Read Komrem ISAIAH 54 Bible Online

ISAIAH 54 - Komrem bible

ISAIAH 54

¹Jerusalem, nang hi sa kaneimak nuhmei kapō leikachang che, tâk tûnchu inpâk a hla nasak a ka-ông thei jo che. Tûnchu nang in sa katamchet nanei sik jo, apuise’n adahlon jenmak nuhmei kanek a!

²Na-omna pōn-inn manlensa roh; ahrui khitna manseisa roh khana uchup kha manhnet roh!

³Naramri kha ramkei rakip a natet manlen chet sik kae; tuna jât-hlop hei tahlō ram hi nami he’n antachen male nôk sik kae; tuna dahlona ka-om khōpuihei kha mi akasiptak sik hei kae.

⁴Ṭimak roh, nang avea inzakna inpek mak jo tin. nang sukmanhnema inda mak jo tin che. Nang in nuhngâk hmōither laia taksenthei nachang makna, khana nang in renghmeinu inkhat a binga na’nvaina kha namahngi sik jo.

⁵Nakasyempa kha nang sik a napuise kapō kachang sik jo, Chunghnung RŌNGPU kha ama rahming kae. A’ntheng Israel Pathen khan nang ahuk sik che, ama kha raleichung pumpui vaikarôn kha kae.

⁶Israel, nang hi hmōither kapō che kae, apuise’n adahlona malung inrimtak a ka-om kapō che kae. Tâk RŌNGPU’n abek male nôk chea ahri:

⁷“Pha bongkhat sik a ke’n nang kaleidahlon jo che; maritna inritak a kaṭhōi male nôk sik che.

⁸Ke’n pha bongkhat sik a hnuknat a le’nhesōt jo eng, tâk ahei tik a sik a kalungsetna kha kamanhmu sik che.” Khang’khan nakahuk inhring RŌNGPU’n ahri.

⁹“Noah phalai khan kei le’ntep eng raleichunga tuishânglen nôk hêrmak ning tia; ke’n nachunga hnōmmakna leh karâkna neimak jo ning. Ke’n naṭhena chunga raseimak jo tin, achangmak leh karâkna pek mak jo tin.

¹⁰Tlâng leh hmebunghei kha ahar ahara kakōi thei, tâk kalungsetna che hichu ahei tik chen a tlangmak ning; ke’n lung mōngna sik a ka’ntepna kha ahei tik a katlosōt sik.” Khang’khan nan-inlungset RŌNGPU’n ahri.

¹¹ RŌNGPU’n ahri, “O Jerusalem, a’nreng nang, inṭangpui kaneimak khōpui, na’nthlem sik tûte aka-om mak jo nang. Ke’n hlung mankatam vânga na-innhmun kasyem manther sik.

¹²Na-inn chunga berhei kha ke’n rubi lung vâng kasak sik, Nakekot kha hmei kapōa akavâr hlung vânga, khana nakimvea nakurbanghei kha hlung mantam vânga kasyem sik.

¹³“Kei khet in namihei kamanthei sik hei, khana neina leh lung mōngna kapek sik hei.

¹⁴Ṭongtan kadik leh omchen kadik khan amanhrat sik che. Suk manrimna leh ṭitna heia inphut huk sik che kae.

¹⁵Tu mo inkhat in nang abuhlu che’nchu kei manhret loa atlo kae; Tu mo inkhat in nang kadōia re kasō kha akatlu sik kae.

¹⁶“Ke’n thir kakhengpa kha kasyem kae, hmei insûk sik a re hmangchâk kakheng sik a Ke’n remi kha’m kasyem, mi thatna re hmangchâk akahmang mi kha.

¹⁷Tâk-kha hmangchâk inkhatbek in nang atôn tor mak tin; nang maherna kaneihei seng kha anmasôna inkhat naleinei sik a kae. Ke’n kasōk-hei kha kahrung sik hei, khana retorna kapek sik hei.” RŌNGPU’n ahri jo.