Read Komrem ISAIAH 66 Bible Online

ISAIAH 66 - Komrem bible

ISAIAH 66

¹RŌNGPU’n ahri, “Marvân kalen in-ongna kae, khana ralei kake man ngamna kae. Nangni’n kei sik a heikhong khova inn mo nantasak tor sik, ka-omna sik kha heikhong khova hmun a mo?

²Ke’n vânhnōi ralei pumpui hi kasyem kae! A’nsinsak a malung insir hei khana ani kaṭit leh kaṭong kajuihei chunga kei kamalung katlai.

³“Mihe’n antamadu kha antlo. Inthoina sehratche inkhat anthat a achangmak leh mihring inkhat antōk innum anmani sik a in-angtling; kemōng inkhat antōk a achangmak leh ui inkhat arîng anmahertan inum; hmuchi kara antōk a a-emak leh vōk thisen antōk inum; marim katui antōk a a-emak leh limsyem hneng ander inum thakhat hei kae. Mater ka-om tak kamukna omchenhei hi anmani’n tlaina anneia kae.

⁴Khava jâra anchunga suksetna kajōng rôn sik, antaṭitpen kha, ajârchu ke’n kabek hei pha tûte’n amasôn mak, ṭong kahri pha tûte’n rangei mak a kae. Anmani’n kei ṭong jui makna sik leh ṭōnse tlona sik jôk ankadeia kae.”

⁵Nangni aṭong kajui leh akaṭit hei RŌNGPU’n heimo ahri hi rangei ruh: “Nangni kei hneng taksenthei nanchang jâra, nanmi ṭhahrep in anhōt chei, khana nangni leh heite tlosap mak hei. Anmani’n anmanuisō cheia anhri, ‘Keini’n nan-inpâkna kha kanhmuna sik a RŌNGPU’n alenna malâr sona, huksōt chei rasoh.’ Kha’num, anmani jôk hmesetna antachen sik kae.

⁶Rangei ruh! Khōpui shunga kare inhrek, Bek-inn shunga rasa so RŌNGPU’n akadōihei karâkna apekna rasa kae!

⁷“Kakhōpui intheng hi naiha phut-loa, manhret manloa naite kanei nupui inkhat kapō kae.

⁸Tu mo inkhat in khang khava ṭong athei phung, ahmu phung mo? Jât inkhat hi ni khat rōk a a’nte aka-om jo mo? Jât-hei kha an-inte mak hma Zion in khōdeng theina desôt mak ning.

⁹Ke’n kamihei kha, nai neina khan heiṭhōi heia nai chu manneiloa kada sik hei kapōa mandon mak ruh.” RŌNGPU’n ahri jo.

¹⁰Jerusalem leh inṭhōia inpâksap ruh; amanu sik jâra inpâk ruh, nangni hiva khōpui inlungset hei seng! Tûn ama leh inpâksap ruh, amanu sik jâra ṭajai kasui hei seng!

¹¹Nangni’n amanu nei leh haona kha nanta hōipui sik kae, naidông anu netui ka-in kapōa.

¹²RŌNGPU’n ahri, “Ke’n aka-omsôt sik nei leh hao kajōng rôn pek sik chei; Vânhnōia nei leh hao kha tuidung akakang hêrmak kapōa nanhnenga jōng kalōng sik jo. Nangni kha naidông inkhat anu’n arazen, akut vâng apom, khana lungset a arazen ka-ang sik jo chei.

¹³Naite anu’n amanmōng kapōa ke’n nangni Jerusalema kaman mōng sik chei.

¹⁴Nangni’n hiva omchen kasōk hi nanhmu pha, inpâk sik chei; khava khan amanhrat sik chei, nantak amanṭhat sik. Khava sōa, RŌNGPU ke’n kaṭong kajuihei kha ka’nthōpui sik hei, khan chu kakadōi hei chunga kahnuknat kamalâr ti kha nanhong manhret sik jo.”

¹⁵RŌNGPU kha hmei leh inṭhōia kajōng sik. Ahnuk natna mihei chunga karâkna kapek sik thlipui mathla kha ajōng chōng sik.

¹⁶Raleichunga mi akaṭhe ahmu rakip hmei leh chemjâm vâng karâkna apek sik, mi katamtak athat sik heia kae.

¹⁷RŌNGPU’n ahri, “Khōvelhei kamukna sik a’nsuk intheng hei, rahōn inthenga injôk a kase hei, khana vōk hme leh maju khana mater ka-om thlai kasâk hei sik a pha inchaina kha kahnai jo.

¹⁸Ke’n anmani tamandon leh anṭōntlo kha kamanhret. Jât rakip mi manchunna sik a kajōng sik eng. Anmani anhong inchun pha, kei rathahrat tlotorna kha anhmu sik

¹⁹khana anmani karâkna ankapek kha kei eng kae tia anmanhret sik jo. “Tâk-kha anmani ṭhahrep kaṭhen sik hei khana jât-hlop hei leh ram kahlatak a kei rahming inthang alakathei mak hei, kalûrna leh kalenna alakahmu mak hei hneng katir sik hei: Spain, Libya khana Lidya leh anthe kakâp kathemhei hneng khana Tubal leh Greek ramheia. Hiva jât-hei kâra kei lenna kha anphông sik a kae.

²⁰Anmani’n nansap Israelhei kha jât-hei kâra inphut kei hnenga kutchoi kapōa anta heiṭhōi male sik hei kae. Anmani kha Israel he’n Bek-inna tōk sik hmuchi beklanga a’ntheng atena heia anta heirôn kapōa katlang intheng Jerusalema hin, shakor, shakōrtung, sharîngsei chunga khan chu shakor gâri chunga anta heiṭhōi male sik hei kae.

²¹Ke’n anmani ṭhahrep thempu leh Levi a kasyem sik hei.

²²“Kei ratha hratna vâng ralei ther leh marvân ther hei aka-omsôt sik hei kapōa, nansōn nanpâr hei leh nanrahming ka-omsôt sik.

²³Thlather revei ning leh Châmhngat kani ning rakip a, jât mi rakip in Jerusalema hin kei inmuk sik a akahong sik hei kae,” RŌNGPU’n ati.

²⁴“Anmani’n anhei dahlon hei pha, kei kadōihei kathi kalōng kha anhmu sik hei. Ankathi kalōng kâra rahlunghei kha thitik neimak hei ning, khan chu anmani karo hmei kha’m thitik nei hêrmak ning. Anhme hmu sik kha mihring rakip sik a mater ka-om tak kachang sik hei.”