Read Komrem ISAIAH 47 Bible Online

ISAIAH 47 - Komrem bible

ISAIAH 47

¹ RŌNGPU’n ahri, “Babylon, nalen in-ongna inphut jōng ṭum roh, raleia vaiphin kâra in-ong roh. Nang pha khat a nuhngâk intheng inkhat kapōa, mi’n re antator mak khōpui che kae, tâk-kha nang akadông neng leh a’nnêm neng kha changsôt mak jo che! Tûnchu nang sōk kachang jo che!

²Chakri kha maher roh! Jâmdi kha tak roh. Nahmai pōn hliksōt roh! Napōn kaṭhahei insōt jo roh! Kavadung rakanna sik napōnvei keimanke roh!

³Mihe’n karōk pet a na-om kha anhmu sik; anmani’n nang sukman hnemna leh inzak nachen kha anhmu sik. Ke’n phu kahlō sik, tûte’n akhâm mak ning.”

⁴A’ntheng Israel Pathen khan eini amasō jo me ama rahming kha Chunghnung RŌNGPU kae.

⁵RŌNGPU’n Babylon hneng ahri, “Inthim shunga kadai hngera in-ong roh; anmani’n nang jât-hei rengnu ti nôk mak jo hei ning!

⁶Kei kamihei chunga kahnuk leikana; kami mak hei kapōa kaleirazen hei: ke’n nang hratna thōia kaleida hei, khana anhnenga lungsetna leimalâr mak che; katerhei kapha êngset a narazen hei.

⁷Nang in ahei tik a rengnu akachang ṭhak sik chea le’ndon che, khana hiva omchenhei hi namalunga damak hei che, achangmak leh khahei kha heikhonga mo a’nchai sik ti mandon mak che.

⁸“Hivahi rangei roh, hōina rōk indu nang, kahring leh inhuktak a ka-om eng kati nang. Nang in Pathen kapōhrep a kalen eng nati, nang kapō alak inkhatbek om mak nati. Nang in heitik a renghmeinu changmak ning tia indon che achangmak leh nasahei thina jâra inrengna chenmak ning nati.

⁹Tâk-kha pha khat a, ni khat rōk a, hihei seng hi hong kasōk sik. Nang in hmitphedôi khaseng nahmang inum napuise leh nasahei inhmang sik hei.

¹⁰“Nang ṭhatmakna tlona shunga khan nabinga inngamna nanei; tûte’n ahmu mak hei nati. Nasingna leh namanhretna khan hlam kalet a aṭhōi che, khana nabinga nahri, ‘Kei Pathen eng kae, kei kapō tûte om mak.

¹¹Mahâmsetna nachunga jōng katlung sik, nahmitphe dôi inkhatbek in khâmtor mak ning. Inhmangna kha manhret manloa nachunga jōng katlung sik, narahmanga nalahmu mak inhmangna kae!

¹²Nang hmitphedôi leh mithlimna hei kha dasōt roh; nasinlaia inphut nahong hmang jo hei kae. Khahei khan ajingbek chu anta’nthōpui sik che kachang sik; khan vâng khan na’ndōipui hei namaṭhit torkhat hei kachang sik.

¹³Nang in mansena nahmu inum ratha neimak che. Na-ârsi lekha kathemhei hong hei sona ahuk hei rasoh, khava ârsi lekha katei hei khan, marvânhei aṭhen aṭhen a kasemṭhen hei khan, nahnenga heimo ahong kasōk sik tia thla kataia nang hneng ṭong thangkakōi hei kha.

¹⁴“Anmani kha sapôt bongkhat kapō kachang sik hei, khana hmei in aro manhmang sik jo hei! Anmani anbinga kapha inhuktor mak hei ning hmeimale kha anmani sik a kalum hêr sik, anmani taksa manlumna sik a anhnenga anta-o hmei kapō changmak ning.

¹⁵Khava hrep kha nang sik a akaṭha antatlosōt kachang sik, nahringkhōseia ṭong nahong lona hei khava ârsi lekha kathemhei kha. Anmani ankhenga nang andahlon sik che, anbing hlam et a kase sik jo hei, nang kahuk sik a tûte om mak hei ning.”