Read Komrem ISAIAH 42 Bible Online

ISAIAH 42 - Komrem bible

ISAIAH 42

¹ RŌNGPU’n ati, “Ke’n kamanhrat kasōkpa kha hin ka-om — achunga malung tlaina kanei, ke’n kakadei jo inkhat kha kae. Ama kha karathla vânga kamansip, khana ama’n jât rakip hnenga akadik kha arôn sōt sik.

²Ama’n ôngmak ning khana akare manhrek mak ning a-emak leh hlamdunga rasa inshânga ṭong hrimak ning.

³Ama’n peng inhrop inkun kha dortan mak ning. khana thaihmei kathi de-de kha sêmthat mak ning. Ama’n mi rakip hneng aka-om ṭhak sik ṭongdik kha ahong rôn sōt sik.

⁴Ama inhōrna leh inngamna inhmang mak ning; ama’n raleichunga akadik kha aphunsōt sik. Ram kahla he’n ama mantheina kha rangei hnōmtak a anhngâk a kae.”

⁵Pathen in marvânhei hi asyema amazersōt hei; ama’n ralei leh achunga ka-om seng kha amanret hei; ama’n hringna apek hei khana aka-om rakip hneng kaphuk apek hei. Khana tûnchu RŌNGPU Pathen in asōk hnenga ahri,

⁶“RŌNGPU ke’n nangni kabek chei kae khana ratha kapek jo chei kae, raleichunga akadik intlo ti kha hmusōtna sik a. Nangnia inphut mi rakip leh intepna inkhat kasyem sik; nangnia inphut jât-hei hneng vâr kajōng rôn sik.

⁷Nangni’n hmitkachohei hmit nanmanvâr pek sik hei khana kurkhum inthima a’n-ong hei kha nanmasō sik hei.

⁸“Kei rōk hi RŌNGPU nan-Pathen eng kae. Alak pathen in kalûrna hi achenpui theimak ning; kei choi ka-ânna kha limsyemhei chenpui mak ning.

⁹Ke’n akasōk sik a kalei ti seng kha tûnchu hong kasōk jo. Tûnchu omchen kha asōk mak hma ke’n ṭongther kahri pek sik chei.”

¹⁰RŌNGPU hneng hlather inkhat sak ruh; ama manpâkna hla raleichung rakip in sak ruh! Tuipuia rakōng katôrhei ama kha manpâk ruh! Tuipui chunga ranhring rakip in ama manpâk ruh! Ram kahla hei leh ashunga ka-om seng in hla sak ruh!

¹¹Nêrdiram leh akhōpui he’n Pathen kha manpâk ruh; Cedar a mipui he’n ama kha manpâk hei rasoh! Sela khōpuia ka-om hei khan tlâng bilik a inphut inpâk a ông hei rasoh!

¹²Ram kahlatak a ka-om hei khan RŌNGPU hneng manpâkna leh lûrna kha pek hei rasoh!

¹³RŌNGPU kha rekahrâng inkhat kapōa re katuk a kase jo; ama intlukdek a ka-om khana re katuk sik aratha kahrok a kae. Ama’n hranhla kapenga, re ôngna aneia kae; a’nrepuihei hneng aratha hratna amalâra kae.

¹⁴Pathen in ati, “Pha kasôttak kadai hngera ka-om eng; kamihei leimasôn mak hei eng. Tâk-kha tûnchu ṭōn tlona pha kha kahong jo; nuhmei naiha kaphu kapōa ka-ông eng.

¹⁵Tlânghei leh hmebung kasuk manhmang sik hei khana hardông hei leh thingkung kamanchâr sik hei. Ke’n tuidung phaichamhei kha nêrdiram kamanchang sik hei khana tuikhurhei kha kamanchâr sik hei.

¹⁶“Ke’n kami hmitkachohei kha antahro phung hêrmakna hlamdung heia kaṭhōi sik hei. Ke’n ankhō inthim kha vâr kamanchang pek sik hei khana anram kaphok hei kha anhmai kunga kamannejap pek sik hei. Hihei hi kei intepna kae, khana ke’n sôilo jen a katlo mathluk sik hei kae.

¹⁷Limsyem kataksenhei kha, limhei kha an-pathen tia akabek hei kha, suk manhnem sik hei leh manzak sik hei kae.”

¹⁸RŌNGPU’n ati, “Rangei ruh, nangni kōr kaset hei! Inhnaitak a enruh, nangni hmitkachohei!

¹⁹Kasōkpa kanek a hmitkacho tu mo aka-om, ṭong kasem a katirpa kakhea tu mo kōr kaset aka-om?

²⁰Israel, nang in hingtuk hrep nahmu jo, tâk-kha nang sik a heitina mo akae jo hei? Nang in atheina sik kōr nanei, tâk-kha natheikhet kha heimo kae?”

²¹RŌNGPU kha mi kahuk a ratha kahroktak Pathen inkhat kae. khava jâra adânhei leh ami mansena kha achoi manshâng, khana amipui he’n ama antakaja sik kha amadu.

²²Tâk-kha tûnchu amihei kha ansuk maphûr jo hei; Anmani ek-khur shunga ankhum jo hei khana kurkhum shunga anthup jo hei. Anmani annei ankasut heia ansuk maphûr jo hei, ankahuk sik tûte inkhat hongsōk mak jo.

²³Nangni mi inkhatbek in hivahi rangei mak tin chei mo? Tûna inphut inrintak a nanta rangei sik jo mo?

²⁴Israel kha inru mikachom hei hnenga tu’n mo apek sōt? RŌNGPU amatak in kae, achunga dōina setna nileitlo jo mipa khan kae! Ama’n amadu kapōhrep a omchen mak me, khan chu mansena apek me kha eini’n juimak me.

²⁵Khava jâra ahnuk natna inhnak kha manhretna amannei me khana re shunga intuk inthat inrengna kha amande me. Ahnuknat kha hmei kapōa Israel pumpui chunga kakânga kae. tâk khahei omchen mo akasōk eini’n heite leimanhret mak me; khana inphut heite inkhat inchu na’m neimak me.