Read Komrem LEVI-DÂN 17 Bible Online

LEVI-DÂN 17 - Komrem bible

LEVI-DÂN 17

¹RŌNGPU’n Moses hneng ṭong apek,

²Aaron leh asahei khana Israel mipuihei hneng chôndânhei hi ahrina sik a.

³Israel inkhat RŌNGPU omna Pōn-inn hlutna hnenga tei loa hmunlak a sehrat, kemōng, ke inthoina inkhat a katōk kha dân asukṭhe jo. Thisen amasōk jâra Pathen mi inkhat a inteimak ning.

⁵Hiva ṭongpek tina hichu Israel mipui he’n vânga antathat phung ran kha tûnchu RŌNGPU hneng anta heikei sik kae. Tûnchu khahei kha thempu hneng anta heikeia Pōn-inn hlutna khan inlôikhômna inthoina inkhat a that sik hei kae.

⁶Thempu khan thisen kha Pōn-inn hlutna maichâm asir heia akathing sik khana RŌNGPU tlaina marim kha masōna sik a athai hei kha aro sik.

⁷Israel mipui he’n ke-ṭai hnenga inthoina anranhei kha hleipuk heia antathat a RŌNGPU ṭong kajuimak kha akae hêrmak sik hei kae. Israel mipui he’n hiva chôndânhei hi akahong sik pha rakip a antanit sik kae.

⁸Israel inkhat a-emak leh ankâra ka-om khōhme inkhat in ro-inthoina khana aralak inthoina inkhat

⁹RŌNGPU hneng tōkna anei kha Pōn-inn hlutna tei loa hmun ralak a akatlosōt kha Pathen mi inkhat a inteimak ning.

¹⁰Israel inkhat a-emak leh ankâra ka-om khōhme inkhat in hmeravōi kha thisen a-ompuma asâk inchu RŌNGPU’n ama adōi sik khana ami inkhat a inteimak jo ning.

¹¹Akahring rakip hringkhō hi thisena ka-om, khava jâra mihei setna losōtna sik a thisen rakip hi maichâm chunga bun mathlâk sik kae tia RŌNGPU’n ṭong apek kae. Hringna kachang thisen hin setna alosōt a kae.

¹²Khava jâra RŌNGPU’n Israel mipuihei hneng anmani leh ankâra aka-om khōhme he’n thisen ka-om hmeravōi ansâk makna sik a amanthei hei.

¹³Israel inkhat in a-emak leh ankâra ka-om khōhme inkhat in ramsha a-emak leh va beklanga a’ntheng shachânga anthat inchu athisen kha raleia abun sik khana ralei vâng amakhusi sik kae.

¹⁴Akahring rakip hei hringkhō kha thisena ka-om, khava jâra RŌNGPU’n Israel mipuihei hneng thisen ka-om hmeravōi sâk mak ruh khana khanga akatlo mi kha Pathen mi inkhat a inteimak ning tia ahri pek hei.

¹⁵Tu inkhat, Israel a-emak leh khōhme inkhat in, abinga kathi ran a-emak leh ramsha tathat hme kasâk kha apōn leh ader asôp a tui a’nsi sik khana khōhlei katlunga beklanga a’ntheng mak hma seng ahngâk sik kae.

¹⁶Khanga atlo mak inchu, khava kara inrengna kha athōk sik kae.