Read Komrem ISAIAH 5 Bible Online

ISAIAH 5 - Komrem bible

ISAIAH 5

¹Hiva hla hi kasak pek lai che rangei roh, kaṭhōnpa leh avomhrui rahōn hla kae: kaṭhōnpa’n vomhrui rahōn inkhat anei, ralei ṭhatna hmebung chunga.

²Ama’n ralei kha akaker a, hlung alosōt hei; ama’n vomhrui kaṭhapen kha aling. Ama’n ahrungna sik berte ado, rachina sik khur kōk inkhat acho. Ama’n vomhrui thei kha ahmin sik ahngâk tâk-kha athei rakip kha kathûr jo.

³Khava jâra, tûnchu kaṭhōnpa’n ati, “Nangni Jerusalem leh Judah a ka-om hei, kei leh kavomhrui rahōn kara ṭong atanpek ruh.

⁴Hiva rahōn sik a hin katloṭhe heikhat aka-om jo mo? Achang inchu heisik a mo, kei inhōrna, vomhrui thei kaṭha inra loa akathûr jôk a’nrasōt hi?

⁵Ke’n kavomhrui rahōn chunga katlo sik kha hi kae; akimvea rape kalosōt sik, akhârna hlung bang hi kavōk manchim sik, ramsha he’n sâk jo hei sona chōn rachi jo hei rasoh.

⁶Kahar kha kamanbuksi sik. Abâk-hei manhleng mak jo ning, akung um mavurmak jo ning; khava nek a, phibuk leh rahling chap in kabuksi jo rasoh. Sumtuk in achunga khō amansûr sik kapha, kakhâm sik jo.”

⁷Israel hi Chunghnung RŌNGPU vomhrui rahōn kha kae; Judah phunghei kha vomhrui aling hei kha kae. Ṭōn kaṭha antatlo sik a anchunga a’nhōr kae, tâk-kha khava nek a mi anthat a kae. Ṭōn kadik antatlo sik a anchunga a’nhōr kae, tâk-kha antamanrim hei kha’n, ṭong kadik tanna sik a ka-ông jo hei.

⁸Nangni inhmang jo chei! Nangni’n nanneina chunga inn leh hlei nanrachôksa. Inrangtak a khava khan tûte omna sik hmun neimak hei ning; khava ram a khan nabing rōk a ka-om sik che.

⁹Chunghnung RŌNGPU tahri kha ke’n kathei, “Hiva innpui kalen akaṭha hei hi akarōk, a’nsetsō hongkachang sik hei.

¹⁰Ram hectare 10 a vomhrui theitui litre 8 rōk kasōk sik. Hmuchi kilograme 180 in kilograme 18 rōk kara kasōk sik.”

¹¹Nangni inhmang jo chei! Nangni jîngkâr hmatak ju ka-in sik kathōi chei, khana khōhlei kasôttak ju inrui cheia kae.

¹²Nanrehōi pha, serângdâr leh rōsem khana bunglir manhring sik nannei hei, khana ju in sik nannei. Tâk-kha RŌNGPU’n heimo atlo manhret mak chei,

¹³khava jâra nangni rehringa antakeisôn sik chei kae. Nanhlam kakeihei sâk loa kathi sik hei, khana mipui he’n tui kahrea kathi sik hei.

¹⁴Kathi ralei khan anmani arangei jo hei, khana abei kha aman-ânga kae. Jerusalema akalen akahrâng hei leh rasa katam mipuihei amadehlon hei.

¹⁵Mi rakip rahmingset manchen sik hei kae, a’nlensak seng suk manhnem sik hei kae.

¹⁶Tâk-kha Chunghnung RŌNGPU’n akadik kha atloa alenna kha amalâr, khana amihei ṭong atanna a’nthengna kha amalâr.

¹⁷Khōpui inset hmun a khan kemōngte leh kete he’n phi ansâk sik.

¹⁸Nangni inhmang jo chei! Nangni nansetna inphut sōksōt tor mak chei.

¹⁹Nangni’n nanti, “RŌNGPU’n atlo sik a ahri kha, nihmuna sik a, inranga tlo jo rasoh. Israelhei Pathen intheng khan aṭōn mantluk kha rôn sōt jo rasoh; ama lungria amandon kha eini’n en jo rih.”

²⁰Nangni inhmang jo chei! Nangni’n akaṭha kha ṭhamak, khana akaṭhamak kha kaṭha nanti. A’nthim kha akavâr, akavâr kha a’nthim nanmanchang. Nangni’n, akakha kha akathlum, akathlum kha akakha nanmanchang.

²¹Nangni inhmang jo chei! Nangni akasinga inngei tō chei, khava jâra kalip chei.

²²Nangni inhmang jo chei! Ju likli hnenga mi kahrânghei! Ju manhei nanhong in pha, akangarsō leh ṭitna kase hei!

²³Tâk-kha sêrmarûk heikhat jâra ṭhena kanei kha nanmasō, ṭongdik kachen sik ṭhenakase mi kha, nantinga kae.

²⁴Khava jâra, tûn, kahar kachâr leh sapôt hmeia kakâng kapōa, narajung kachâr sik, napârbō invōi sik khana thli’n asêmsōt sik, ajârchu nangni’n Chunghnung RŌNGPU Israelhei a’ntheng Pathen ṭong mantheina me kha lomak chei.

²⁵RŌNGPU kha amihei chunga ahnuk kana, khana karâkna sik a abân arazit a kae. Tlângbung innok sik hei, khana akathi kalōnghei kha hlampuia inchap dâk a indahlon sik hei. Kha achang inum RŌNGPU hnuknat kha labâng mak ning, karâkna pekna sik a abân alakalek hi sik a kae.

²⁶Ram kahlatak a jât inkhat bekna sik a RŌNGPU’n mêrchîkna inkhat apek sik. Raleichung a’nchaina inphut ahongna sik a tumphir atum. Khana khan anmani inranga leh kayâng tak a kahong hei!

²⁷Tûte inkhatbek akatlasam om mak hei; tûte inkhat inpai intluk mak hei. Anmani inngui mak hei, jemak hei. Ankhônkir inthe inkhatbek om mak; ankekōk hrui inkhatbek um antan om mak.

²⁸Anthe kangei, ansai kâp sik a intluk ṭhak hei. Anshakor ke matin hei hlungvâr kangar ka-ang hei; anshakor gâri kâng hei thlisip inher kapō ka-ang.

²⁹Anremihei ông rasa kha shabakkai he’n ramsha anthat pha tûte inkhatbek inum akasut tor makna hmun a antatlensōt a a’nhrung kha ka-ang.

³⁰Khava kani kha ahong tlung pha, anmani’n Israel chunga tui-ôngpui rasa kapōa inhrung sik hei. Hiva ram hi enruh! Khōdengthei leh inthimna kae. Inthim in vâr kha amade jo.