Read Komrem ISAIAH 63 Bible Online

ISAIAH 63 - Komrem bible

ISAIAH 63

¹“Tu mo Edom ram a Bozrah khōpuia inphut a akajōng hi? Tu mo songhrep a ret kasen vânga kalûrtak a a’nvon, ratha hratna leh ngarna inṭhōia ahong injôk so?” Ama hi RŌNGPU, huksōtna sik a ratha kahrat, aretorna akahri inthang sik a akajōng kae.

²“Mi inkhat vomhrui ju kasyem sik a vomhrui thei achōn rachi jo kapōa, heisa mo apōnsi songhrep a akasen so?”

³ RŌNGPU’n amasôn, “Ke’n vomhrui thei chōn rachi kapōa jât-hei kachōn rachi hei, tûte inkhatbek kei inṭangpui sik a hongmak. Ke’n hnuk kana tak a kachōn rachi hei, khana anthisen khan kapōnsi hi achu mansen joa kae.

⁴Kamihei huksōtna sik apha jo kae tia kamandon jo; anmani inrepuihei karâkna pekna sik pha kha jōng katlung jo.

⁵Ke’n inṭangpui sik ka-ena tûte kahmu mak jâra inlak kasak. Tâk-kha kahnuknat in amanhrat enga, keitak in retorna kha kanei jo.

⁶Kahnuknat a jât pumpui kachōn rachi heia kakathek jo hei. Ke’n anhringna thisen kha raleichunga kasun mathlâk jo.”

⁷Ke’n RŌNGPU lungsetna akatlasam mak kha kahri sik; Ama’n eini sik a atlopek me rakip jâra kamanpâk. Ama’n Israel mihei kha katluk set a mahâmṭhat apek jo hei ama maritna leh a’nthleng mak lungsetna jâra khan.

⁸RŌNGPU’n ati, “Anmani kamihei kae; anmani’n ahōn mak hei ning.” Khava jâra ama’n anmani ahuk jo hei

⁹ankhōdeng theina rakip a inphut. Khavakha marvân ngeva inkhat changmak, tâk ankahuksōt RŌNGPU ama khet kha kae. Ama lungsetna leh lungkhamna khan ahuksōt hei kae. Ama’n hmalaia inphut aleitinta ṭhak heia kae,

¹⁰tâk-kha anmani’n an-indōipui khana ama rathla intheng kha amalung anmanchâm pek. Khava jâra RŌNGPU kha ankadōi hong kachanga anchunga re ajōng tloa kae.

¹¹Tâk-kha khava sōa anmani’n, RŌNGPU sōk Moses kanilaia pha kasesa kha anmandonsōt a kae, khana ander, “Tuipuia inphut amihei hlamkakeihei kahuksōt RŌNGPU kha tunhin khon mo aka-om? Moses hnenga arathla kapek RŌNGPU kha khon mo aka-om?

¹²Aratha neina vânga Moses inphut ṭōn kalen katlo, tui-ôngpui kasuṭhen, amihei tui inthûk shunga akaṭhōisōt, ahei tik a rahming inthang chenna kanei RŌNGPU kha khon mo aka-om?” RŌNGPU’n aching heia anmani kha ram shakor kapōa kethon inchak hei, khana tluhêr mak hei.

¹⁴Ranhei thlai ṭhatna phaichama ṭhōi manhlut hei kapōa, RŌNGPU’n amihei kha châmhngatna apek heia kae. Ama’n amihei kha aṭhōi heia ama rahming kajana arôn sōt a kae.

¹⁵RŌNGPU, kalûrtak a leh inthengtak a na-omna marvâna inphut ajōng enroh; keini sik a khomo nakhôk sakna ung aka-om? Khon mo naratha hratna aka-om? Khon mo nalungsetna leh namaritna aka-om? Keini donloa adamak roh.

¹⁶Nang kanpa che kae. Kanpu ṭhut Abraham leh Jacob in keini amanhret mak hei, tâk RŌNGPU, nang kanpa che kae, pha rakip a kan-intlen sōtpa che kae.

¹⁷Heisa mo nahlam a inphut namanvai jo ung? Heisa mo keini ṭong kajuimaktak, nanga inphut a’nhesōt inkhat a nasyem ung? Nang inzenhei jâra, ahei tik a nami akachang jo mipuihei jâra jōng inle roh.

¹⁸Keini, nami intheng ung hi, kan-inrepui he’n pha bongkhat sik a anhnongsōt jo ung: nahmun intheng kha antam rachi jo.

¹⁹Keini hi nami aleikachang hêrmak ung kapōa, nang kanvai karôn aleikachang hêrmak che kapōa, narazen jo ung.