Read Komrem ISAIAH 8 Bible Online

ISAIAH 8 - Komrem bible

ISAIAH 8

¹RŌNGPU’n kahnenga ahri, “Mazetna sik heikhat apheng kalen lo roh; achunga amazek kalen vâng mazet roh: ‘Inranga minei kachom, Inranga suk manhmangna ke kayâng tia’.

²Khana taksenthei sâkhi mi 2, Uriah thempu leh Jeberekhia sapa Zechariah da hei roh.”

³Khava sō pha ṭhahrep kahnunga kanuhmei in nai avon jo. Kansapa kha a’nte pha, RŌNGPU’n kahnenga ahri, “Arahming hi ‘Inranga Minei kachom, Inranga Suk manhmangna ke kayâng,’ tia phō roh.”

⁴Naite khan, ‘Apa,’ leh ‘Anu’, atithei mak hma Damascus nei rakip leh Samaria neichom rakip akhenga Assyria rengpa’n anrônsō sik jo.”

⁵RŌNGPU’n kahnenga kaṭong nôk a.

⁶Ama’n ati, “Hiva mihe’n Shiloa kavadung tui kadaineng kha anmadu mak jâra, Reng Rezin leh Reng Peka hmaikunga anratha innok jo.

⁷Rōngpu ke’n Assyria rengkalen leh aremi rakip Judah re kasō sik a kajōngṭhōi sik. Anmani kha Euphrates Tuidung in tui alen pha tuipang achûmsō kapōa hongkahlut sik hei.

⁸Anmani tuikalen in nidâr katlunga achûma heirakip amakhusō kapōa, Judah ram shunga heikahlut sik hei.” Pathen in a-ompui me! Ama mathla zâr thōia ram hi aka-unsia kae.

⁹Jât rakip ṭittak a intûp ruh! Ram hmun kahlatak a ka-om nangni’n, rangei ruh! Re katuk sik intluk ruh, tâk ṭit ruh. Kadik, intluk ruh, tâk ṭit ruh!

¹⁰Nanṭōn mantluk ruh! Tâk anmani hmesō hêrmak hei ning. Nanmadu chenna ṭong ruh! Tâk akhenga ahnemna kase kae, ajârchu Pathen in keini athlop unga kae.

¹¹Mihei tajui hlam kha kahro makna sik RŌNGPU’n aratha neina kalentak vâng khan agîk eng. Ama’n ahri,

¹²“Mihei ṭōnmantluk a khan inveisa mak roh, khana anmani taṭit a khan ṭitmak roh.

¹³Mandon sōt roh, RŌNGPU Chunghnungpen kei intheng eng; nantaṭit nger sik kha kei eng kae.

¹⁴Kei ṭit ka-om tak inthengna jâra, kei hi mihei inpaina hlungpui inkhat ka-ang eng; kei hi Judah leh Israel rengram khana Jerusalem mihei in-ôkna sik châng ka-ang eng.

¹⁵Mi katamtak inpai inthlûk sik hei; katlu sik hei khana insuk kachip sik hei. Anmani chânga in-ôk sik hei.

¹⁶Kasonle nangni’n, Pathen tapek eng ṭongpek nantahngâk a nantahrung sik kae.

¹⁷RŌNGPU kha ami heia inphut inthup a kae, tâk ke’n ama kataksen, khana ama inhōrna kanei.

¹⁸Hinahin, RŌNGPU tapek eng naipanghei leh kei ka-om ung. Chunghnung RŌNGPU alen in-ongna Zion Tlâng chunga intungpa khan Israel mihei hneng akahring ṭong thangkōi sik a ajōngtir ung kae.

¹⁹Tâk-kha mi he’nchu kutze ka-en hei leh rathla inbekpui hei, tla kasânhei der hei ruh, anti sik chei. Anmani’n anti sik, “Hei-achang inum, mihe’n akahring hei kahlanga, ṭong thangkōi kha rathla leh akathihei hneng antader sik kae.”

²⁰Nang in hing’hin masôn hei roh, “RŌNGPU’n amanthei chei kha rangei ruh! Rathla inbekpui mihei kha rangei mak ruh, anmani mantheina khan akaṭha kha sōk mak ning.”

²¹Mipuihei kha ram shunga kalôn inhmak sik hei, khana anmalung katla sik, anvon kaṭâm sik. Anvonṭâm leh anhnuknat jâra anreng leh an-Pathen kha anhâksêr sik. Marvân chungting an-en sik,

²²khana ralei thōiting an-en sik, tâk khō inthim leh inchokna, ṭit ka-om khō kajingpak shunga ṭhōi manhlutna tei loa heite hmumak hei ning.