Read Komrem LEVI-DÂN 16 Bible Online

LEVI-DÂN 16 - Komrem bible

LEVI-DÂN 16

¹Aaron sapa 2 he’n RŌNGPU hneng a’nthengmak hmei anvatōk jâra athatsō hei kahnunga RŌNGPU’n Moses hneng aleihri.

²Ama’n ati, “Pha intepna shung rōk a pinden kahnungtinga Hmun A’nthengpen shunga nasōpui Aaron kha ahlutna sik hripek roh, ajârchu Intepna Bôm kamna chunga sumphai shunga kei a’nlâr eng kae. Ama’n ṭong ajuimak inchu that sik kae.

³Set-inthoina sehrat chere, romanvâm inthoina kemōng chere aheikei heiso leh rōk Hmun Inthengpen kha kahlut thei sik.”

⁴Khava sōa RŌNGPU’n mansenahei hi aleipek hei. Hmun Inthengpena khan Aaron ahlutmak hma, tui a’nsia thempu von a’nhak sik: hruipōn zakkō inse, zakkō katôi, khōnkir leh lukôm hei seng.

⁵Israel mipui he’n Aaron hneng set-inthoina sik keche 2, ro-inthoina sik kemōng chere inkhat antapek sik kae.

⁶Ama leh a-innshunghei set losōtna sik a sehratche inkhat atōk sik.

⁷Khava sōa keche 2 hei kha RŌNGPU omna Pōn-inn hlutna kot a akei sik hei.

⁸Khana khan hlung 2 ahmanga tla sânna anei sik, inkhat “RŌNGPU sik” tia inzet, inkhat a “Azazel sik” tia inzet.

⁹Tlâ-sân dungjuia RŌNGPU sik ahong kasōk ke kha set-inthoina atōk sik jo.

¹⁰Azazel sik a kadeisōt jo ke khan RŌNGPU hneng kahringa tōkna anei sik khana mipuihei set losōtna sik nêrdiram a Azazel hneng atir sik jo.

¹¹Sehratche kha ama leh a-innshunghei set-inthoina sik a atōk pha,

¹²hmei khângbe ra-e in-ât kasiptak maichâma inphut aloa bero kut maja 2 kasip leh Hmun Inthengpena ahei choi sik hei.

¹³RŌNGPU omna khan bero kha hmeia aro sik, bero hmeikhu khan Intepna Bôm kamna sing kha amakhu manhle sik, thempu’n ahmu makna sik leh athi makna sik a kae.

¹⁴Sehrat thi kha ajing aloa akutpâr vâng Bôm singna hmating akathing sik khana ajing nôk khan Intepna Bôm hma khan vōi 7 akathing sik,

¹⁵Khava sōa, mipuihei set-inthoina sik ke kha athat sik, athi kha Hmun Inthengpena ahei choi sik, sehrat thisena atlo kapōa, Intepna Bôm singna chunga leh ahmating akathing sik hei.

¹⁶Israel mipuihei intheng makna leh setna rakip a inphut Hmun Inthengpen mantheng sōtna rōi kha hing’hin atlo sik kae. Pōn-inn sik a hivahi atlo sik kae, ajârchu beklanga a’nthengmak jo kha rephōr alaitak a ka-oma kae.

¹⁷Mantheng sōtna rōi katlo sik a Aaron in Hmun Inthengpena ahlut a inphut ahong sōk mak hma seng, Pōn-inna khan tu inkhat aka-om mak sik kae. Ama sik, a’nshung sik leh mi pumpui sik rōi atlolai seng khan,

¹⁸ro-inthoina leh mantheng sōtna sik a maichâm ting akasesōt sik kae. Sehrat thisen leh ke thisen ajing aloa maichâm rakir kasonghei kha akano sik hei kae.

¹⁹Akutpâr vâng thisen ṭhahrep maichâm chunga vōi 7 akathing sik kae. Hing’hin Israel mipuihei setna inphut asuk manthenga inthenga ada sik kae.

²⁰Aaron in Hmun Inthengpen, RŌNGPU omna Pōn-inn shung, maichâmhei seng manthengna atorsōa, Azazel sik a kadei jo ke kahring kha RŌNGPU hneng atōk sik jo.

²¹Akut 2 ke luchunga ada heia Israel mipuihei ṭhatmakna, setna, dōina rakip ahrisōt a khahei seng kha ke luchunga hnengsōtna anei sik kae. Khava sōa kadeisōt mi ṭhahrep in ke kha nêrdiramting anhesōt sik jo.

²²Ke khan ansetna rakip kha mi tlâkmakna ram ṭhahrep a a’nrôn sik jo.

²³Khan chu Aaron kha Pōn-inn shunga kahlut sik, Hmun Inthengpena ahlutmak hma a’nvon thempu ret kha alosōt a khana khan adahlon sik.

²⁴Hmun inthenga khan tui insi sik khana abing invonna invon sik. Khava sōa, kasesōt a ama leh mipuihei setna losōtna sik ro-inthoina avatlo sik.

²⁵Set-inthoina sik ranthai kha maichâm chunga aro sik.

²⁶Azazel hnenga, nêrdiram a ke kahesōt mi kha rephōra ahong inle mak hma apōn leh ader asôp a tui a’nsi sik kae.

²⁷Set-inthoina sik a Sehratche leh ke, set losōtna sik a anthisen Hmun Inthengpena tōk jo hei kha, rephōr vângting heichoisōt heia ro sik hei kae. Anvun, anravōi, an-gârihei seng ropet sik hei kae.

²⁸Khava karopa kha apōn leh ader asôp a rephōra a’nle mak hma tui a’nsi sik kae.

²⁹Chôndânhei hi akahong sik pha rakip a nit sik hei kae. Thla 7 tlukna ni 10 ning Israelhei leh anhnenga aka-om khōhme he’n bu antahngōia ṭōn antatlo mak sik kae.

³⁰Khava ning khan beklanga an-inthengna sik a, ansetna rakip a mantheng sōtna rōi antatlo sik kae.

³¹Bu hngōia ṭōn antatlo hêrmakna kani kha a’nthengtak inkhat akae sik kae. Hiva chôndânhei hi akahong sik pha rakip a nit sik hei kae.

³²Thempu Kalen, kaṭhatak a apa kahlânga matung jo khana manthengsōt jo khan mantheng sōtna rōi kha atlosōt sik kae. Thempu invonna a’nvon sik

³³khana A’nthengpen Hmun leh RŌNGPU omna Pōn-inn shung rakip mantheng sōtna rōi kha atlo sik kae.

³⁴Hiva chôndânhei hi akahong sik pha rakip a nit sik hei kae. Hiva rōi hi Israelhei setna rakip mantheng sōtna sik kum khat a vōi khat tlo sik kae. RŌNGPU’n ṭong apek dungjuia Moses’n aleitlo jo.