Read Komrem ISAIAH 61 Bible Online

ISAIAH 61 - Komrem bible

ISAIAH 61

¹Chunghnung RŌNGPU’n arathla intheng amansip eng. Ama’n kei akadei enga atir eng, Sarahei hneng ṭong kaṭha karôn sik, Malung kakōi hei indam sik, Rehringa khum hei masōsōtna kaphông sik, Khana kurkhum a ka-om hei ning leh hnōma masōna sik.

²RŌNGPU’n amihei ahukna sik Khana An-inrepuihei antorna sik Apha kha hong katlung jo tia kaphôngle sik a ama’n kei atir eng Ama’n kei malung inrima ṭajai kasui hei lungmōng kathlâk sik a atir eng.

³Ziona ṭajai kasui hei hneng Inrengna kahlanga inpâkna leh ningṭhatna kapek sik, Inrengna kahlanga manpâkna hlasakna sik a ajōngtir eng. Anmani RŌNGPU ama khet in aling mankhang Thingkung kapō kachang sik hei. Anmani ankhenga akadik kha antlo sik jo, Khana Pathen kha atlona hei seng jâra manpâk a ka-om sik jo.

⁴Anmani’n pha kasôttak a a’nset jo khōpuihei kha ansak manther sik hei.

⁵Kamihei, ram hlop mihe’n anrazen sik chei. Anmani’n nanserup hei anching pek sik chei, Khana nanhlei anthlō pek sik chei khana nanvomhrui rahōn anmanhleng pek sik chei.

⁶Khana nangni RŌNGPU thempu, ni-Pathen sōk-hei tia anmanhret sik chei. Nangni’n jât-hei nei leh hao hei kha nanhōi pui sik. Khahei kha nanta achang jâra inlensak sik jo chei.

⁷Nangni inzakna leh hmeset nanchenna kha kabâng sik jo. Nangni nanrama ka-om sik jo chei, Khana nannei kha sem hnia hong kapung sik; Nan-inpâkna kha inchaitik neimak jo ning.

⁸RŌNGPU’n ahri, “Ke’n ṭongdik kamadu khana mi suk manrimna leh dân kaler kamater. Ke’n kamihei kha taksentak a inpâkman kapek sik hei. Khana ahei tik a sik anmani leh ṭong intepna inkhat kasyem sik.

⁹Anmani jât-hei kâra anrahming inthang sik; Ke’n anmani mahâmṭhat kapek mihei anchangna hi Ankahmu mi rakip in anhong manhret sik.”

¹⁰RŌNGPU’n atlo pekna hei jâra khan Jerusalem kha inpâk jo. Amanu kha luhông sik a a’nret hmōinu kapō kae. Pathen in amanu kha huksōtna leh retorna ret a amanret jo.

¹¹Hmuchi kha ahong kakek a ahong hmôngsōt kapōa, Chunghnung RŌNGPU’n amihei ahuk sik hei. Khana jât rakip in ama anmanpâk sik jo.