Read Komrem ISAIAH 59 Bible Online

ISAIAH 59 - Komrem bible

ISAIAH 59

¹RŌNGPU kha nangni hukna sik a akatlasam hêr kae tia lomak ruh a-emak leh inṭangpuina sik nanbekna akatheimak sik a akōr kaset hêr tia mandon mak ruh!

²Nansetnahei jâra ama’n nanṭong athei mak kae. Nangni’n ama kamukna sik nanrei pha Pathena inphut nankaṭhensōt kha nansetna kha kae.

³Nangni maleisei, hnuk kase, khana mikathat ṭhena kanei chei kae.

⁴Nangni ṭongtan hmun a kase chei, tâk nanlangting ṭongdik chenmak chei. Nanṭong kha atorna sik a maleiseia in-ngai chei. Milak mantônna sik a nanṭōn mantluk kha nantlosōt a kae.

⁵Ṭōnse nantamantluk kha mari tûr inhnaktak thinathei ratui kapō kae. Ratui kha vōkkhōi ruh, mari heikasōksōt sik! Tâk-kha nanmantlukna khan nansik a akaṭha tlosōt mak ning, khahei kha maimôm patchâng kapōa hnemmak ning.

⁷Nangni ahei tik a ṭōn kaṭhamak rōk nanmantluk, khana khava tlosōt sik kha nanhngâk hla. Ṭhenakase hei thatna sik malung inkei-chiona neimak chei. Nansena hmun rakip a mansetna leh manhmangna kha nanda hlona kae,

⁸khana nangni lengna rakip a tûte inkhat inhukna om mak. Nantatlo rakip akadik mak rōk kae. Nangni hlam inhek a kase chei khana nansena hlam kajui mihei kha inkhatbek in inhukna chenhêr mak ning.

⁹Mihei khan anhri, “Tûnchu Pathen in keini anikasuk inrim heia inphut ahuk mak jo ung hi heijâra mo ti keini’n kanmanhret jo. Keini’n lônna sik a vâr chen sik a inhōr ung, tâk hinahin inthim rōk kha ka-om,

¹⁰khana keini hmitkacho kapōa inhmeia kase ung. Jân kapōa, kathirama aka-om ung kapōa, Sûnṭim laia inpai ung.

¹¹Keini anmaṭhit ung khana inrim ung. Akadik mak a leh inrimna inphut a ani kahuk sik a Pathen kanrangei jo, tâk heite sōk mak.

¹²“RŌNGPU, nang kadōia kanṭhena katamtak ka-om. Kansetna khan amaher jo ung. Keini’n khahei seng kha kaṭha nenga kanmanhret jo.

¹³Keini’n nang kan-inrepui jo che, kahlonsōt jo che, juihnōm mak jo che ung. Milak kansuk manrim heia nanga inphut inhesōt ung. Kanlei mandonna kha kanṭhe jo; kanṭong beisō maleisei kae.

¹⁴Ṭongtan kadik kha kanhnongsōt jo, ratha neina kha kanhnenga hongtor mak jo. Akadik kha khōtlânga inpai inthlûk jo, khana malung intheng kha khana khan hmun chenmak jo.

¹⁵Malung intheng hi om mak jo ti chu ṭōnse tlona a’nkhâm jo hei kha’m anṭhena jâra mi inreng kachang tlit nôk heia kae.” RŌNGPU’n hivahi ahmu, ṭong kadik inti kha a-om mak jâra amalung tlaimak.

¹⁶Suk manrim hei inthōpui sik mi tûte ahmu mak jâra inlak asak a kae. Khava jâra anmani huksōtna sik leh re kha atorna sik a ama’n arathahrat ahmang sik a kae.

¹⁷Ama’n ṭongdik kha zakkō kapōa khana huksōtna ratha kha lukhu kapōa revona avon sik. Ama’n heirakip mandikna sik a khana mihei inrengna katlo chunga karâkna leh phuhlōna sik a, rahnak a tlo hnōmna kha pōn kapōa invon sik jo.

¹⁸Ama’n a’ndōipui hei kha anleitlona dungkajuia karâkna apek sik hei, ram kahla aka-om hei kapha kha’m.

¹⁹Nisōa inphut tlaitlâk katlunga mi rakip in ama leh aratha hratna kha anṭit sik jo. Ama kha tuidung alōng inhnak leh thlipui inhnaktak kapōa kajōng sik.

²⁰ RŌNGPU’n amihei hneng ahri, “Nansetna inphut ahong inhe jo nangnihei seng kahrung sik a leh kahuk sik a kei Jerusalema kahong sik eng.

²¹Khana ke’n nangni leh intepna inkhat kasyem: ke’n karathahrat leh kaman theina ahei tik a nangni sik a kapek jo chei, khana tuna inphut nangni’n kaṭong nantajui sik khana akahong sik pha rakip a kei juina sik a nansahei leh nansōn nanpâr hei nanta manthei sik hei kae.”