Read Komrem ISAIAH 49 Bible Online

ISAIAH 49 - Komrem bible

ISAIAH 49

¹Ram kahla ka-om jât-hei, kaṭong hri hi rangei ruh!, nangni ram kahlatak a ka-om hei! Kei ka’ntet mak hma, RŌNGPU’n akadeisōt eng. khana asōk sik a akadeisōt eng.

²Ama’n kaṭonghei kha chemjâm kangei kapōa asyem hei. Ama kut khet vâng ahrung eng. Ama’n akangeijap, hmang sik a mantluksa the inkhat kapōa asyem eng.

³Ama’n kei hneng ahri, “Israel, nang kasōk che kae. Nang jâra mi rakip in antamanpâk sik eng kae.”

⁴Ke’n kahri, “Ke’n ṭōn katlo jo, tâk khavakha heituk a inhōrna kase jo mo! Ke’n karatha nei kahmang jo, tâk heite tlosōt mak eng.” Kha’num kei chungchâng ani kahrung sik a RŌNGPU kha kataksen; katlona chunga ama’n inpâkman apek sik eng.

⁵Ka’ntet mak hma, RŌNGPU’n kei aleikadei jo eng; ama’n amihei kaṭhōi inle sik a asōk a asyem eng, Israel a’nchekchai kaṭhōi inle sik a. RŌNGPU’n kajana apek eng; ama kha kahratna kung kha kae.

⁶ RŌNGPU’n kahnenga ahri, “Kasōk, nang sik a ke’n ṭōn kalen chet inkhat kanei. Alakahringa ka-om Israel mipuihei ansei lenna sik naheiṭhōi male sik rōk hei kha changmak tâk raleichung pumpui huksōt theina sik a ke’n jât-hei sik a vâr inkhat a nang kasyemsa sik che kae.”

⁷Israel a’ntheng Pathen leh huksōtpa khan ahri, hnōise-êsetak a antatlopa hnenga, jât he’n antamaterpa leh vaikarônhei sōkpa hnenga: “Reng he’n nang masōa na-om kha anhmu sik che nang kajana inding sik hei; rengsa he’num anhmu sik, khana nang kajana inkun sik hei.” Hivahi hong kasōk sik ajârchu RŌNGPU’n asōkpa kha akadei jo kae; Israel Pathen intheng khan aṭong intep kha ajui kae.

⁸ RŌNGPU’n amihei hneng ahri, “Nangni huksōtna kha ajōng tlung pha, lungsetna kha kamanhmu sik chei. khana inṭangpui sik a nanṭapna kha kamasôn sik chei. Kahngâk a kahrung sik chei khana nangnia inphut mi rakip leh intepna kasyem sik. Tûna akarōksaia ka-om nanrama ave nôk a kaman om sik chei.

⁹Ke’n kurkhum a ka-om hei hneng kahri sik, ‘Sōksōt jo ruh!’ a’nthima aka-om hei hneng, ‘Vâra hongsōk jo ruh!” kati sik. Anmani kha tlâng chunga phi kasâk kemōng rup ka-ang sik hei;

¹⁰anmani ahei tik a’m anvon ṭâmmak ning khana antui hremak jo ning. Kani leh nêrdi kalum in anchunga tônmak jo hei ning, ajârchu ani’nlungset inkhatpa khan aching sik jo hei. Ama’n tuiri pûtna hmun a aṭhōi sik hei.

¹¹Ke’n tlâng heia hlamlen kasyem sik, khana kamihei khōhme sena sik hlam kasyem pek sik hei.

¹²Kamihei kha ram kahlatak a inphut kahong sik hei sak ting leh tlaitlâk a inphut, khana thlang tinga Aswan ram a inphut kahong sik hei.”

¹³Marvânhei, hla sak ruh! ralei, inpâk a ôn roh! Tlângbung he’n hla saksōt hei rasoh! RŌNGPU’n amihei lungmōng athlâk sik hei; ama’n ami khōdeng katheihei chunga alungset sik hei.

¹⁴Tâk-kha Jerusalem mihe’n anti, “RŌNGPU’n adahlon jo me! Ama’n amahngi jo me.”

¹⁵Khava jâra RŌNGPU’n amasôn hei, “Nu inkhat in asa khet kha amahngi tor mo, khana amatet asa kha lungset mak eng atitor sik mo? Nu inkhat in asa amahngi jo’num, ke’nchu nangni mahngi hêrmak chei ning.

¹⁶Jerusalem, ke’n nang mahngi tor mak che eng! Narahming kha ke’n kakut maja heia kamazet jo.

¹⁷“Nang kasyemther sik hei kha inranga kahong jo hei khana nang kasuk inhmanghei kha kasesōt sik jo hei.

¹⁸Nakimvea thlir inna heimo akasōk enroh! Namihei intûp jo hei, inting hong inle jo hei! Kei akahring khet Pathen kachang jâra, namihei jâra a’nlensak sik che kae, hmōinu’n asana hrui or jâra a’nlensak kapōa.

¹⁹“Naram kha suk manset leh dahlon leikachang, tâk-kha tûnchu khana aka-om sik a akahong hei sik a khavakha kasin rei sik jo. Khana nang sukset a ani kadahei kha nanga inphut kahlatak a hnengsōt sik hei kae.

²⁰Miram a omlai a’nte namihei kha’n ni khat chu nahnenga anhongti sik, ‘Hiva ram hi kasin rei, ni-omna sik a ram nimadusa jo!’

²¹Khava pha nang in nabinga nati sik, ‘Tu’n mo hiva naihei seng hi kei sik amatet pek eng? Kasahei leh kha kamanhmang jo heia, nei tor loa aleika-om jo eng kae. Kei hi miram a hnongsōt a leika-om eng, tu’n mo hiva sahei hi avei mankhang hei? Kei kabing rōk a dahlona leika-om eng, khona inphut mo hiva sahei hi akahong hei?’”

²²Chunghnung RŌNGPU’n amihei hneng ati: “Ke’n jât-hei hneng, mêrchîkna kapek sik hei, anmani’n nasahei kha inna anhongṭhōi sik hei.

²³Renghei kha nang sik a pa kapō kachang sik hei; reng nuhmeihei kha nu kapō kachang sik hei, Anmani nahmai kunga inkun sik hei khana kajana anpek sik che; anmani’n insinsaktak a nang kajana anmalâr sik. Khava pha, nang in kei hi RŌNGPU eng kae tia nahong manhret sik eng, kei inthōpui sik akahngâk tûte inkhat in malung tlailoa om mak hei ning.”

²⁴Nang in remihei neichom kha nakasut tor mo? Nang in mi-êng kase kut a inphut khum mihei kha nahuksōt tor mo?

²⁵RŌNGPU’n amasôn, “Khavakha ahong kasōk khet sik kha kae. Sepeihei khum mihei kha losōt sik hei kae, khana êngkase nei kachom hei kha sur sik hei kae. Nang kadōi rakip hei kha ke’n kadōi sik hei, khana nasahei kha kahuksōt sik hei.’

²⁶Nankasu inrim hei kha anbinga khat leh khat kamanthat sik hei; anmani hnuk natna leh mithatna khan ju inrui kaman-ang sik hei. Khava sōa mi rakip in kei hi RŌNGPU eng kae tia anmanhret sik eng. nangni kahuk leh ning leh hnōma insō inkhat kha kae tia. Kei hi Israelhei ratha kaneitak Pathen eng kha kae tia anhong manhret sik jo eng.”