Read Komrem LEVI-DÂN 1 Bible Online

LEVI-DÂN 1 - Komrem bible

LEVI-DÂN 1

¹RŌNGPU omna Pōn-inna inphut RŌNGPU’n Moses abeksōt a hiva dânhei hi apek hei,

²Israel he’n tōkna annei pha antajui sik hei kha kae. Mi inkhat in ran tōkna anei pha, aserup a, akemōng rup a, akerup a inkhat kachang thei.

³Romanvâm inthoina kha aserup a inkhat atōk sik achang inchu, nōrna kase sehratche aheikei sik kae. RŌNGPU’n arahlâng pekna sik RŌNGPU Pōn-inn hlutna kot kunga atōk sik kae.

⁴Mi khan sehrat luchunga akut ada sik kae, khan chu asetna rangei mandamna sik a atōkna kha rahlâng pek sik kae.

⁵Khana khan sehratche kha athat sik, Aaron innshunga thempu he’n thisen kha RŌNGPU hneng antōk sik khava sōa Pōn-inn hlutna hnenga aka-om maichâm asir manlia ankathek sik.

⁶Hivasōa sehrat kha ama’n avun amanhlip a ahme kha arachen sik,

⁷khana thempu he’n maichâm chunga thing kha anmantluk a hmei anmansûk sik.

⁸Anmani’n hmeishunga hme aṭang hei kha anro sik, alu leh athai hei inveisana.

⁹Mipa khan ran ashung alai leh kahnungtinga akehei asôp sik hei, khana rōikaver thempu khan inthoina rakip kha maichâm chunga arosō sik kae. Hiva thlai tōkna marim hi RŌNGPU tlaina kae.

¹⁰Mi inkhat in akemōng leh ake hei kâra inkhat atōk sik inchu nōrna kase ache akachang sik kae.

¹¹Maichâm sak intongting ran kha athat sik khana thempu he’n thisen kha maichâm rakir manlia ankathek sik.

¹²Mipa khan ahme kha arachen sō leh, aṭōn katlosōt thempu khan ahme rakip alu leh athai inveina hmeia aro sik,

¹³Mipa khan ran ashung alaia leh akahnung tinga ake asôp sik hei, khana thempu khan RŌNGPU hnenga tōkna anei sik khana maichâm chunga aka-om rakip kha aro manvâm sik hei. Hiva thlai tōkna marim hi RŌNGPU tlaina kae.

¹⁴Mi khan romanvâm inthoina sik a va atōk sik achang inchu, khavakha pherva a-emak leh vaṭhu atōk sik kae.

¹⁵Thempu khan maichâm chunga atōk sik, arîng amaher thlek sik, alu kha maichâm chunga aro sik. Athi kha maichâm sira amanjung sik.

¹⁶Ama’n a-ekpho leh ashunga ka-om seng kha alosōt sik khana ravut dana maichâm nisōting ahlon sōt sik.

¹⁷Ama’n amathla 2 kha amatua apum kha akei hlera amahlang sik, amathlahei chu keihler mak ning, khava sōa apum kha maichâm chunga aro sik. Hiva thlai tōkna marim hi RŌNGPU tlaina kae.