Read Komrem ISAIAH 39 Bible Online

ISAIAH 39 - Komrem bible

ISAIAH 39

¹Hiva pha hin, Babylon rengpa, Baladan sapa, Merodakh Baladan khan Hezekiah rengpa nat kha aleithei, khava jâra ama’n chithi leh kutchoi ahei manrôna kae.

²Hezekiah khan ami heitir hei kha aleiratō heia khana anei ahao hei anhnenga amanhmu heia kae, dangka leh sana, maru-marâng, marim katui khana aremihei hmangchâk rakip. Akarōi manbukna leh aram shunga anei hei amanhmu mak heite leiom mak.

³Khava sōa sânkathem Isaiah kha reng Hezekiah hneng kasea ṭong ahongder, “Khona inphut anmani akahong hei mo khana nahnenga heiṭong mo antahri?” Hezekiah’n amasôn, “Anmani ram kahlatak a inphut akahong hei kae, Babylona inphut kae.”

⁴“Reng-innpui shunga anmani’n heiralam mo antahmu?” “Anmani’n heirakip an-ensō pet. Nei manbukna shunga neinâk kamanhmu mak heite om mak,” ati.

⁵Khava sōa Isaiah’n reng hneng amanthei, “Chunghnung RŌNGPU’n ahri,

⁶pha khat kahong sik, nareng innshunga neinâk rakip, tûn katlunga napa-napu he’n anta heimanbuk nei hei kha Babylona anrôn sik jo. Heite dahlon mak hei ning.

⁷Khana nasōn-napâr ṭhahrep he’m anṭhōi sik hei khana Babylon reng inna sepa katlo sik a antaksa antasyem pek sik hei kae.”

⁸Reng Hezekiah khan a’nhri ṭong kha ama khang shunga chu lung mōngna leh chamna ka-om sik tina ting alo joa kae, khava jâra amasôna, “Nang in RŌNGPU ṭong najōng rôn kha kaṭha,” ati.