Read Komrem ISAIAH 65 Bible Online

ISAIAH 65 - Komrem bible

ISAIAH 65

¹RŌNGPU’n ahri, “Kamihei derna masônna sik inrin ṭhak eng, tâk anmani’n derna neimak hei. Kei anmani tahmu sōt sik enga intluk eng, tâk anmani intluk mak hei. ‘Hin ka-om eng, ka’nthōpui sik chei,’ tia masôn sik a ka’ntluk ravâng, hiva jât he’n kahnenga adermak hei.

²Kei kamihei malung kasak, akadik mak tlo leh antamadu-duna akasesōt hei rahlângna sik a intluk ṭhak eng.

³Anmani’n inzak lojenna kahnuk natna sik antloṭhak a kae. Anmani rahōn inthenga khōvelhei inthoina khana maichâma marim kahōi antōk a kae,

⁴Jân pha anmani khur kōk leh thlân heia akathihei rathla leh inbek sik a kase hei. Anmani’n khōvelhei inthoina tōkna vok-hme ansâk a khana hmea inphut a’nsyemsōt antui an-ina kae.

⁵Khava sōa anmani’n milak hneng anhri, ‘Ahnai mak ruh, keini a’ntheng hêr ung kae, atôn mak ruh!’ anti. Kei khang khava mihei hneng ngir tor mak eng, anmani dōina kahnuknat kha hmei kasûk akathi hêrmak kapō kha ka-ang.

⁶“Ke’n anmani karâkna pekna sik a kaleimantlukdek jo, khana anṭong mathlâkna kha inzet jo. Anṭōn tlohei kha inhmu hlemsak mak jo ning, tâk tloman kapek sik hei,

⁷ansetna jâra leh anpu anpahei set leitlo jâra. Anmani’n khōvelhei tlânga kamukna heia marim katui anroa kei anhrimaset eng. Khava jâra anmani hmalaia omchen leitlona dungjuia karâkna kapek sik hei kae.”

⁸RŌNGPU’n ahri, “Tûte’n vomhrui kaṭha kha suk manhmang phungmak; Khava kanek a, khana inphut ju ansyem jôk a kae. Kei inum kamihei kha ankhenga suk manhmang mak ning, kei ani inzenhei kha kahuk sik heia kae.

⁹Ke’n Judah phunga Israelhei kha ṭhattheina vâng kapek sik hei, khana antu-ansa he’n katlang hei kha anhlō sik. Kakadeisōt kamihei, kei inzenhei kha khana khan ka-om sik hei.

¹⁰Anmani’n kei ankamuk sik eng khana ankemōnghei leh anranhei kha tlaitlâk ting Sharon Phaichama khana nisōting Bōina Phaichama ankhem sik hei.

¹¹“Tâk-kha kei kadahlon nangni, katlang intheng Zion heitea kasak mak, vângṭhat leh vângset pathen Gada leh Meni inmuk hei sik a chu ahlop kachang sik.

¹²Kabek chei pha amasôn mak chei khana ṭong kahri pha nanrangei mak jâra nangni re leh sha shunga nanthi sik kha nangnihei mahâm kha kae. Nangni’n kei ṭong juimak sik leh ṭōnse tlo sik jôk kha nankadei.

¹³Khava jâra kahri pek chei kae, kaṭong kajuia ani-inmuk hei kha sâk leh in anhao sik, tâk nangni chu nanvon kaṭâm sik khana nantui kahre sik. Anmani kahōi sik hei, nangni hmeset nanchen sik.

¹⁴Anmani inpâk a hla ansak sik, nangni chu malung kana a kaṭap sik chei.

¹⁵Kakadeisōt mihe’n nang rahming kha hâksêrna inkhat a anhmang sik. Chunghnung RŌNGPU ke’n, kathat sik che kae. Tâk-kha kaṭong kajuihei khachu ke’n rahming ther kapek sik hei.

¹⁶Tu achang inum khava ram shunga mahâmṭhatna sik akader khan Taksen Ka-om tak Pathen in mahâmṭhat apekna sik a antader sik kae. Tu achang inum intepna kanei mi khan Taksen Ka-om tak Pathen rahminga a’ntep sik kae. Hmalaia inrengna hei seng kha mahngisō pet kachang sik jo.”

¹⁷RŌNGPU’n ahri, “Ke’n ralei ther leh marvân ther kasyem. Aleikasōksa omchen marō hei kha mahngisō pet jo kae.

¹⁸Ke’n kasyemsōt jo hei chunga inpâk ruh, hōi ruh. Jerusalem ther kasyem hi inpâkna kasip sik, khana amihei kha kahōi sik hei.

¹⁹Kei khet um Jerusalem leh amihei jâra inpâk na’n kasip sik eng. Khana khan ṭapna om mak jo ning khana inthōpuina sik bekna om mak jo ning.

²⁰Naidônghei sinlai thimak jo hei ning, khana mi rakip anhringkhō kasei sik jo. Khana kum 100 akahring jo mi kha khangdônga intei sik. Hiva kum tluk hma akathi kha kei karâkna mêrchîkna inkhat kachang sik.

²¹Mihe’n inn ansak sik khava shunga ka-om sik hei, mihlop he’n hmangmak hei ning. Anmani’n vomhrui anling sik, aju kha an-in sik, mihlop he’n inmak hei ning. Thingkung kapōa kamihei hringkhō kasei sik. Anmani’n anṭōntlo rakip heia khan pui katluk a hōina anchen sik.

²³Anṭōn tlona hme ansō sik, khana ansa he’n insuksetna chenmak hei ning. Ke’n anmani leh ansōn anpârhei kha pha rakip a mahâmṭhat kapek sik jo hei.

²⁴Anmani’n kahnenga andersō mak hma ke’n anderna kamasôn pek sik hei.

²⁵Kahne leh kemōng he’n thlai ansâksap sik; shabakkai in sehrat kapōa sapôt asâk sik, khana mari he’n mi kasukset changmak jo hei ning. Katlâng intheng Zion chunga khan inhmangna leh akaṭhamak om mak jo ning.”