Read Komrem ISAIAH 43 Bible Online

ISAIAH 43 - Komrem bible

ISAIAH 43

¹Israel, nakasyempa RŌNGPU’n ati, “Ṭimak roh, ke’n nang kahuk sik che. Ke’n narahming vânga kabek jo che, nang keita che kae.

²Nang in tui inthûk napetan pha, ke’n ka-ompui sik che; nang inrimna khan tor mak tin. Nang in hmeishunga narakan pha, akâng mak tin; akahong sik enmansinna inhnak-hei khan manset tor mak tin.

³Ajârchu kei RŌNGPU na-Pathen eng kae, nang kahuksōt, Israel Pathen intheng eng kae. Nang ning leh hnōma masōna sik a ke’n Egypt kha donmak jo ning; Ethiopia leh Seba donmak hei ning.

⁴Nang hringkhō hukna sik a jât pumpui donmak hei ning, ajârchu nang kei sik a marit ka-om tak che kae, khana ke’n kalungset che khana kajana kapek chea kae.

⁵Ṭimak roh, ke’n ka-ompui che! “Nisō leh tlaitlâk tinga hmun kahla pena inphut, ke’n namihei inna kaheiṭhōi sik hei.

⁶Anmani anhei manhongna sik a ke’n sak intong hneng kahri sik khana kamihei ankhâm makna sik thlâng hnenga kahri sik. Ram kahlatak heia inphut kamihei he’nle hei rasoh, ralei rakir rakip a inphut he’nle hei rasoh.

⁷Anmani kami khet hei kae, anmani hi kei lûrna ahei kachoi sik a kasyem hei kae.”

⁸Pathen in ati, “Kamihei kha ṭong tanna behei ruh. Anmani hmit annei, tâk anhmit kacho; anmani kōr annei, tâk ankōr kaset!

⁹Jât-hlop hei kha ṭong tanna sik behei ruh. An-pathenhei khopen inmo hnungṭong asânsōt tor? khopen inmo tuna akasōk sik asânsōt tor? Hiva pathenhei hin andikna manchênna sik, anṭong dikna enmansinna sik, sâkhi heirôn manhlut hei rasoh.

¹⁰“Israel mipuihei, nangni kasâkhi chei kae; ke’n nangni kasōk sik a kakadei chei kae, nangni’n kei nanmanhretna sik eng khana nantaksenna sik eng, khana kei rōk hi Pathen eng kae ti nanmanhretna sik a katlo kae. Kei teilo Pathen ralak om mak; leiom hêrmak khana om hêrmak ning.

¹¹“Kei rōk hi RŌNGPU eng kha kae, nankahuk tor sik inkhat rōk eng kha kae.

¹²Heimo ahong kasōk sik ke’n kahrisōt, khana khava sō leh nan-inthōpui sik a kajōng eng. Ram hlop pathen in hing’hin tlohêr mak; nangni kasâkhi chei kae.

¹³Kei Pathen eng kae khana ahei tik a kachang sik eng. Karatha hratna inphut tûte sōksōt tor mak ning; ke’n katlosōt jo kha tûte inkhat in thleng tor mak ning.”

¹⁴Israel Pathen intheng, nakahuksōt RŌNGPU’n ahri, “Nang huksōtna sik Babylon kadōi sik remi kajōngtir sik; ke’n khōpui sōngkot kanam khōi sik, khana anmipuihei ôngna kha ṭapna kamanchang pek sik hei.

¹⁵Kei hi na-Pathen intheng, RŌNGPU eng kae. Israel, ke’n nang kasyem che kae, kei nareng eng kae.”

¹⁶Tenlai khan RŌNGPU’n tuipui shunga hlamlen aleisyem, tui inher kâra hlam inkhat kae.

¹⁷Ama’n suksetna sik a remi kahrâng aching hei, shakor gâri leh shakor remihei kae. Anmani ahei tik a akathōi mak sik a katlasuk hei, hmeiser kapōa asêmthat hei.

¹⁸Tâk-kha RŌNGPU’n ati, “Aleikasesa omchenhei kha matutlit mak roh khana tenlaia akasōk omchen heia namalung daṭhak mak roh.

¹⁹Ke’n katlosōt sik ṭōnther heia khan ensui roh. Hihei hi kasōkdek jo, tûn nan-en thei sik hei! Ke’n ramhânga hlamlen kasyem sik, khana khan ke’n kavadung tui kapek sik che.

²⁰Ram a sha he’num ankaja sik eng; ram-uihei, Valen he’n anmanpâk sik eng, ke’n kakadeisōt mipuihei tui pekna sik a nêrdiram a tuidung kaman lōng pha khan.

²¹Anmani kha keita sik a kasyem mipuihei kae, khan anmani’n kei choi ka-ânna hla ansak sik a kae!”

²²RŌNGPU’n ati, “Tâk Israel, nang kei juina nathōk hla jo; nang akamuk mak jo che.

²³Kemōng ro-inthoina kahnenga heichoi mak jo che; na-inthoina hei vânga akaja mak che. Ke’n inthoina ngekna jâra phurhrik pek mak che eng. khana marim katui derna jâra manchâm mak che eng.

²⁴Nang in kei sik a marim katui rachôkmak che khana naran thai vânga amantlai mak che. Khava kanek a naset tlo khan kaphur namanhrik a kae; akadik mak natlona khan nasuk manbōi eng.

²⁵Kha achang inum, kei nasetna inngeidam Pathen eng kha kae, Kei hi kei kachangna dungjuia hivahi katlo kae. Nasetnahei kha nang dōina sik daṭhak mak ning.

²⁶“Eini ṭongtan hmun a se rih; nang maset pekna eng kha heichoi roh! Akadik nanchangna manchênna ṭong kha phôngsōt ruh!

²⁷Ahma kakei napusōn hei kha’n setna antlo jo; nahlam kakei he’n kei dōina setna antloa kae.

²⁸Khana navai karôn he’n kei hmun intheng anmanchok a kae. Khava jâra Israel chunga suk manhmangna kha kahei rôn kae; kami khet hei inzakna kha kamasō kae.”