Read Komrem LEVI-DÂN 13 Bible Online

LEVI-DÂN 13 - Komrem bible

LEVI-DÂN 13

¹RŌNGPU’n Moses leh Aaron hneng dânhei hi apek hei.

²Tu inkhat in avun a’nthling, khōihli, akaphâr aneia akakhôk vunnat achang inchu, Aaron innshunga thempuhei hneng ṭhōi sik kae.

³Thempu khan a’nthling kha a-en sik, khana khan asam kha abang joa akimvea vunlak kanek a a’nthuk jo’nchu, khavakha nat kakhôk jo kae, thempu’n ama kha intheng mak tia aphông sik kae.

⁴Tâk-kha anat kha abang inum avunlak kanek a a’nthuk mak a ashunga sam kha achekmak inchu, thempu khan ama kha ni 7 abinga aṭhen a ada sik kae.

⁵Thempu khan ni 7 ning a-ensui nôk sik, ama mandonna natna bi kha angangai achanga akhemak inchu, ni 7 aṭhen nôk a ada sik.

⁶Thempu khan ama kha avea ni 7 ning a-en sik, khana anatbi kha a’nkhira a’nchîp jo’nchu, bekdân dungjuia intheng tia aphông sik; khavakha a’nthling hnâm nat kae. Mipa khan apōn ader asôp sik a kha bekdâna intheng sik jo.

⁷Atak intheng jo tia thempu’n aphôngsōa natbi kha alensa chet inchu, thempu hneng ama ava’nlâr nger nôk sik kae.

⁸Thempu’n a-en nôk sik a kha abi kha alensa jo’nchu, intheng mak tia aphông sik kae; khavakha nat kakhôk kae.

⁹Tu inkhat vunnat kakhôk arôn jo’nchu, thempu hneng heiṭhōi sik kae,

¹⁰ama’n a-enmanchên sik. A’nthling kha achek joa asam kha’m abanga ahnai asip inchu

¹¹khavakha a’nhnaktak vunnat jo kae. Thempu khan intheng mak tia aphông sik kae; ṭhensōt a da sik changmak jo, ajârchu a’ntheng maksa jo kae.

¹²Avun nat kha alua inphut ake akatōm jo’nchu,

¹³thempu’n a-en nôk sik kae. Ataksa akatōm sō jo achang inchu, thempu khan ama kha bekdân dungjuia intheng tia aphông sik. Avun kha acheksō jo’nchu, ama kha bekdân dungjuia a’ntheng kae.

¹⁴Tâk-kha khava laitak atak inthling hmor kha akakōi ahmu’nchu a’nthengmak jo kae.

¹⁵Thempu’n avea a-en nôk sik, a’nthling kakōi ahmu’nchu, intheng mak tia aphông sik. A’nthling kakōi jo khachu vunnat kakhôk kae, ami kha intheng mak.

¹⁶Tâk-kha a’nthling kha adam a ahongchek nôk inchu, ama thempu hneng akase nôk sik kae,

¹⁷ama’n a-ensui nôk sik. A’nthling kha ahongchek jo’nchu, ama kha bekdân dungjuia a’ntheng kae, thempu’n intheng tia aphông sik kae.

¹⁸Tu inkhat in khōihli arôna adam jo’nchu,

¹⁹khana hnunga khōihli omnatak a khan akachek a a’nthling a-emak leh senbang a’nlâr inchu, ama thempu hneng akase sik kae.

²⁰Thempu’n ama a-en sik a kha natbi kha akimvea avun kanek a a’nthuk joa, achunga asam kha abang jo’nchu, ama kha intheng mak tia phông sik kae. Khavakha khōihlia ahon’phut vunnat kakhôk kae.

²¹Tâk-kha thempu khan a-enna sam kha abangmak a, akimvea vunlak kanek a a’nthuk mak a, natbi kha avâr inchu, thempu’n ni 7 abinga aṭhen sik.

²²Natbi kha alensa’nchu, thempu khan intheng mak tia aphông sik; ama nat arôn kae

²³Tâk-kha angangai achanga alensa mak inchu, khōihli bia akhir hnâm kae, thempu’n bekdân dungjuia intheng tia aphông sik kae.

²⁴Mi inkhat vun hmei in akâng manbang a-emak leh senbang atlo’nchu,

²⁵thempu’n a-en sik kae. Abi chunga sam kha abang jo’nchu, khana akimvea vun kanek a a’nthuk inchu, hmei kângna khan vunnat kakhôk a’nphut jo kae, thempu’n ama intheng mak tia aphông sik kae.

²⁶Tâk-kha achunga sam kha abangmak a, abi kha akimvea vunlak nek a a’nthuk mak a, avârdet inchu, thempu’n ni 7 aṭhen a ada sik.

²⁷Thempu’n ni 7 ning a-enmanchên nôk sik, alensa inchu, nat kakhôk kae, thempu’n intheng mak tia aphông sik kae.

²⁸Kha’num abi kha angangaia alensa mak a, avâr inchu, vunnat kakhôk changmak jo. Thempu’n beklanga intheng tia aphông sik, ajârchu khavakha nat a’nhlipsōt hnâm kae.

²⁹Mi inkhat, pase mo, nuhmei mo inkhat in alua mo, ama kha a mo khōihli arôn inchu,

³⁰thempu’n a-en sik. Abi kimvea avun kanek a a’nthuk det a asam kha a-êngthim joa atam mak inchu, vunnat kakhôk kae, ama’n mi kha intheng mak tia aphông sik kae.

³¹Thempu’n a-en pha natbi kha avun ralak kanek a a’nthuk mak inum asam kha kaṭha a-om mak inchu, ni 7 aṭhen a ada sik kae.

³²Thempu khan ni 7 tluk ning a-en nôk sik, anatbi kha alensa mak a, asam kha a-êng mak a, avun kha a’nthuk mak inchu,

³³mi khan anat nabi kimve tei loa alusam kha avo sik kae. Thempu khan ni 7 aṭhen a ada nôk sik kae.

³⁴Ni 7 tluk ning a’nthling kha a-ente nôk sik, khan alensa mak a, akimvea avun nek a a’nthuk mak inchu, bekdân dungjuia thempu khan intheng tia aphông sik kae. Ami khan apōn ader hei asôp a intheng sik jo.

³⁵Tâk-kha ama kha intheng jo tia anphôngsō kahnunga khōihli kha alensa inchu,

³⁶thempu’n a-en nôk sik kae. Natbi kha alensa inchu asam ka-êng kha en rangei mak jo; mi kha intheng mak jo tia inhret jo.

³⁷Tâk-kha thempu’n a’nthling kha lensa mak, asam kha kaṭha kakek khana anat kha hong kadam jo ati’nchu, thempu khan bekdân dungjuia intheng jo tia aphông sik kae.

³⁸Pase mo nuhmei mo atak chunga avun abang jo’nchu,

³⁹thempu’n a-en sik kae. Abi kha abang phor inchu, vun khôkna bi hnâm kae, mi khachu bekdâna a’ntheng kae.

⁴⁰Mi inkhat aṭhôm ting mo, alua hmating mo akasai a-om inum, ama a’nthengmak changmak.

⁴¹

⁴²Tâk-kha asaina khan senbanga inthling a’nlâr inchu, khavakha nat kakhôk kae.

⁴³Thempu’n a-en sik kae, senbanga a’nthling inchu,

⁴⁴thempu’n intheng mak tia aphông sik kae, alua nat kakhôk arôn jâra kae.

⁴⁵Nat kakhôk karôn khan pōn inhlera a’nvon sik, alu khuimak ning, ahmai ṭhōi ting seng akatōm sik a kha, “A’nthengmak, a’nthengmak,” tia a-ôn sik kae.

⁴⁶Nat kha arôn lai seng a’nthengmak sik kae, milak leh inchunloa kurvânga aka-om sik kae.

⁴⁷Kaphâr nat kha sahme pōn leh hruipōn chunga akop jo’nchu,

⁴⁸achangmak leh hruipōn leh sahme pōnhar heia achangmak leh shavun leh shavun a insyem hei-inkhat chunga akop joa,

⁴⁹khavakha a’n-êm a-emak leh akasen a-om jo’nchu khavakha kaphâr kakop kae, thempu hneng malâr sik kae.

⁵⁰Thempu’n a-en sik a kha neinâk kha ni 7 adasōt sik.

⁵¹Ni 7 ning a-ente nôk sik, akopna kha alensa inchu, neinâk kha a’nthengmak jo kae.

⁵²Thempu’n hmeia aro sik, khavakha kaphâr natse kae hmeia romanhmang sik kae.

⁵³Tâk-kha thempu’n khava bi kha a-en pha neinâk-hei chunga heite alensa mak inchu,

⁵⁴sôpna sik ṭong amasō sik khana ni 7 inkhat adasōt nôk sik.

⁵⁵Khava sōa a-ente nôk sik, kaphâr kakop kha alâr a’nthleng mak inchu, alensa mak inum, a’nthengmak tlit kae; akopna kha shungting mo, vângting mo neinâk kha hmeia ro sik kae.

⁵⁶Tâk-kha thempu’n a-ente nôk pha khan, akakop kha achâr jo’nchu, pōn leh shavun kha akeihler sik kae.

⁵⁷Khava sōa akakop kha ahon’lâr nôk inchu nat kha akalensa kae, akapu khan neinâk kha hmeia aro sik kae.

⁵⁸Nat kopna kha asôp a akopna kha a’nhmang jo’nchu, avea asôp nôk sik kae, khan bekdân dungjuia a’ntheng sik kae.

⁵⁹Hivahi nat kakop chunga, shahmepat leh hruipat, shahmepōn leh hruipōn khana shavun a insyem neinâk heikhat chunga dân kha kae; hivahi beklanga a’ntheng leh a’nthengmak mandon mathlâkna kha kae.