Read Komrem ISAIAH 48 Bible Online

ISAIAH 48 - Komrem bible

ISAIAH 48

¹Hivahi rangei ruh, Israel mihei, Judah sona inphut ahong kasōk nangni: Nangni RŌNGPU rahminga inhâksêr chei Israel Pathen kha kamuk sik a nanti, tâk-kha nanṭong hri inkhatbek tlo sik a intluk mak chei.

²Achang inum nangni inlensak cheia hinga nanhri, khōpui intheng mi ung kae Israel Pathen chunga a’nngai ung kae arahming Chunghnung RŌNGPU inti chunga khan ka-om ung nanti.

³RŌNGPU’n Israel hneng ahri, “Ke’n hmalai khan hnunga ṭong kasōk sik kalei hridek jo; khava sōa manhret manloa kamasō hei.

⁴Nangni nanracham kase sik thir ngara kangar sik chei khana sum-êng kapōa kasak sik chei ti kamanhret chei.

⁵Khava jâra hmalaia inphut nangni hnunga omchen sik kalei hrisōt dek jo kae, khahei kha ansōk mak hma kaleiphông jo, hivahi nanlim leh achâng hei khan khahei kha antamasō kae tia nanti makna sik a kae.

⁶“Ke’n kaleihri heirakip kha tûnchu katlung jo; kahri kha kadik jo tia akahnōm sik chei kae. Tûn omchen ther ahei kasōk sik kha kahri pek sik chei, tûn mak hma kaleihri mak omchen kae.

⁷Tûn pha rōk a kamansōk hei kae; amak hma hiva kapō lasōk phungmak. Aleisōk jo’nchu, nangni’n akhenga nanta manhretsa jo kae nanti sik.

⁸Nangni taksenthei changmak chei, ti chu nangni ahei tik a khemaṭang kase chei kae ti hi kamanhret chei. Khava jâra nangni’n hivahei seng hi lathei phungmak chei, khava jâra khava ṭong inkhatbek nankōr tathei sik a hongmak a kae.

⁹“Karahming hi mihe’n anchoi ka-ânna sik, kahnuk natna rakip kakhâma kae; ke’n kahnuk kamale khana nangni suk manhmang mak chei ning.

¹⁰Ke’n nangni dangka ratap a sormantheng kapōa, inrengna hmeishunga ka-enmansin chei kae. Tâk-kha nangni hnemna kase nanchang kha kahmu sōt a kae.

¹¹Ke’n katlo hei hi kei sik a katlosōt kae, karahming hi kajana neilo manchang mak ning achangmak leh tûte inkhat leh lûrna kha chensap puimak ning khavakha keita leh keita rōk sik kae.”

¹² RŌNGPU’n ahri, “Kabeksōt mi, Israel, kahri hi rangei roh! Kei Pathen eng, a’nphutna, a’nchaina, Pathen inkhat rōk eng kae!

¹³Kakut he’n raleichung innhmun hi ansyem, khana marvânhei hi anhong mazer. Ke’n ralei leh bōirōk kabek hei pha, anbinga kahong heia hong inlâr hei.

¹⁴“Nangni nankhenga hong intûp ruh khana rangei ruh! Kakadeisōt mi khan Babylon re asō sik hi, pathen lak inkhatbek in leihridek tor mak; ke’n kamantlo hnōm kha ama’n atlosōt sik kae.

¹⁵Kei ṭongkahri leh ama kabeksōt eng kha kae; ke’n ama hlamkakeia aṭōn hmesōna kamannei.

¹⁶“Tûn kahnenga heihnai ruh khana heimo kahri rangei ruh. A’nphutbia inphut ke’n inphôngtak a kahrisōt jo, khana kaṭonghei hi ahei tik a hui kamanthlung hei.” (Tûn Chunghnung RŌNGPU’n kei arathahrat apek enga atir jo eng.)

¹⁷Israel Pathen intheng, nankahuk RŌNGPU’n ahri, “Kei RŌNGPU nan-Pathen eng kae, nangni ṭhatna sik a mantheina akanei hnōm khana nansena sik a hlam akakhing hnōm inkhat eng kha kae.

¹⁸“Nangni’n kaṭong pek chei hi ajui rōk nanjui inchu! Khan chu mahâmṭhatna kha nangni sik a akakang hêrmak kavadung kapōa kalōng sik! Torna kha nanhnenga kahong sik tuipui in-nông in tuipangting ahei inlet kapōa.

¹⁹Nansōnhei kha nêrdi ja kapōa katam sik hei, khana anmani ahei tik a suk manhmang anchang makna sik kasyem sik hei.”

²⁰Babylona inphut sōksōt ruh, ning leh hnōma om ruh! Inpâktak a ṭong kha ông manthang ruh; hmun rakip a manthei hei ruh: “RŌNGPU’n asōk Israel kha ahuk jo!” ti ruh.

²¹RŌNGPU’n amihei nêrdi kalum, akachâr ram shunga aṭhōi hei pha, anmani tuihre jâra inreng mak hei. anmani sik a hlungpuia tui amasō pek hei; aman hlung kha amakhōi, khana tui kha jōng kalōngsōt.

²²“Mikaset-hei sik a hringna om mak,” RŌNGPU’n ati.