Read Komrem ISAIAH 30 Bible Online

ISAIAH 30 - Komrem bible

ISAIAH 30

¹RŌNGPU’n ahri jo: “Judah vaikarônhei inhmanghei ajârchu anmani’n an-inrepui eng. Anmani’n kei tamantluk mak ṭōnhlam anjui, khana ke’n kamadumak inhnōmna ansyem, setna chunga setna anbuk a kae.

²Anmani’n kei hneng derloa inthōpui kader sik Egypt a kase hei. Egypt hei tahuk sik anmadu, Egypt rengpa kha antaksenna kae.

³Tâk-kha rengpa kha inthōpuina ratha heite neimak ning, khana Egypt hrungna kha suk inhmangna ting inchai sik.

⁴Anpalâi hei kha Egypt khōpui Zoan leh Hanes anheitlung jo ravâng,

⁵Judah mihei kha insir sik hei, ti chu inthōpuina sik anmadu pha, ankadon mak sik jât, taksenthei kachangmak jât anmani’n anvataksen hei jâra kae.

⁶Hivahi thlâng intong nêrdiram ramsha chungchânga Pathen ṭongphông kae: “Palaihei kha ṭit ka-om ramhei, shabakkai omna, hrise omna, khana akajōng thei rihren hei omna a khōhme kase hei. Anmani’n shakōrtung leh sharîngsei hei kutchoi mankatam anmanrôn heia inṭangpui ankapetor mak jât-hei hneng kase heia kae.

⁷Egypt hei tahei pek inṭangpuina kha hnemna kase kae. Khava jâra ke’n Egypt kha arahming hlop kaphō, ‘Tûr kaneimak Rihren’ RŌNGPU’n kati jo.”

⁸Mipuihei kha heituk a akaṭhamak hei mo ti kha mazetna rabu a-omthangna sik a, heimo antapō ti kha lekharabu inkhat a kasunna sik a Pathen in amanthei eng.

⁹Anmani ahei tik a Pathen andōi ṭhak, ahei tik a anmalei kasei, ahei tik a RŌNGPU ṭong mansena rangei hnōm mak hei.

¹⁰Anmani’n sânkathemhei kha kadai hngera an-omna sik a anhri. Anmani’n anti, “Kanhnenga akadik kha hrimak ruh. Keini tathei hnōm kha ahri pek ruh. Keini marûk ṭong kha jui rung.

¹¹Kanhlam akhâr pek mak ruh, sesōt ruh. Nangni Israel Pathen intheng chungchânga rangei hnōm mak ung.”

¹²Tâk hivahi a’ntheng Israel Pathen ṭonghri kae: “Nangni’n kaman theina donmak chei, khana nangni invōk-inthat leh mihōnna chunga in-ngai chei.

¹³Nangni nanṭhea kae. Nangni bang inshâng athōiting katlung bit a ajin akase kapō chei kae; manhret manloa kachim sik chei.

¹⁴Nangni raleia a’nsyem be kapōa kakōiphak sik chei, ratap a hmeira-ê lōkna sik akalen hlok aherkhat bek a-emak leh tuikhura tui lōkna sik bek um a-om mak jo kapōa hme kasetak a kakōi sik chei.

¹⁵Chunghnung RŌNGPU, Israel Pathen intheng in, mihei hneng ahri, “Hong inle ruh khana kadai hngera kei ataksen ruh. Khan chu nangni nanratha kangar sik khana inhuk sik chei.” Tâk nangni khanga tlo sik kha hnōm mak chei!

¹⁶Khava kanek a, nan-inrepui heia inphut shakor kayâng chōnga tlânsōtna sik intluk chei. Khana nangni kadik chei, tlânsōt sik kha nantatlo mông sik kae! Nangni’n nanshakor hei kha tlân kayâng hei tia nanmandon, tâk nankahnung kathlur hei kha akayâng chet sik hei kae.

¹⁷Nan-inrepuihei remi inkhat rōk nanhmu pha mi lishing inkhat katlân sik chei, khana nankhenga mantlânsōtna sik a remi 5 rōk kha katluk set a kae. Tlâng chunga pōnlek sung tei loa nanremi inkhatbek om mak hei ning.

¹⁸Kha’num RŌNGPU’n lungset sik alahngâk ṭhak chei. Ama’n ahei tik a ṭōn kadik atlo ṭhak jâra nangni lumlo sik cheia intluk a kae. RŌNGPU chunga taksenna kaneihei kha mahâm kaṭhahei kae.

¹⁹Jerusalema ka-om nangni ṭap nôk hêrmak jo tin. RŌNGPU hi lungset kathem kae, ahnenga inṭangpuina sik nanṭap pha, ama’n amasôn sik chei.

²⁰RŌNGPU’n pha intak shunga hlam amanhro sik chei, tâk ama khet nangni inse sik a ka-om sik, khana nangni’n ama kha jong nôk mak jo tin.

²¹Nangni hlam invaia veiting changting nanse’nchu, nankahnung ting arasa hinga ati nanthei sik, “Hin hlam ka-om. Jui ruh.”

²²Nangni’n dangka leh sana vânga a’ntōm nanlimhei nanchoi heia akachok pōnse kapōa nanhlonsōt sik a kha, “Kanhmit hmua inphut om mak roh,” nanti sik.

²³Nangni’n hmuchi nanvor akaia, RŌNGPU’n akhangna sik khō ajōng mansûr sik a kha kara katamtak nankhôm sik, khana nanran he’n phihmun katamtak anchen sik.

²⁴Nanhlei khōina nansehratche hei leh nanshakor tung hei khan kahar akaṭhapen ansâk sik.

²⁵Nangni’n nan-indōipuihei rekur nanhlō pha anmihei nanthat ning hei, hmebung rakip leh tlâng rakip a inphut kavadung tui kalōng sik jo hei.

²⁶Thla kha kani kapōa kavâr sik jo, khana kani kha angaia avâr kanek a vârsari kakhea kavârsa sik jo, ni 7 shunga vâr kha ni khat rōk a akavâr kapōa. Hihei rakip hi RŌNGPU’n amihei rachâkna antak kôkbi kha akatōmpek heia amandam pek hei ning kani kha hongkachang sik.

²⁷RŌNGPU ratha hratna leh lûrna kha ram kahlatak a inphut inhmu tor a kae. Ahnuknat kha hmeimale leh hmeikhu’n anmalâr. Ama kaṭongsōt, khana aṭong kha hmei kapōa kasûk.

²⁸Ama’n thli kha ahmating atira, tuipui kalen in heirakip atlensōt kapōa, atlena kae. Khava khan jât-hei atlen manhmanga anṭōn mantluk kaṭhamak-hei kha achaina amanchanga kae.

²⁹Tâk nangni, Pathen mi chei chu, a’ntheng revei tlo ning khōhlei kapōa inpâk a hla nansak sik jo. Nangni Israelhei kahrungpa, RŌNGPU Bek-innting nanselai bunglir tum rasa katheihei inpâk kapōa inpâk sik chei.

³⁰RŌNGPU’n alûrna kare rasa leh ahnuknat rathahrat kha mi rakip amanthei et sik hei. Khana khan hmei male, sumtuk kapōk-khōi, kahre leh khō kasûr inhnak kasōk sik.

³¹RŌNGPU karâkna inhnak leh arasa kha Assyria he’n anthei pha anratha innok sik hei.

³²RŌNGPU’n anmani kha ave-avea avōk hei pha, amihei khan chu hlasak leh serângdâr leh khōng inthōa pha anhmang sik. Pathen khet in Assyriahei kha re a’ntukpui sik jo hei.

³³Assyria rengkalen kha hmeia rona sik hmei thlupun inkhat tenlaia mantluksa ka-om. Khavakha inthûk a avai kalen, inshângtak a thing anbuk a kae. Khavakha hmei asûkna sik RŌNGPU’n achunga hmei kahu ajōngsêm sik a kae.