Read Komrem ISAIAH 44 Bible Online

ISAIAH 44 - Komrem bible

ISAIAH 44

¹RŌNGPU’n ati, “Tûn rangei roh, kasōk, Israel, kakadeisōt mipui, Jacob sōn leh pârhei.

²Kei nankasyem RŌNGPU eng kha kae; na’ntet bia inphut, ke’n ka’nṭangpui che kae. Ṭimak roh; nang kasōk che kae, kalungset a kakadeisōt mipui che kae.

³“Ke’n ram kachâr hmun a tui kapek sik, ralei chârna kavadung kaman lōng sik. Ke’n nasahei chunga karatha hratna kajōng bun mathlâk sik, khana nasōnhei chunga kamahâm ṭhatna kapek sik hei.

⁴Anmani kha tui lōngna hmun a kahar kapōa tuitlânna huisum kapōa kakhang sik hei.

⁵“Inkhat khat a, mihe’n anhri sik, ‘Kei RŌNGPU eng kae,’ tia. Anmani Israel mipui leh injom sik a kahong sik hei. Anmani inkhat et in anbâna RŌNGPU rahming anmazet sik khana anbinga Pathen mi inti sik hei.”

⁶Israel vaikarôn leh akahrung RŌNGPU’n, Chunghnung RŌNGPU’n hinga ahri: “Kei ahma inkei leh a’nchaina, Pathen inkhat rōk eng kha kae; kei teilo Pathen ralak om mak.

⁷Kei tatlo kapōa tu inkhat in atlo tor sik mo? Tu’n mo ahong kasōk sik ahridek tor sik, anphutbia inphut a’nchaina katlung?

⁸Ṭimak ruh, kamihei! Nangni’n nanmanhret, khang marōa inphut tûn katlung ahong kasōk sik omchen rakip kalei hridek jo, khana nangni kasâkhi chei kae. Pathen ralak alaka-om hei mo? Ke’n kathei phungmak ratha kahrat pathen alaka-om hei mo?”

⁹Lim kasyem rakip hmangna kase hei kae, khana aman antamantam pathenhei kha hmangna kase kae. Khava pathen inmuk hei kha hmitkacho leh heite inhret mak hei kae, inzakna manchen sik hei kae.

¹⁰Thir vânga antasyem kha pathen inkhat a kamuk sik hi akaṭha changmak.

¹¹Tu achang inum khava inmuk hei kha suk mannem sik hei kae. Lim kasyem hei kha mihringhei kae, heite changdek mak hei. Anmani ṭongtan hmun a hong ngir hei rasoh, ṭit manpir sik hei kae, khana inzakna antachen sik kae.

¹²Thir kakheng he’n thir har anloa hmeia ansyema kae. Ama ratha kahrat abân khan sek kha akalek a thir akhênga ahme achâng asyema kae. Khanga ṭōn atlo pha, avon kaṭâm, atui kahre, khana kachâma kae.

¹³Thing kathem mistri khan ate mantōk a kae. Alim rakip kha lim mazetna vâng amazet a, ahmangchâk vânga ahema, a-inna da sik a, mi inkhat hme kaṭha lim inkhat a asyema kae.

¹⁴Khanga hmang sik a cedar thing atuktan sik, a-emak leh ratu shunga sasō achangmak leh Cypress thing akadei sik. Achangmak leh ramhânga tairen thing alinga akekna sik khōsûr pha ahngâk thei.

¹⁵Mi inkhat in thing inkhat kha ṭhahrep thing ti sik a khana ṭhahrep khat lim syemna sik a ahmanga kae. Khana thing ṭhahrep khat hmei atia alumna sik a-oa khana buhlom sōngna aneia kae; ṭhen khat kha milim asyema, pathen asyema akamuk a kae.

¹⁶Thing harkhat kha hmeia atia kae; hme aroa, asâk a kae, khana malung tlaina anei. Abing hmei ôna aneia ahri, “Heituk a akahōi leh akalum jo mo? Heituk-hrep a akahōi hmei jo mo!”

¹⁷Ama’n thing akalen seng kha lim inkhat asyema, ama inkuna akamuk jo. Ahnenga ader a ati, “Nang ka-pathen che kae, ahuk roh!”

¹⁸Khang khava mihei kha heimo antatlo ti manhret theina sik a kamohêr hei. Anmani’n akadik chunga anhmit ankathim, anmalung ankama kae.

¹⁹Lim kasyempa khan hinga hrina sik lungri leh mandon theina neimak, “Thing harkhat chu ke’n hmeia kati jo. Buhlom kakatheia hme karaheia kasâk a kae. Khana a’nhlei ṭhahrep vâng lim kasyema kae. Hinahin thingtum inkhat hnenga ke’n kakamuk kae nu!” titor mak.

²⁰Ravut nisâk kapōa lothei kae. Ama mona mandonna khan akeiṭhōia atloje omlo kha kachang jo. Ama’n ata’nchoi limsyem kha pathen changmak ti hi abibinga hnōm mak a kae.

²¹RŌNGPU’n ahri, “Israel, hivahi mandon roh; nang kasōk che kae mandon roh. Nang kasōk sik chea kasyem che kae, khana ke’n nang mahngi hêrmak che ning.

²²Ke’n nasetnahei sumtuk inthlir kapōa kaphet pek jo che. Kahnenga ho’nle roh; nang kahuksōt kha kei eng kae.”

²³Marvân nangni, inpâk a ông ruh! Ralei hmun inthûk hei, ông ruh! Tlânghei leh ratu ramhânga thingkung rakip, inpâk a ông ruh! RŌNGPU’n ami Israelhei ahuk manhring heia alenna kha amalâr jo.

²⁴“Kei nankahuk inhring RŌNGPU eng kha kae; Nankasyem kha kei eng kae. Heirakip kasyem, RŌNGPU eng kha kae. Kei rōk in marvânhei kamazersōt hei kae; Ralei hi kasyemlai tûte’n abômmak hei.

²⁵Ke’n tla kasânhei kaman mo hei, khana ârsi lekha kathemhei ṭongsânsōt hei kha kamanhmak hei. Mikasinghei ṭonghri kha ke’n kamakhe, khana ansingna hei kha akamo kamanchang pek hei.

²⁶Tâk-kha kasōk in hnungṭong asânsōt pha, kaṭōn mantlukna akaphôngsōt sik ngeva katirhei pha, Khava ṭōnhei kha ke’n kamantluk hei khana hnungṭong sânsōt hei kha kadiktak a kasōk heia kae. Ke’n Jerusalem hnenga mipuihei ashunga hong ka-om nôk sik hei, khana Judah khōpui kha athera anta hongsak sik hei kae tia kahri pek. Khava khōpuihei kha ansukset sōa inphut hongkathōi nôk sik hei.

²⁷Ṭong beikhat rōk pekna khan tui-ôngpui kha kamanchâr.

²⁸Ke’n Cyrus hneng kahri, ‘Kei sik a vai karôn sik kha nang che kae; Ke’n kamantlo hnōm che kha nang in natlo sik kae: Jerusalem avea saksōtna sik a khana Bek-inn innhmun kha deng manbukna sik a nang in ṭong namasō sik kae.’”