Read Komrem ISAIAH 57 Bible Online

ISAIAH 57 - Komrem bible

ISAIAH 57

¹Mikaṭha kathihei, khana tu inkhat in heikhonga mo ti manhret mak hei khana khôk sakmak hei. Tâk-kha anmani anthi pha, insuk inhmangna khan anmani tôn tor mak hei.

²Hringkhō kaṭha kahmang hei kha mōngna leh inhngatna anchen joa kae.

³Nangni mikaset-hei, nanṭong tanna sik a hong ruh! Nangni dôi kachoi, mikajông leh notinu kanek a akaṭha changmak chei.

⁴Semtlo hōina kaneihei nangni tu chei mo? Maleiseia mi innuisō hei nangni tu chei mo?

⁵Nangni thingkung intheng thōia taksa inchun cheia saneina pathen kha nankamuk a kae? Khana tuidung panga hlungkōk a nansahei inthoina nantōk a kae.

⁶Nangni’n khana inphut hlung inne hei nanhrut a pathena nankamuk hei. Anhnenga inthoina ju nansun khum khan sachi hmuchi inthoina nanheichoia kae. Hihei seng chunga hin kamalung katlai sik tia nantamandon mo?

⁷Nangni tlâng inshâng chunga a’nthōi sik a leh taksa inchun sik a kase chei.

⁸Nangni mater ka-om limsyem kha nan-inn hmatinga kot kahnung heia nanmatung hei. Kei nanhlonsōt enga kae; nanpōn nander nansōt a nanlungset nu, nangni leh nanta jepuinu kha leh nanrakhum kalen chunga kake chei. Nanta madu nanta rangei pui nanmathluk.

⁹Nangni’n marim katui leh thai nan-in no khana Molech pathen inmuk sik a kase chei. Kamuk sik a pathen kajōng sik a, ram kahla tatak a, kathiram katlunga mi nantir hei.

¹⁰Pathen ralak-hei jongna nangni kachâmneng chei, kha’num nangni bângmak chei. Nangni mater ka-om limhei khan hratna apek ung tia nanmandon, khava jâra tlâksam hêrmak chei.

¹¹RŌNGPU’n ahri, mahngina nantanei, khava ṭitna nankape pathenhei kha tuhei mo? “Nangni’n kei hneng maleisei nanhria, khana kei hi nanmahngi cher jo eng. Ke’n pha kasôttak sip katia ka-om jâra kei hneng kajana pek sik kha akahai jo chei mo?

¹²Nangni’n naṭōntlo kha kadik tia nanmandon tâk-kha ke’n nan-omchen kha kamalâr sik, khana nansyemlim hei khan huk tor mak chei ning.

¹³Nangni’n inthōpuina sik a nanṭap pha, khava nanlimsyem hei khan huk chei rasoh! Thli kahrâng in atlensō sik hei! Tâk kei kataksenhei khachu ram a khan ka-om sik hei khana kabek-inn shunga ankamuk sik eng.”

¹⁴RŌNGPU’n ahri, “Kamihei kha kahnenga he’nle hei rasoh. Anhlama insuk-inpaina hei seng kha losōt ruh. Hlamlen syem ruh, khana mantluk dek ruh.

¹⁵“Kei a’nshâng leh a’ntheng Pathen, ahei tik a akahring ṭhak eng kha kae. Kei a’nshâng leh a’ntheng hmun a ka-om eng, tâk a’nsir hei leh a’nsinsak hei, anmani taksenna leh inhōrna kha mannei nôkna sik a, mihe’m ka-omsap pui hei.

¹⁶Kamihei hringna kapek hei, khana anmani maset pek manjôn mak ning, anchunga kahnuk mannat ṭhak mak jo ning.

¹⁷Kei, anmani setna leh anphâmhrai set jâra anchunga kahnuk leikana, khava jâra ke’n karâkna kapek heia kaleidahlon jo hei. Kha’num anmani anracham kasea antamadudu antloṭhak a kae.

¹⁸“Ke’n an-omchen tlo kahmu hei, kha’num anmani kaman dam sik hei. Ke’n anhlam kakei sik hei, khana ka’nthōpui sik hei, khana a’n-ôi hei kha lungmōng kathlâk sik hei.

¹⁹Ke’n akahla leh akahnaia aka-om hei seng hneng lung mōngna kapek hei! Kamihei kaman dam sik hei.

²⁰Tâk-kha mikaṭhamak-hei khachu tui-ôngpui in-nông a’nhnga jenmak, akabōk karôn sōt kapō hei kae.

²¹Mikaset-hei sik a hring leh damna sik om mak,” RŌNGPU’n ati.