Read Komrem ISAIAH 32 Bible Online

ISAIAH 32 - Komrem bible

ISAIAH 32

¹Kani ṭhahrep sōa reng inkhat malung pui katluk a vaikarôn inkhat ka-om sik, khana akadik a ṭongkatan jât-hei hlamkakeihei ka-om sik hei.

²Anmani inkhat et kha thlipui khōpui kâra mihei inthupna leh thlihrâng pha in-ungna ka-ang sik hei. Anmani kha nêrdiram a kavadung leh ramhânga hlungpui ka-ang sik hei.

³Inṭangpui inngei hei sik a anhmit leh ankōr anmahlâng ṭhak sik.

⁴Anmani akathōk tor mak changmak jo hei ning, tâk manhretna kaneitak a antlo sik khana antamandon kha anhrisōt sik.

⁵Tûte’num mikamo inkhat kha kajathei tia mandon mak ning, achangmak leh miduk dakmak kha malung intheng tia hrimak hei ning.

⁶Mikamo khan invet ṭong ahrisōt khana ṭōnse tlo sik amandon. Atlosōt leh ahrisōt hei khan RŌNGPU inzakna apek, khana ama’n von kaṭâm hei veiphung mak, tui kahre hei heikhat in sik pekphung hêrmak.

⁷Mi’nvet inkhat kha akaṭhamak kae, khana ṭōnse atlosōt; ama’n maleiseia sarahei manhmangna sik amantluk khan chu anta’nhmu sik akadiktak kha akhâr pek hei.

⁸Tâk-kha kajathei kachang mi inkhat in malung inthenga ṭōn atlosōt khana akadik a kangir inhnet.

⁹Hringkhō kahōia kahmang nuhmeihei, inrengna intō mak hei, kaṭong hri hi rangei ruh.

¹⁰Nangni tûnhin kakhop a ka-om chei, tâk abâna kum a tûn pha hin nanmalung kadông sik, ajârchu nantakhôm sik vomhrui thei heite om mak ning.

¹¹Kahōitak a, inrengna neiloa ka-om jo chei; tâk tûnchu ṭitpum a innok ruh! Nanpōn sōt una nankhōna pōnse invei ruh.

¹²Nan-ôp kha inrengtak a rachōn ruh ajârchu hleihmun kaṭha heia vomhrui hei kha suk manhmang jo hei kae,

¹³khana kamihei hleihmun a theimi leh rahlingbuk hei kakek jo hei.

¹⁴Reng-innpui kapha dahlon sik kae khana khōpui kalûrhei dahlonpet sik jo hei kae. Innhei leh rekur ber antahngâk hei kha’n ahei tik a sik a manset kachang sik jo. Khana ram shakōrtung hei lônna leh kemōnghei phi sâkna hmun kachang sik jo.

¹⁵Tâk-kha vōi khat chu Pathen in arathla kha eini sik ajōngtir sik. Ramhâng hei kha ralei thai ṭhatna hmun lahong kachang sik, khana hleihmun a kara katamtak lahong inlōk hi sik.

¹⁶Ram shung hmun rakip a ṭongdik leh ṭōn kaṭha anhongtlo hi sik.

¹⁷Ajârchu mi rakip in akadik leh akaṭha antlo sik jo, khana khan mōngna leh inhukna ahei tik a ka-om sik jo.

¹⁸Pathen mihei kha malung inrimna neimak jo hei ning, khana an-innshunga mōngna leh inhukna ka-om sik jo.

¹⁹(Tâk-kha, ratu shunga kahre kha katla sik khana khōpui kha akeimanset sik kae).

²⁰Kara inrana sik a khōtui katluk a akasûr sik leh shakōrtung leh sehei sik a inhuktak a phi sâkna ramhâng hmuntina nei sik kha heituk a mi rakip a’npâk sik hei mo.