Read Komrem LEVI-DÂN 19 Bible Online

LEVI-DÂN 19 - Komrem bible

LEVI-DÂN 19

¹RŌNGPU’n Moses hneng

²Israel mihei hneng hri sik kha amanthei, “Intheng ruh, ajârchu nan-Pathen RŌNGPU kei intheng eng.

³Kaṭong pek chei kapōa, nangni mi rakip in anu-apa akaja sik kae, Châmhngat kani anit sik kae.

⁴“Kei dahlona limsyem kamuk mak ruh; thir leh hlunga pathen syem mak ruh khana kamuk mak ruh. Kei nan-Pathen RŌNGPU eng kha kae.

⁵“Inloikhômna inthoina sik ran nanthat pha, kaleipek chei chôndân kha jui ruh, khan nantōkna kha karahlâng sik kae.

⁶Ran that ning a-emak leh jîng kania khan hme kha sâk sik kae. Ni 3 ninga hme a’nhlei rakip kha ro manvâm sik kae,

⁷ajârchu beklanga intheng mak, tu inkhat in asâk inchu, tōkna kha rahlâng mak ning.

⁸Tu inkhat in asâk inchu kei hnenga a’ntōksōt jo kha hmecham inkhat a alo jâra aṭhe sik kae, kei mi inkhat a inteimak jo ning.

⁹“Nanhlei nankhôm pha, hlei rakir katlung bit a sâng ât mak ruh, khana dahlonsa jo sabor ka-ât sik a se nôk mak ruh.

¹⁰Nanvomhrui rahōna ṭhōtsō loa ka-om a-emak leh raleia akatla thei hei avakahrut sik a se nôk mak ruh; sarahei sik a dahlon pek hei ruh. Kei nan-Pathen RŌNGPU eng kha kae.

¹¹“Inru mak ruh, mi hōnmak ruh, maleisei hrimak ruh.

¹²Nanta juimak sik achang inchu kei rahminga intep mak ruh; khava khan karahming amanset a kae. Kei nan-Pathen RŌNGPU eng kha kae.

¹³“Tûte inkhat chunga hnemna jonga anei kasut mak ruh. Ratha nantanêk tu inkhat hlō kha jân khatbek um khâm mak ruh.

¹⁴Kōr kaset mi kha hâksêr mak ruh khana hmitkacho inkhat hma a’npaina sik heikhat dapek mak ruh. Kaṭong jui ruh; kei nan-Pathen RŌNGPU eng kha kae.

¹⁵“Ṭong tlâng kasōk mandaina nannei pha malung inthenga ṭong tan ruh; sara ôpna khana heisa ṭitna malârmak ruh.

¹⁶Mi inkhat kha maleiseia hrimanthang mak ruh, mi inkhat ahringkhō sik ṭongtan athōk pha nangni sâkhi pek a ama bômtheina achang sik inchu vahri pek ruh. Kei RŌNGPU eng kha kae.

¹⁷“Tu inkhat chunga ersak mak ruh, ama jâra set nantlo makna sik nanintōk makna hei kha hri mandâi jôk ruh.

¹⁸Tu inkhat chunga phu hlōmak ruh khana enkada ṭhak mak ruh, tâk nabinga na’nlungset kapōa nanvenhei lungset ruh. Kei RŌNGPU eng kha kae.

¹⁹“Kaṭong pek chei jui ruh. Inna ranhei muksen mannei mak ruh. Hleipuk inkhat a sachi hlop-hlop manheia lingmak ruh. Pat hlop 2 vânga pōnkhông insi mak ruh.

²⁰“Mi inkhat nuhmei manbo a’nhretsa jo sōk nuhmei inkhat kha aman alapek male mak jâra ala’nsō mak kha mi inkhat in hmun inchun puina anei inchu, karâkna pek sik hei kae, tâk sōk alachang jâra thatchu that mak sik hei kae.

²¹Mipa khan kei omna Pōn-inn hlutna khan ama pekmalena inthoina kemōngche inkhat aheikei sik kae,

²²khana inphut mipa setna losōtna sik manthengna rōi thempu khan atlosōt sik kae, khana Pathen in arangei mandam sik kae.

²³“Canaan ram nanhlut a theikung nanling pha, ahma kakei kum 3 shunga kara inra hei kha beklanga intheng mak tia lo hei ruh. Khava pha shung senga kara kha nantasâk mak sik kae.

²⁴Kum 4 changna khan kara rakip kha RŌNGPU kei hnenga ningṭhat malârna, inthoina inkhat a nantatōk sik kae.

²⁵Tâk-kha kum 5 changna khan chu kara nansâk thei sik jo. Hihei rakip hi nantlo’nchu, nanthei kung khan kara katamchet inra sik. Kei nan-Pathen RŌNGPU eng kha kae.

²⁶“Thi alaka-om hme inkhatbek sâk mak ruh. Dôi hei inkhatbek inchu mak ruh.

²⁷Akathi ṭajai suina nan thōmbea sam epmak ruh khana nanhnerhme phôimak ruh

²⁸khana nantaksa chunga lim mazet mak ruh, bi kaneia ât mak ruh. Kei RŌNGPU eng kha kae.

²⁹“Nansanuhei kha bek-inna noti manchang heia inzak manchen mak hei ruh; khanga nantlo’nchu pathen ralak ting inhe sik jo chei khana ram hi omchen kaṭhamak in kasip sik jo.

³⁰Châmhngat kani kha nit ruh, khana kei kamukna kha kajana nei ruh. Kei RŌNGPU eng kha kae.

³¹“Kathi rathla inphut ṭong kalo hei hnenga mansena kangeituia semak ruh. Nantlo’nchu, beklanga a’nthengmak sik chei kae. Kei nan-Pathen RŌNGPU eng kha kae.

³²“Katerhei sik kajana leh lulenna malâr ruh. Ṭit leh kajana pum a kei ajui ruh; kei RŌNGPU eng kha kae.

³³“Nanrama ka-om ram hlop mihei kha êngsettak a razen mak hei ruh.

³⁴Nanloi Israel inkhat kapōa razen hei ruh, khana nanbinga nan-inlungset kapōa lungset hei ruh. Nangni’m pha khat a Egypt ram a khōhme aleikachang chei kae mandon ruh. Kei nan-Pathen RŌNGPU eng kha kae.

³⁵“Tûte inkhat neinâk asei, ahrik, aja tena vânga hōnmak hei ruh.

³⁶Malung inthengtak a atena kher, hlung, thingtlōnhei kha hmang ruh. Kei nan-Pathen RŌNGPU eng kha kae, ke’n Egypt a inphut kaheiṭhōi chei kae.

³⁷Kadân leh kaṭong pek rakip jui ruh. Kei RŌNGPU eng kha kae.”