Read Komrem ISAIAH 45 Bible Online

ISAIAH 45 - Komrem bible

ISAIAH 45

¹RŌNGPU’n Cyrus kha reng sik a akadei jo! Ama kha jât-hei kator sik a akadeisōt jo; ama kha renghei ratha neina kasuk inthla sik atir jo; RŌNGPU’n khōpuihei sōngkot kha ama sik a amahlang pek sik. Cyrus hneng RŌNGPU’n ahri,

²“Kei khet in nahlam kha kamantluk pek sik che, hme leh tlânghei kaman châm pek sik che. Ke’n sum-êng sōngkot-hei kasuk mathlek sik, khana thir rape kamathlek sik hei.

³A’nthim hmun, thuphmun heia karōi buk-hei kha nang kapek sik che; khava pha nang in kei RŌNGPU eng kae, khana Israelhei Pathen khan nang narahminga abek che kae tia nahong manhret sik.

⁴Ke’n kakadei mi kasōk Israelhei inṭangpui sik a nang kakadei che kae. Nang in kei namanhret mak eng inum, ke’n nahnenga kajana kalentak kapek jo che kae.

⁵“Kei RŌNGPU eng kha kae; pathen ralak om mak. Nang in kei namanhret mak eng inum, ke’n namadu ratha hratna kha kapek sik che.

⁶Ke’n hivahi katlo kae ajârchu raleichung a’nphutna inphut a’nchaina katlunga aka-om seng in kei RŌNGPU eng kae khana pathen ralak om mak tia anmanhretna sik a kae.

⁷Ke’n vâr leh inthim hi kasyem kae; ke’n mahâmṭhatna leh mahâmsetna kahei rôn kae. Hihei rakip hi, RŌNGPU ke’n katlosōt kae.

⁸Ke’n marvâna inphut retorna kha khōsûr kapōa kajōngtir sik; khava inhlang sik a ralei in leika-âng sik khana ning leh hnōm leh dikna kha reipâr kapōa kapâr sik jo. RŌNGPU ke’n hivahi kamasō sik kae.”

⁹Ralei be inkhat in akakhengpa kha ṭong amakhe thei sik mo, khava be ralak leh a’n-anghrep inkhat khan? Matlak khan be-kakhengpa kha heimo atlo tia ṭong ader mo? be khan akasyempa kha them mak tia a’nphin mo?

¹⁰Mi inkhat in anu-apa hneng, “Heisa mo hinga nantasyem eng?” ati ngam mo?

¹¹RŌNGPU, Israelhei Pathen intheng, hnunga akasōk sik intlukpa khan ahri: “Nangni’n kasahei chungchânga ṭong nanderna sik eng ratha neimak chei, achangmak leh ke’n katlo sik kasōk chunga nantahrina sik om mak!

¹²Raleichung kasyem kha kei eng kae, khana khan aka-om sik mihringhei kasyem eng kha kae. Karatha neina vâng marvân hi kamanzer; Kani, thla, khana ârsihei ke’n ka-ensui hei.

¹³Ke’n Cyrus kha ṭōn atlosōtna sik a kamathok kaṭōn mantluk hei huitlungna sik leh heirakip kadik a a-omna sik a. Ke’n asena sik hlam seng intlun jena kasyem sik. Ama’n kakhōpui, Jerusalem asyem manther sik, khana rehring sura ka-om kamihei amasō sik hei. Hiva ṭōn tlosōtna sik tûte’n ama kha pa-lâkmak ning achangmak leh sêr marûk a pemak ning.” Akalenpen RŌNGPU’n ahri jo kae.

¹⁴RŌNGPU’n Israel hneng ahri, “Egypt hei leh Ethiopia hei nei leh hao kha nangta sik kae, khana Seba ram a mi dung inshâng hei kha nasōk akachang sik hei kae; anmani’n thirhrui inkhōp pum a antajui sik che kae, nahnenga a’nkun sik hei kae khana anhrisōt sik, ‘Pathen in a-ompui che, ama rōk Pathen kae.

¹⁵Amihei kahuksōt, Israelhei Pathen kha, abinga a’nthup Pathen kae.

¹⁶Lim kasyem hei seng kha inzakna anchen sik; ankhenga themmôna pek sik hei kae.

¹⁷Tâk Israel chu RŌNGPU’n ahuk a kae, khana aretorna kha are-rea sik kae; amihei kha ahei tik a themmôna chenmak hei ning.’”

¹⁸RŌNGPU’n marvân asyem — ama kha Pathen kha kae! Ama’n ralei hi ahme achâng amantluk a asyemsōt a kae — akasôttak aka-om sik a kahnet a asyema kae. Ama’n akarōk a’nhmang sik inkhat a syem mak, tâk-kha mihei omna sik hmun inkhat a asyem kae. Hinga akahri kha ama kae, “Kei RŌNGPU eng kae, khana pathen ralak om mak.

¹⁹Ke’n marûk a ṭong hrimak eng, achangmak leh kamantlukna kha thup mak eng. Kei Israel mihe’n ramchi inhmangna shunga antajong sik eng kha madu mak eng. Kei RŌNGPU eng kae, ke’n akadik kha kahri kae; akadik mi’n anmanhretna sik a katlo kae.”

²⁰RŌNGPU’n ahri, “Nankhenga hong ruh, jât rakip a mipuihei, rengram apur jo pha alakahring seng; nanṭong tanna sik nantak khet hong inlâr ruh! Thinga ansyem lim leh inṭhōia a’njôk mipuihei, ankahuktor mak sik pathenhei hnenga akader hei, khava mihei kha heite manhret mak hei!

²¹Ṭongtan hmun a nanṭong tanna sik heirôn manhlut ruh; a’nhrung sik hei kha inkhat leh inkhat inbek intōk hei rasoh. Heimo akasōk sik kha tenlai khan tu’n mo aleihridek jo? Khava kahri kha amihei kahuksōt Pathen RŌNGPU kei kha changmak eng mo? Pathen ralak om mak a kae.

²²“Tûn kahnenga he’nle una inhuksōt ruh, raleichung pumpuia mi rakip hei! Hinahin Pathen inkhat rōk kha kei eng kae.

²³Ka ṭongtep hi akadik kae, khan chu hivahi inthlengmak ning. Kei ka-ena rakip vânga a’ntep eng kae: Mi rakip kahong sik hei khana ankamuk sik eng. khana kaṭong juina sik a intep sik hei.

²⁴“Anmani’n anhri sik, kei hneng rōk a retorna leh hratna ratha kha inhmu sik; tâk-kha kei ani ka-en kada rakip kha masetna anchen sik.

²⁵RŌNGPU ke’n Jacob sōn leh pârhei seng kahuk sik hei, khana anmani’n kei anchoi ka-ân sik enga kae.