Read Komrem LEVI-DÂN 10 Bible Online

LEVI-DÂN 10 - Komrem bible

LEVI-DÂN 10

¹Aaron sapa Nadab leh Abihu he’n anhmei lōkna khângbe anchoi et a, hmeira-ê in-ât anthōna, bero hei anhapsa a khavakha RŌNGPU hneng anvatōk a kae tâk khava hmei kha a’ntheng changmak. Tâk-kha khava hmei kha intheng mak jo, ajârchu RŌNGPU’n khahei kha tōkna sik ṭong leipek mak a kae.

²Manhret manloa RŌNGPU’n hmei ajōng tira RŌNGPU omna khan anmani akânghlon jo hei.

³Khava pha Moses’n Aaron hnenga ahri, “RŌNGPU’n hiva chungchânga aleihri kha hinga kae, ‘Kei inzen seng in ka’nthengna hi antakaja sik kae; kamipuihei hneng kalûrna kamalâr sik kae.’ ” Tâk-kha Aaron chu kadai hngera leika-om.

⁴Moses’n Aaron apakasin Uzziel sapahei, Mishael leh Elzaphan abek hei, “Hin hong ruh Pōn-inn intheng shunga nan-u nannaihei kalōng so kadom hei una kurvânga vada hei ruh.”

⁵Khan chu kahong heia, ankalōng kha anpōn invonna vâng anmatu heia, Moses ṭongpek dungjuia kur vângting ankadomsōt jo hei.

⁶Khava sōa Moses’n Aaron leh asapahei Eliazar leh Ithamar hneng ahri, “Anralûm de malârna samkhui loa om mak ruh, nanpōn keihler mak ruh! Kha nantlo’nchu, akathi sik chei kae, khana RŌNGPU kha mi rakip chunga ahnuk akana sik kae. Tâk-kha RŌNGPU’n hmei ajōng tira arohlon hei chunga Israel mipui he’n ralûm dena ṭajai ansui thei sik.

⁷Pōn-inn hlutna kotkung hi dahlon mak ruh, akinchu kathi sik chei, ajârchu RŌNGPU thai manthina vâng khan sukmantheng jo chei kae.” Moses tahri kapōa anleitloa kae.

⁸RŌNGPU’n Moses hneng ahri,

⁹“Nang leh nasapa he’n ka-omna Pōn-inna ju nan-in inchu hlutmak ruh, nanhlut inchu akathi sik chei kae. Hivahi ahei tik chenna nasōn-napâr hei tajui sik dân kae.

¹⁰Pathen ta leh micham tahmang sik neinâk-hei, bek rōia a’ntheng leh a’nthengmak hei nachîk ṭhen sik kae.

¹¹Moses hnenga kahei pek chei dân seng kha Israel mipuihei namanthei nger sik hei kae.”

¹²Moses’n Aaron leh asapa 2 alaka-om Eleazar leh Ithamar hneng ahri, “RŌNGPU hnenga thlai inthoi tōkna a’nhleia inphut hmuchi a’ntōk kha lo una che philo buhlom syem ruh, maichâm hnenga sâk ruh, ajârchu hiva inthoina hi a’ntheng kae.

¹³Khavakha a’ntheng hmun a sâk ruh; khavakha RŌNGPU hneng thlai a’ntōksōt khana inphut nangni chentum kha kae. Khavakha RŌNGPU’n ṭong apek eng kha kae.

¹⁴Tâk ahlop mônga thempuhei sik a RŌNGPU hneng kutchoi pekna leh tōklôm sha-ôp leh arakō hei kha nan-innshung in nansâk thei sik. Beklanga hmun intheng inkhat a nansâk thei sik. Israel mipuihei inlôikhôm inthoina inphut nang leh nasahei chen sik a hiva inthoinahei hi a’npek jo chei kae.

¹⁵RŌNGPU hnenga ranthai kha thlai inthoina inkhat a antōk pha ake rakō leh a-ôp anta heichoi sik kae. RŌNGPU ṭongpek dungjuia hiva ṭhen hi ahei tik a nang leh nasahei chen sik kae.”

¹⁶Set-inthoina keche chungchânga Moses’n ader hei kha anro manvâm sō jo tia amanhret jo. Hivahin Eleazar leh Ithamar chunga ahnuk kana joa ader hei,;

¹⁷“Heisa mo hmun inthenga set-inthoina kha nantasâk mak? Hivahi a’ntheng hêr kae, mi rakip set inthengna sik, RŌNGPU’n apek chei kae.

¹⁸Thisen kha a’ntheng pōn-inna nanheichoi manhlut mak jâra, kaṭong pek chei kapōa inthoina kha khana khan nanta leisâk sik kae.”

¹⁹Aaron in amasôn, “Tuning set-inthoina hme kha kasâk inchu, RŌNGPU’n ahnōm sik mo? Mipui he’n anset inthoina RŌNGPU hneng tuning anheitōk, ro-inthoina anheichoi, kha’num kachunga hingtuk a ṭit ka-om omchenhei hi hong kasōk a kae.”

²⁰Moses’n kha athei pha katlâi joa kae.