-hei kha kahōi sik hei, anmani sik a heirakip inzen sik. Anṭōn tlona chunga inpâkna anchenpui sik.

¹¹Tâk-kha mikaṭhamak-hei khachu inhmang sik hei; mihei chunga antatlo kha anmani chunga intlo sik a kae.

¹²Sêrpûk kasem he’n kamihei ansuk manrim hei, ansêr inpûk hei kha’n anhōn heia kae. Kamihei nanhlam kakei he’n hlamlea anṭhōi chei, khava jâra khonting mo ahe’nle sik chei ti, manhret mak jo chei.

¹³RŌNGPU’n aṭong tanna sik a intluk; amihei ṭong katan sik a intluk a kae.

¹⁴RŌNGPU’n amihei hlamkakeihei leh an-upahei kha ṭongtan hmun a aṭhōi hei. Ama’n hiva masetna hi anei hei: “Nangni’n vomhrui thei rahōn nanchom, khana misara khōdeng katheihei neinâk nanchoma nan-inna nanbuk mansip.

¹⁵Nangni’n kamihei suk kahrot sik leh sara heia inphut hnemna jongna sik ratha neimak chei. Kei Ratha kaneipen, Chunghnung RŌNGPU’n kahri kae.”

¹⁶RŌNGPU’n ati, “Enruh, Jerusalem nupuihei heituk-hrep a a’nlensak jo hei mo! Chungting anhnar anmantanga kalôn hei. Ahei tik a mihei keimathlâkna sik a antlo. Inṭhatsak a ke anchoi, ankea paisereng rasa anmasōk a kae.

¹⁷Tâk-kha ke’n karâkna kapek sik hei, ansam kavo mankek sik, lu kakek a kada sik hei.”

¹⁸Jerusalem nupuihei inlensakna seng kha RŌNGPU’n alosōtpekna sik kani inkhat lakahong sik — ankea paisereng, ansamkir hei, anhrak a anta-or hei

¹⁹ankut a zakser hei seng. Anhmai makhuna hei,

²⁰anlukhu hei; anbâna leh ankhôna anmi thlimna dôibôm antakhit hei,

²¹ankut a kutkhi leh anhnara hnarton hei alosōt pek sik hei;

²²anpōnsi derkeihei, zakkō kalen, pōnsi, ansêrkōk hei;

²³antaksa inhmuthei anpōn leh ander hei, pōn innem; hrak-or pōn leh anlua hmai makhuna kaseitak a anta’n-or hei kha alosōt pek sik hei.

²⁴Marim katui antahmang kha marim kase kachang sik; ankhôn khitna akaṭha kahlanga hrui inhrat vâng ankhôn an-inkhit sik; ansam kaṭha kahlânga anlu kakek sik, pōn kaṭhahei kahlânga, pōnse vâng inret sik hei, anṭhatna hei kha inzakna hongkachang sik jo!

²⁵Khōpuia mipuihei kha, kadik, akahratpen mihei kapha, rehmun a kathi sik hei.

²⁶Khōpui sōngkot khan ṭajai asuia ka-om sik, khōpui kalen khet kha’m nupui akarōk a raleia a’n-ong kha apō sik.