Read Komrem ISAIAH 9 Bible Online

ISAIAH 9 - Komrem bible

ISAIAH 9

¹Hiva inrimna inphut a hin anmani anphesōtna sik hlam om mak ning. Zebulun leh Naphtali phunghei ram hi vōi khat inzakna achen jo, tâk hnunga chu, Mediterranean nisōtinga inphut Jordan rekhat tinga ram katlung, ram hlop mihei omna, Galilee ramkei katlung hi kajana lahong ka-om sik.

²Khō inthim thōia ka-om mihe’n, vâr kalentak inkhat anhmu jo. Anmani ram kajing rahle thōia leika-om hei. tâk-kha tûnchu vâr in anchunga asat manvâr jo.

³RŌNGPU, nang in inpâkna kalentak napek jo hei. Nang in inpâk theia nasyem jo hei. Mihe’n anhlei anlōksō pha, achangmak leh annei chom kha ansem leh a’npâk hei kapōa naṭōn tloa khan inpâk jo hei.

⁴Ajârchu anrîngke rônkahrik khana andâr jemna tîngpum nador thlek pek jo hei. Nang in namihei kasuk inrim, annei kahmangsō jât kha nator jo hei, Midian remi hmalai naleitor hei kapōa.

⁵Re kakōn hei kekōk leh thi kakop pōnsi derkei seng hmei vâng ro manvâm kachang sik.

⁶Naidông inkhat a’ntet pek jo me! Sapa inkhat apek jo me! Khana ama kha nivai karôn sik kae. Ama kha, “A’nlaktak Mi inse, “Akahrat Pathen”, “Kumsôt Pa”, “Chamna Rengsapa,” a’nti sik kae.

⁷Areng ratha neina kakhang injôn sik; arengrama chamna ka-om ṭhak sik. Ama’n Reng David karōi kahlō inkhat a vai arôn sik, aratha neina kha ṭongdik leh ṭongtak chunga inhnga sik, tuna inphut pha inchai katlunga. Chunghnung RŌNGPU’n hiseng hi tlo sik a amandon jo.

⁸Jacob sōn leh pâr, Israel rengram chunga RŌNGPU’n aṭong tanna ahrisōt jo.

⁹Samaria khōpuia aka-om Israelhei seng in, hivahi ama tatlo kae tia anhong manhret sik. Tûnhin anmani inlensak hei, anracham kase. Anmani’n anhri,

¹⁰“Ṭek innhei kachimsō jo, tâk eini’n hlung inn vâng nisak male sik hei. Sycomore thingtlōnhei intuktan jo, tâk eini’n cedar thing kaṭhapen vâng nithleng sik hei.”

¹¹RŌNGPU’n ankadōihei kha anmani kabuhlu sik a akachok mathōi jo hei.

¹²Nisō ting Syria khana tlaitlâk ting Philisti he’n Israel madena sik anbei ka-âng jo hei. Kha achang inum RŌNGPU hnuk natna kha la’nchai mak; karâkna pekna sik heia akut akalâng ṭhak a kae.

¹³Israel mipuihei kha la’nsir mak hei; Chunghnung RŌNGPU’n karâkna apek hei katlunga, ahnengting he’nle dekmak hei.

¹⁴RŌNGPU’n ni khat shung rōk a Israelhei hlamkakei leh anmihei karâkna alapek sik hei; anlu anle alatan sik hei kae.

¹⁵Kater leh kaja ka-om mihei kha aluhei kae, khana sânkathem maleisei kahri hei kha arahmei hei kae.

¹⁶Hiva mi hlamkakei he’n mihei kha hlam kalet a anṭhōi hei khana pum manhmak a anmanhmak hei.

¹⁷Khava jâra Rōngpu’n retherhei kha mantlânsōt mak hei ning, khana renghmei leh nu leh pa kase inkhatbek chunga lungsetna malârmak ning, ajârchu mi rakip Pathen neimak hei, ṭhamak hei, khana antahri rakip akaṭhamak rōk kae. Kha achang inum RŌNGPU hnuk natna kha la’nchai mak ning, tâk karâkna pekna sik a abân alakalâng ṭhak sik.

¹⁸Mihei ṭhatmak kha hmei kapōa kakânga rahling chap, thing bur hei amanhmangsō apō. Ratu hmei kakânga hmeikhu hlom chungting kaketou apōa kae.

¹⁹Ajârchu Chunghnung RŌNGPU kha ahnuk kana jo, ama mi karâkna kha hmei kapōa ram pumpuia kakâng jo khana mihei asuk manhmang jo hei, hivahi anbibinga anchen kae.

²⁰Ram shunga mihe’n hmun rakip a sâk sik ajingte antahmu kha insut heia ansâk, tâk anvonṭâm khachu khoptor dekmak. Anmani’n ansahei kapha ansâk a kae.

²¹Manasseh mihei leh Ephraim mihei inkhat leh inkhat inbuhlu hei, khana anmani inchun heia Judah anbuhlua kae. Achang ravâng RŌNGPU hnuknat kha la’nchai dekmak, karâkna pekna sik a akut alakalâng hia kae.