Read Komrem LEVI-DÂN 2 Bible Online

LEVI-DÂN 2 - Komrem bible

LEVI-DÂN 2

¹Mi inkhat in RŌNGPU hneng hmuchi inthoina atōk pha, jâm atakmandi masa sik kae. Khava chunga olive thai leh bero ada sik kae,

²khana Aaron innshunga thempuhei hneng ahei choi sik kae. Rōikaver sik thempu khan jâmdi kut maja khat leh thai leh marim katui rakip kha aloa maichâm chunga aro manvâm sik, hivahin akhenga RŌNGPU hneng intōk jo tina kachang sik. Hiva thlai tōkna marim hi RŌNGPU tlaina kae.

³Hmuchi tōkna a’nhleibang seng kha thempuhei ta sik kae; hivahi a’ntheng hêr kae ajârchu RŌNGPU hnenga thlai intōk khana inphut a’nlosōt kae.

⁴Hmuchi tōk sik kha ratap shunga buhlom achang inchu, che philo sik kae. A’nsâthim buhlom jâmdi kha olive thai leh kachep sik achangmak leh akasin tetek asyem heia olive thai kano sik hei kae.

⁵Inthoina kha khângpek chunga antakathei buhlom achang sik inchu, jâmdi leh olive thai kachep a syem sik, che chu phimak sik kae.

⁶Tōkna nanei pha khavakha ahar-ahak a kachep a thai kha achunga bunthlōna tōk sik kae.

⁷Tōk sik kha khâng shunga buhlom syem sik achang inchu, jâmdi leh thai kachep a syem sik kae.

⁸Khavakha RŌNGPU hneng inthoina sik heichoi roh khana thempu hneng pek inna ama’n maichâma avada sik kae.

⁹Thempu khan aṭhen ajingte alo sik, khavakha RŌNGPU hneng akhenga intōk jo ti malârna kae, khana maichâm chunga avaro sik. Hiva thlai inthoina marim hi RŌNGPU tlaina kae.

¹⁰Arosōa a’nhleiseng kha thempuhei chen kae; hivahi a’ntheng hêr kae, ajârchu hivahi RŌNGPU hneng a’ntōk thlai inthoina inphut a’nlosōt kae.

¹¹RŌNGPU hnenga hmuchi tōk sik inkhatbek a’m chephia syem yamak ning; RŌNGPU hneng thlai tōkna khan che leh khōihning nahapsa mak sik kae.

¹²Akum kataia nahleia ahma inkeipen hmuchi tōkna kha RŌNGPU hneng nahei choi sik kae, khava khachu maichâm chunga ro sik changmak.

¹³Hmuchi tōkna rakip a chi nahap sik kae, ajârchu chi khan nang leh Pathen kâra intepna kahlâng athleng kae. (Natōk sik rakip a chi nahap sik kae.)

¹⁴Ahma kakei hmuchi tōkna RŌNGPU hneng nahei choi pha, khângbea kathei inna a-emak leh thlai kha suk mandi inna tōk roh.

¹⁵Olive thai manvei saroh, khana achunga bero da roh.

¹⁶Thempu khan khava tōk sik sâk thei leh thai khana bero rakip kha leh RŌNGPU hneng thlai tōkna inkhat a aro sik kae.