Read Komrem ISAIAH 6 Bible Online

ISAIAH 6 - Komrem bible

ISAIAH 6

¹Rn Uzziah thi kum a, ke’n RŌNGPU kha kaleihmu. Areng in-ongna hmun a kalûrtak a choi ka-ânna le’n ong khana azakkō ret ra-âng khan Bek-inn kha aser manvâr pet a kae.

²Ama kimvea hmeimale kasûk ranhring kangir hei, inkhat et in mathla karuk sasâm annei. Ranhring inkhat et in ahmai kha amathla 2 vâng amakhu khana ataksa kha mathla 2 vâng amakhu, mathla ahlop 2 khachu jōngna sik a ahmanga kae.

³Anmani inkhat leh inkhat inbek hei: “A’ntheng, A’ntheng, A’ntheng! Chunghnung RŌNGPU kha a’ntheng kae! Ama lûrna’n vânhnōi ralei kasip sō,” anti.

⁴Ankare rasa khan Bek-inn innhmun kha akatlir mannok khana Bek-inn khet kha hmeikhu amansip.

⁵Ke’n kati, “Kei sik a inhōrna om mak! Kei inhmang jo eng ajârchu kabeia ṭong ahei kasōk rakip setna kasip, khana setna kasip ṭongkahri mihei kâra kei ka-om eng. Kha’num Reng RŌNGPU Chunghnung kha kahmu jo!!”

⁶Khava pha ranhringhei kâra inkhat in maichâma hmeira-ê in-ât inkhat cheiche vâng akachep a kahnenga heikajōng.

⁷Ama’n hmeira-ê in-ât vâng khan kahner amanroa ahri, “Hivahin nahner atôn jo, tûnchu naṭhena om mak jo, nasetna rangei mandam jo che kae.”

⁸Khava pha, ke’n RŌNGPU tahri kathei, “Ke’n tu mo katir sik? Tu’n mo eini tirle akae sik?” Ke’n kamasôn, “Kei kase sik eng. Kei atir roh!”

⁹Khava jâra ama’n kei kase leh hiva ṭong hi mihei hneng kavahrina sik a amanthei eng, “Nangni’n ṭong kha heilai nanrangei inum, manhret mak tinnei. Heilai nan-en inum, heimo akasōk manhret mak tinnei.”

¹⁰Khava sōa ama’n kahnenga ahri, “Hiva mihei hi anhmu makna sik, anthei makna sik leh anmanhret makna sik a, rathasetna pek hei roh. Kha achangmak inchu, kahnenga he’nhe sik hei khana manthengsōt kachang sik heia kae.”

¹¹Ke’n kader, “Hivahi heituk mo alakasôt sik, RŌNGPU?” Ama’n amasôn eng, “Khōpuihei a’nhmangsō leh akarōk a a-om mak hma seng, innhei kha mi inkhatbek an-om mak kârseng, ram hi’m hleichi kachâr achangmak kârseng sik kae.

¹²Ke’n mihei hi ram kahlatak a katirsōt sik hei khana ram pumpui hleichi kachâr kamanchang sik.

¹³Mi 10 shunga inkhat akathi inhlei a-om inum, ama kha’m suk manhmang sik kae; ama kha sasōkung tuktansa akungmui ka-ang sik.” (Thingkungmui hin Pathen mihei athera hong inphutna manhmuna inkhat kae.)