Read Komrem ISAIAH 58 Bible Online

ISAIAH 58 - Komrem bible

ISAIAH 58

¹RŌNGPU’n ati, “Nator chenna ông roh; kami Israelhei kha ansetna chungchânga manthei hei roh.

²Anmani’n ani katai ankamuk eng, kadânhei anjui hnōm khana kahlam anmanhret hnōmhêr anti. Dân intheng kapek sik heia kanmadu anti khana kei kamukna chunga anmani’n kahōi ansak anti.”

³Mihei kha’n inder heia, “RŌNGPU’n athei hêrmak sik me achang inchu heisik a mo thlai nihngōi sik? Ama’n heitea ateimak sik me achang inchu heisik a mo bu sâk loa akase sik me?” anti. RŌNGPU’n anhnenga ahri, “Akadik khachu nangni’n thlai nanhngōi pha, nanbing maduna nanjonga nanṭōn katlohei nanmanrim hei.

⁴Nanthlai hngōi khan hnuk kase amanchang chei khana innâk-inse cheia kae. Hinghiva thlai hngōi derna nei hi ke’n karangei pek sik chei tia nantamandon mo?

⁵Nangni’n thlai nanhngōi pha, nanbinga inrengna nannei, nanlu nanmakhup a kahar kapōa ka-om chei, khana borapōn nanpha a ravut nankathek khuma achunga kaje chei. Khavakha thlai hngōi a’nti mo? Khava khan kei malung katlai sik tia nantamandon mo?

⁶“Ke’n kamadu thlai hngōi khachu hi kae: inrengna thirhrui leh akadik mak rake kha hlonsōt ruh, khana suk manrima ka-om kha ning leh hnōma se rasoh.

⁷Nanbu kha von kaṭâm hneng insempui ruh khana inn kaneimak sara kha nan-inna mathlung ruh. Pōnsi derkei kaneimak hei kha pōn pek hei ruh, khana nan-innkō inthōpui sik a hnōm mak tlomak ruh.

⁸“Khava sōa kalungsetna chei kha jîng nisō kapōa nanchunga jōng kavâr sik, khana nannatbi kha inranga kadam sik jo. Nangni kahuk sik a ka-ompui ṭhak sik chei; kei om khan nangni ramkei rakip a ahrung sik chei.

⁹Nangni’n nander pha ke’n kamasôn sik chei. Nangni’n nannibek pha, kamasôn sik chei. “Nanmi suk manrimna, mi hnōisena ṭonghri rakip, khana ṭong kaṭhamak rakip hei kha nanbâng inchu;

¹⁰von kaṭâm hei thlai nanpek heia khana akachâm hei nanmantlai he’nchu, nankimvea a’nthim kha sûn khōvâr kapō hongkachang sik jo.

¹¹Khana ke’n ahei tik a hlamkakei sik jo chei khana akaṭha neinâk vânga kamantlai sik jo chei. Ke’n nangni kamanhrat sik chei khana kamanhōi sik chei. Nangni tui katamtak omna, akakang hêrmak tuiripût ka-ang sik jo chei.

¹²Nanmi he’n pha kasôttak a alenṭhōt jo hei kha ansak manther sik, innhmun marōa khan ansak sik jo. Nangni kha kurbang kasyemther hei leh ale’nset inn kasakther hei tia mi’n amanhret sik jo chei.”

¹³RŌNGPU’n ahri, “Nangni’n serning kani kha a’ntheng inkhat a nanhmang inchu khana khava ning kha nanbing maduna jongna nanhmang mak inchu; kei kani intheng kha kakhôktak a nanloa lônlena neiloa nankaja’nchu, khana khava ning ṭōn tlo loa ṭongchôi hrina nannei mak inchu,

¹⁴khan chu nangni’n kei nanrazenna jâra inphut inpâkna akajōng kha nanrahlâng sik jo. Ke’n raleichung pumpuia mihei takaja sik a kasyem sik jo chei, khan chu nanpu Jacob hnenga kaleipek ram shunga kahōia ka-om sik jo chei. RŌNGPU ke’n kahri jo kae.”